(વાણિજ્ય પ્રતિનિધિ તરફથી)
મુંબઈઃ આંતરરાષ્ટ્રીય બજારમાં ખાસ કરીને કોપરમાં પુરવઠાખેંચની ભીતિ હેઠળ ચોક્સ ધાતુઓમાં મક્કમ વલણ રહ્યું હોવાના નિર્દેશો છતાં સ્થાનિક જથ્થાબંધ ધાતુ બજારમાં આજે નિકલ ઉપરાંત કોપર વાયરબાર, કોપર કેબલ સ્ક્રેપ, કોપર આર્મિચર, બ્રાસ યુટેન્સિલ્સ સ્ક્રેપ, એલ્યુમિનિયમ ઈન્ગોટ્સ, ઝિન્ક સ્લેબ અને ટીનમાં વધ્યા મથાળેથી નફારૂપી વેચવાલીનું દબાણ રહેતાં ભાવમાં કિલોદીઠ રૂ. બેથી 15 સુધીનો ઘટાડો આવ્યો હતો.
જોકે, આજે કોપર સ્ક્રેપ હેવી અને કોપર યુટેન્સિલ્સ સ્ક્રેપમાં વપરાશકાર ઉદ્યોગની માગને ટેકે ભાવમાં અનુક્રમે કિલોદીઠ રૂ. ત્રણ અને રૂ. એકનો ધીમો સુધારો આવ્યો હતો, જ્યારે અન્ય ધાતુઓમાં ટકેલું વલણ રહ્યું હતું. બજારનાં સાધનોના જણાવ્યાનુસાર આજે મુખ્યત્વે નિકલ,કોપર વાયરબાર અને ટીનમાં સ્ટોકિસ્ટોની નફારૂપી વેચવાલીનું દબાણ વધુ રહેવાની સાથે વપરાશકાર ઉદ્યોગની માગ પણ ખપપૂરતી રહેતાં ભાવ અનુક્રમે કિલોદીઠ રૂ. 15 ઘટીને રૂ. 1363, રૂ. 11 ઘટીને રૂ. 1035 અને રૂ. સાત ઘટીને રૂ. 3345ના મથાળે રહ્યા હતા.
આ સિવાય અન્ય ધાતુઓ જેમાં સ્ટોકિસ્ટોની છૂટીછવાઈ વેચવાલી અને સાર્વત્રિક સ્તરેથી માગ નિરસ રહેતાં ભાવમાં ઘટાડાતરફી વલણ જોવા મળ્યું હતું તેમાં કોપર આર્મિચરના ભાવ કિલોદીઠ રૂ. ચાર ઘટીને રૂ. 926, બ્રાસ યુટેન્સિલ્સ સ્ક્રેપના ભાવ કિલોદીઠ રૂ. ત્રણ ઘટીને રૂ. 605 અને કોપર કેબલ સ્ક્રેપ, એલ્યુમિનિયમ ઈન્ગોટ્સ તથા ઝિન્ક સ્લેબના ભાવ કિલોદીઠ રૂ. બે ઘટીને અનુક્રમે રૂ. 955, રૂ. 268 અને રૂ. 296ના મથાળે રહ્યા હતા.
જોકે, આજે માત્ર કોપર સ્ક્રેપ હેવી અને કોપર યુટેન્સિલ્સ સ્ક્રેપમાં વપરાશકાર ઉદ્યોગ તથા સ્થાનિક ડીલરોની માગને ટેકે ભાવ અનુક્રમે કિલોદીઠ રૂ. ત્રણ વધીને રૂ. 946 અને રૂ. એક વધીને રૂ. 868ના મથાળે રહ્યા હતા. આ સિવાય ખપપૂરતી માગને ટેકે બ્રાસ શીટ કટિંગ્સના ભાવ કિલોદીઠ રૂ. 655, એલ્યુમિનિયમ યુટેન્સિલ્સ સ્ક્રેપના ભાવ કિલોદીઠ રૂ. 217 અને લીડ ઈન્ગોટ્સના ભાવ કિલોદીઠ રૂ. 185ના મથાળે ટકેલા રહ્યા હોવાનું સૂત્રોએ જણાવ્યું હતું.
