‘હું અને ધોની ક્લોઝ ફ્રેન્ડ નથી’, યુવરાજસિંહે ધોની સાથેની મિત્રતા પર આપ્યું ચોંકાવનારું નિવેદન
નવી દિલ્હી: યુવરાજ સિંહે એક ઈન્ટરવ્યૂમાં મહેન્દ્ર સિંહ ધોની સાથેની મિત્રતાને લઈને ચોંકાવનારું નિવેદન આપ્યું છે. તેમણે કહ્યું છે કે તેની અને ધોની વચ્ચે ક્યારેય ગાઢ મિત્રતા નહોતી. તેમણે એમ પણ કહ્યું કે તે અને ધોની મિત્રો હતા કારણ કે તેઓ સાથે ક્રિકેટ રમતા હતા પરંતુ ક્યારેય ગાઢ મિત્રો નહોતા. આ દરમિયાન યુવરાજે તેની ક્રિકેટ કારકિર્દીમાં ધોની સાથે વિતાવેલા લાંબા સમય વિશે પણ વિગતવાર વાત કરી હતી. ટીઆરએસ ક્લિપ પર એક ચેટ શોમાં યુવીએ કહ્યું હતું કે ‘હું અને માહી ગાઢ મિત્રો નથી. અમે મિત્રો હતા કારણ કે અમે સાથે ક્રિકેટ રમ્યા હતા પરંતુ માહી અને મારી જીવનશૈલી ઘણી અલગ હતી. તેથી જ અમારી વચ્ચે ગાઢ મિત્રતા નહોતી. તે જરૂરી નથી કે તમારા સાથી ખેલાડીઓ મેદાનની બહાર તમારા શ્રેષ્ઠ મિત્રો હોય. દરેક વ્યક્તિની જીવન જીવવાની રીત અલગ-અલગ હોય છે. કોઈપણ એક ટીમને જુઓ તમામ ૧૧ ખેલાડીઓ એકસાથે ફરશે નહીં.
યુવરાજ કહે છે, ‘જ્યારે પણ હું અને માહી મેદાનમાં ઉતરતા ત્યારે અમે બંને દેશ માટે ૧૦૦ ટકા આપી દેતા હતા. તે કેપ્ટન હતો અને હું વાઇસ કેપ્ટન હતો. અમારા નિર્ણયોમાં તફાવત હતો. તેના કેટલાક નિર્ણયો એવા હતા જે મને ગમતા નહોતા અને મારા કેટલાક નિર્ણય તે સમજતો નહોતો. આવું દરેક ટીમ સાથે થાય છે. યુવરાજે આ દરમિયાન એકબીજાને મદદ કરવાનો પણ ઉલ્લેખ કર્યો હતો. તેણે જણાવ્યું કે કેવી રીતે તેણે ધોનીને સદી પૂરી કરવામાં મદદ કરી હતી. તેણે એમ પણ કહ્યું કે ધોનીએ પણ એક વખત તેની ફિફ્ટી પૂરી કરવામાં તેને સપોર્ટ કર્યો હતો. યુવરાજે તેની વાતચીતમાં તે ક્ષણનો ઉલ્લેખ પણ કર્યો હતો. જ્યારે તેણે તેની કારકિર્દી અંગે ધોની પાસેથી સલાહ લીધી હતી. તેણે કહ્યું, ‘જ્યારે હું મારી કારકિર્દીના અંતિમ તબક્કામાં હતો અને હું મારા ભવિષ્ય વિશે સ્પષ્ટ નહોતો ત્યારે મેં ધોની પાસે સલાહ માંગી હતી. તે એ જ વ્યક્તિ હતો જેણે મને કહ્યું હતું કે પસંદગી સમિતિ અત્યારે તમારા વિશે વિચારતી નથી. મારી સ્થિતિ એવી હતી કે મારે વાસ્તવિક પરિસ્થિતિ અને શું થઈ રહ્યું છે તે જાણવું જોઈએ. આ વર્લ્ડ કપ ૨૦૧૯ પહેલા હતું અને તે સાચું છે.’
આખરે યુવરાજે કહ્યું હતું કે ‘તે પણ નિવૃત્ત થઈ ગયો છે. હું પણ નિવૃત્ત થયો છું. જ્યારે અમે મળીએ છીએ, ત્યારે આપણે મિત્રોની જેમ મળીએ છીએ. અમે તાજેતરમાં સાથે એક જાહેરાત પણ શૂટ કરી છે. આ સમય દરમિયાન અમને જૂની વાતો યાદ કરવામાં ખૂબ મજા આવી.’
