ભારત જોડો યાત્રા સિઝન-2: આ વખતે હાઇબ્રિડ હશે કોંગ્રેસની ભારત જોડો યાત્રા, ડિસેમ્બરમાં થશે શુભારંભ
નવી દિલ્હી: કોંગ્રેસ પાર્ટી ભારત જોડો યાત્રાના બીજા ચરણની તૈયારી કરી રહી છે. આ વખતે યાત્રા પહેલાની જેમ પગપાળા નહીં હોય, જોકે તેને હાઇબ્રિડ કરવાની તૈયારી થઇ રહી છે. અગાઉ કોંગ્રેસના નેતા રાહુલ ગાંધીએ 7 સપ્ટેમ્બર 2022ના રોજ કન્યાકુમારીથી યાત્રા શરુ કરી હતી. જેનું સમાપન 30મી જાન્યુઆરી 2023ના રોજ કાશ્મીરમાં થયું હતું.
પ્રાપ્ત વિગતો અનુસાર કોંગ્રેસ ફરી એકવાર ભારત જોડો યાત્રાની તૈયારી કરી રહી છે. જોકે આ વખતે યાત્રા પગપાળા જ નહીં પણ હાઇબ્રિડ રીતે કરવાની તૈયારી થઇ રહી છે. એટલે કે ક્યાંક ચાલીને તો ક્યાંક ગાડી દ્વારા યાત્રા કરવામાં આવશે. જો આ યાત્રા કરવાનો નિર્યણ પાકો થઇ જાય તો આ ભારત જોડો યાત્રા 2.0 હશે. જેની શરુઆત આ વર્ષે ડિસેમ્બરમાં થઇ શકે છે. જે આવતા વર્ષે ફેબ્રુઆરી સુધી ચાલશે.
રાહુલ ગાંધીએ ભારત જોડો યાત્રા પૂર્ણ થયા બાદ ઘણીવાર પોતાના અનુભવો વર્ણવ્યા છે. જેમાં એમણે કહ્યું હતું કે, એમના ઘૂંટણમાં દુ:ખાવો થાય છે, જેને કારણે ચાલવામાં ખૂબ તકલીફ થાય છે. જોકે લોકોના પ્રેમને કારણે તેઓ આ પીડા પણ ભૂલી ગયા હતાં અને યાત્રા પૂર્ણ કરી હતી. હોઇ શખે છે કે આ કારણોસર જ કોંગ્રેસે માત્ર પગપાળા નહીં પણ હાઇબ્રિડ યાત્રા પ્લાન કરી હોય. જેથી રાહુલ ગાંધી અને અન્ય નેતાઓને તકલીફ ના થાય.
પાછલાં વર્ષે રાહુલ ગાંધીએ સપ્ટેમ્બરમાં યાત્રા શરુ કરી હતી અને ફેબ્રુઆરીમાં તેનું સમાપન થયું હતું. આ યાત્રા દરમીયાન રાહુલ ગાંધીએ માત્ર તેમના સમર્થકો જ નહીં પણ વિરોધીઓનું પણ ધ્યાન આકર્ષીત કર્યું હતું. આ યાત્રામાં કમલ હસન, પૂજા ભટ્ટ, રિયા સેન, સ્વરા ભાસ્કર, રશ્મિ દેસાઇ, આકાક્ષા પુરી અને એમોલ પાલેકર જેવા ફિલ્મ અને ટેલિવિઝન સ્ટાર સહિત સમાજના વિવિધ વર્ગોના લોકો પણ જોડાયા હતાં.
આ ઉપરાંત પૂર્વ સેના પ્રમુખ જનરલ (રિટાયર્ડ) દીપક કપૂર, પૂર્વ નૌકાદળ પ્રમુખ (રિટાયર્ડ) એલ રામદાસ, પૂર્વ આરબીઆઇ ગવર્નર રઘુરામ રાજન જેવા જાણીતા લોકો પણ જોડાયા હતાં.
નેશનલ કોન્ફ્રન્સના પ્રમુખ ફારુક અબ્દુલ્લા, ઉમર અબ્દુલ્લા, પીડીપીના મહેબૂબા મુફ્તી, શિવસેના નેતા આદિત્ય ઠાકરે, પ્રિયંકા ચતુર્વેદી અને સંજય રાઉત તથા એનસીપીના સુપ્રિયા સુળે જેવા વિપક્ષી નેતાઓ પણ આ યાત્રામાં અલગ અલગ સમયે રાહુલ ગાંધી સાથે સહભાગી થયા હતાં.