મિલકત વિવાદમાં સાવકા ભાઈની હત્યા કરી માથું ધડથી અલગ કર્યું

(અમારા પ્રતિનિધિ તરફથી)
મુંબઈ: મિલકત વિવાદમાં સવકા ભાઈની કથિત હત્યા કર્યા બાદ માથું ધડથી અલગ કરી દેવાના કેસમાં પોલીસે યુવકની ધરપકડ કરી હતી. કલ્યાણમાં જંગલ પરિસરમાંથી મળેલા ધડની તપાસમાં પોલીસને એક શંકાસ્પદ કારની માહિતી મળી હતી, જેને આધારે આ ગુનો ઉકેલાયો હોવાનો દાવો વરિષ્ઠ અધિકારીએ કર્યો હતો.

થાણે ગ્રામીણ પોલીસની લોકલ ક્રાઈમ બ્રાન્ચે પકડી પાડેલા આરોપીની ઓળખ સલમાન મોહમ્મદ ગૌરી અન્સારી (25) તરીકે થઈ હતી. ટિટવાલાના માંડા ગામ ખાતે રહેતા અન્સારીએ તેના સાવકા ભાઈ ફૈઝલ મોહમ્મદ ગૌરી અન્સારી (29)ની હત્યા કરી હોવાનું તપાસમાં સામે આવ્યું હતું.

આપણ વાંચો: રાજ કુશાવાહએ ફિલ્મોમાં કામ કરવા જેવું છેઃ હત્યારો હોવાની ભનક પણ ન પડવા દીધી

પોલીસના જણાવ્યા મુજબ કલ્યાણ તાલુકાના નાલિંબી ગામની હદમાં જંગલમાં પરિસરમાંથી 29 મેની સવારે યુવાનનું ધડ મળી આવ્યું હતું. આસપાસમાં શોધ ચલાવ્યા છતાં માથું ન મળતાં ધડની ઓળખ મેળવવી મુશ્કેલ હતી. આ પ્રકરણે કલ્યાણ તાલુકા પોલીસે ગુનો નોંધ્યો હતો, જેની સમાંતર તપાસ ક્રાઈમ બ્રાન્ચે હાથ ધરી હતી.

મૃતકની ઓળખ મેળવવા માટે તેના ધડ સાથે અમુક વિગતો પોલીસે અનેક વૉટ્સઍપ ગ્રૂપ પર શૅર કરી હતી. એ સિવાયનાં તેના પોસ્ટર્સ પણ ઠેર ઠેર લગાવવામાં આવ્યાં હતાં. રાજ્યનાં દરેક પોલીસ સ્ટેશનમાં નોંધાયેલી ગુમ વ્યક્તિની ફરિયાદોની ચકાસણી કરવામાં આવી હતી, પરંતુ પોલીસને મૃતકની કોઈ વિગતો મળતી નહોતી.

આપણ વાંચો: જન્મદાત્રી બની બાળકોનો કાળ, મુસ્કાન-જુનૈદે ઝેરી રસગુલ્લાથી બાળકોની કરી હત્યા…

પોલીસની એક ટીમે ઘટનાસ્થળ આસપાસના પરિસરમાં લાગેલા સીસીટીવી કૅમેરાનાં ફૂટેજ તપાસ્યાં હતાં. ફૂટેજમાં અજાણી કાર ઘટનાસ્થળની દિશામાં નજરે પડી હતી. પોલીસની ટીમ એ શંકાસ્પદ કારની માહિતીને આધારે આરોપી સલમાન સુધી પહોંચી હતી. કાર સલમાનની હોવાનું તપાસમાં જણાયું હતું.

પ્રાથમિક પૂછપરછમાં પોલીસને જાણવા મળ્યું હતું કે આરોપી અને મૃતક વચ્ચે વારંવાર ઝઘડા હતા. તેમની વચ્ચે મિલકત વિવાદ પણ હતો, જેને પગલે આરોપીએ સાવકા ભાઈની હત્યા કરી હતી.