(વાણિજ્ય પ્રતિનિધિ તરફથી)
મુંબઈઃ વૈશ્વિક સ્તરે ખાસ કરીને કોપરમાં પ્રવર્તી રહેલી પુરવઠાખેંચની સ્થિતિ ઉપરાંત નિકલ તથા ઝિન્ક જેવી ધાતુઓના ઔદ્યોગિક વપરાશમાં વધારો થવાથી એકંદરે ધાતુમાં તેજીનું વલણ જળવાઈ રહ્યું હોવાના ઓવરનાઈટ પ્રોત્સાહક અહેવાલ સાથે સ્થાનિક જથ્થાબંધ ધાતુ બજારમાં પણ આજે સપ્તાહના અંતે વન વૅ તેજીનું વલણ જળવાઈ રહ્યું હતું. જેમાં મુખ્યત્વે લીડ ઈન્ગોટ્સમાં રહેલા ટકેલા વલણ અને એલ્યુમિનિયમ યુટેન્સિલ્સ સ્ક્રેપમાં જોવા મળેલા કિલોદીઠ રૂ. બેના ઘટાડાને બાદ કરતાં અન્ય તમામ ધાતુઓના ભાવમાં કિલોદીઠ રૂ. બેથી 65 સુધીના ઉછાળા જોવા મળ્યા હતા.
બજારનાં સાધનોના જણાવ્યાનુસાર આજે કોપરની વેરાઈટીઓમાં વૈશ્વિક પ્રોત્સાહક અહેવાલ અને સ્ટોકિસ્ટોની આક્રમક લેવાલીને ટેકે કોપર કેબલ સ્ક્રેપ અને કોપર સ્ક્રેપ હેવીના ભાવ કિલોદીઠ રૂ. 65 ઉછળીને અનુક્રમે રૂ. 1220 અને રૂ. 1210, કોપર આર્મિચરના ભાવ કિલોદીઠ રૂ. 64 વધીને રૂ. 1196 અને કોપર વાયરબારના ભાવ કિલોદીઠ રૂ. 60 વધીને રૂ. 1305ના મથાળે રહ્યા હતા.
વધુમાં આજે કોપરની આગેવાની હેઠળ અન્ય ધાતુઓમાં પણ સ્ટોકિસ્ટોની લેવાલી ઉપરાંત સાર્વત્રિક સ્તરેથી માગને ટેકે તેજી આગળ ધપી હતી તેમાં નિકલના ભાવ કિલોદીઠ રૂ. 47 વધીને રૂ. 1465, ટીનના ભાવ કિલોદીઠ રૂ. 25 વધીને રૂ. 4007, બ્રાસ યુટેન્સિલ્સ સ્ક્રેપના ભાવ કિલોદીઠ રૂ. 18 વધીને રૂ. 693, બ્રાસ શીટ કટિંગ્સના ભાવ કિલોદીઠ રૂ. 15 વધીને રૂ. 800, એલ્યુમિનિયમ ઈન્ગોટ્સના ભાવ કિલોદીઠ રૂ. પાંચ વધીને રૂ. 306 અને ઝિન્ક સ્લેબના ભાવ કિલોદીઠ રૂ. બે વધીને રૂ. 320ના મથાળે રહ્યાં હતાં.
જોકે, આજે વપરાશકાર ઉદ્યોગ તથા સ્થાનિક ડીલરોની નિરસ માગ રહેતાં એલ્યુમિનિયમ યુટેન્સિલ્સ સ્ક્રેપના ભાવ કિલોદીઠ રૂ. બે ઘટીને રૂ. 216ના મથાળે રહ્યા હતા, જ્યારે ખપપૂરતી માગને ટેકે લીડ ઈન્ગોટ્સના ભાવ કિલોદીઠ રૂ. 183ના મથાળે ટકેલા રહ્યા હોવાનું સૂત્રોએ જણાવ્યું હતું.
આ પણ વાંચો…ભાવલક્ષી દબાણ વચ્ચે નાણાકીય વર્ષ 2026માં સ્ટીલની માગ આઠ ટકા વધશેઃ ઈક્રા
