(વાણિજ્ય પ્રતિનિધિ તરફથી)
મુંબઈઃ તાજેતરમાં વૈશ્વિક બજારમાં કોપરમાં પુરવઠાખેંચની સ્થિતિ પ્રવર્તી રહી હોવાથી લંડન મેટલ એક્સચેન્જ ખાતે કોપર સહિતની ચોક્કસ ધાતુઓમાં આગેકૂચ જળવાઈ રહી હોવાના પ્રોત્સાહક અહેવાલ સાથે સ્થાનિકમાં પણ એકમાત્ર કોપર વાયરબારમાં જોવા મળેલા કિલોદીઠ રૂ. આઠના ઘટાડાને બાદ કરતાં કોપરની અન્ય વેરાઈટીઓ તથા બ્રાસ યુટેન્સિલ્સ સ્ક્રેપમાં કિલોદીઠ રૂ. બેથી 19નો સુધારો આગળ ધપ્યો હતો.
આ સિવાય ટીનમાં સ્ટોકિસ્ટોની નફારૂપી વેચવાલીના દબાણે ભાવમાં કિલોદીઠ રૂ. બાવીસનો અને નિરસ માગે ઝિન્ક સ્લેબ અને નિકલમાં કિલોદીઠ રૂ. બેનો ઘટાડો આવ્યો હતો અને અન્ય ધાતુઓમાં ટકેલું વલણ રહ્યું હતું. બજારનાં સાધનોના જણાવ્યાનુસાર આજે વૈશ્વિક પ્રોત્સાહક અહેવાલે કોપરની વેરાઈટીઓમાં સ્ટોકિસ્ટોની લેવાલી ઉપરાંત ઔદ્યોગિક વપરાશકારો તથા સ્થાનિક ડીલરોની માગને ટેકે ભાવમાં સુધારાતરફી વલણ રહ્યું હતું.
જેમાં કોપર કેબલ સ્ક્રેપ અને કોપર સ્ક્રેપ હેવીના ભાવ કિલોદીઠ રૂ. 19 વધીને અનુક્રમે રૂ. 948 અને રૂ. 934, કોપર આર્મિચરના ભાવ કિલોદીઠ રૂ. 16 વધીને રૂ. 920 અને કોપર યુટેન્સિલ્સ સ્ક્રેપના ભાવ કિલોદીઠ રૂ. 10 વધીને રૂ. 845ના મથાળે રહ્યા હતા, જ્યારે વપરાશકાર ઉદ્યોગની લેવાલીને ટકે બ્રાસ યુટેન્સિલ્સ સ્ક્રેપના ભાવ કિલોદીઠ રૂ. બેના સુધારા સાથે રૂ. 600ના મથાળે રહ્યા હતા.
જોકે, આજે વધ્યા મથાળેથી ટીન અને કોપર વાયરબારમાં સ્ટોકિસ્ટોની વેચવાલીનું દબાણ તેમ જ સાર્વત્રિક સ્તરેથી માગ નિરસ રહેતાં ભાવ અનુક્રમે કિલોદીઠ રૂ. બાવીસ ઘટીને રૂ. 3378 અને રૂ. આઠ ઘટીને રૂ. 1020ના મથાળે રહ્યા હતા, જ્યારે નિરસ માગે ઝિન્ક સ્લેબ અને નિકલના ભાવ કિલોદીઠ રૂ. બે ઘટીને અનુક્રમે રૂ. 295 અને રૂ. 1365ના મથાળે રહ્યા હતા. આ સિવાય બ્રાસ શીટ કટિંગ્સ, એલ્યુમિનિયમ અને લીડ ઈન્ગોટ્સમાં ખપપૂરતી માગને ટેકે ભાવમાં ટકેલું વલણ રહ્યું હતું.
