અમદાવાદ: અમદાવાદમાં એર ઈન્ડિયાનું પ્લેન ક્રેશ થયું તેમાં પીટીઆઈના અહેવાલ પ્રમાણે 265 લોકોનું મોત થયું છે. જ્યારે અનેક લોકો ઘાયલ હોવાનું પણ જાણવા મળ્યું છે. જેથી ઘાયલ લોકોને લોહીની જરૂર હોવાથી અરજન્ટ બ્લડ રિક્વાયરનો મેસેજ મળતાની સાથે જ 400 જેટલા લોકો લોહી આપવા માટે પહોંચી ગયાં હતાં. દુઃખની ઘડીમાં જે રીતે મદદ થઈ શકે તે રીતે મદદ કરવા માટે લોકોએ આગળ આવીને માનવતા દેખાડી હતી. આટલી મોટી દુર્ઘટના બની છે એટલે ઘાયલોની સંખ્યા વધારે હોવાનું અનુમાન છે.
લોહીની જરૂર છે તેવી જાણ થતા બ્લડ ડોનેટ કરવા લાઈનો લાગી
વધારે વિગતે વાત કરવામાં આવે તો, સોશિયલ મીડિયામાં #Ahmedabadsupport હેશટેગ સાથે કેમ્પેઈન શરૂ કરવામાં આવ્યું હતું. જેથી વધારેમાં વધારે લોકો બ્લડ ડોનેટ કરવા માટે આવી શકે અને જોઈતી મદદ કરી શકે. આ કેમ્પેઈન દ્વારા રેડ ક્રોસમાં 400 લોકો રક્તદાન કરવા માટે આવ્યાં હતા. ઘાયલોને લોહીની જરૂર છે તેવી ખબર પડતાની સાથે જ અમદાવાદીઓએ બ્લડ ડોનેટ કરવા માટે મોટી લાઈન લગાવી દીધી હતી. મોટાભાગના લોકો પોતાના દરેક કામ પડતા મુકીને મદદ કરવા માટે દોડી આવ્યાં હતાં. અમદાવાદીઓ આવા ટાણે ખરેખર માનવતા દેખાડી છે.
સ્થાનિક લોકો પોતાનાથી બનતી દરેક મદદ કરવા તૈયાર દેખાયા
આપણાં ગુજરાતીઓ મદદ કરવામાં હંમેશા આગળ રહેતા હોય છે. આ દુર્ઘટના બાદ અનેક લોકો મદદ માટે જોડાયા હતા. ખાસ કરીને વાત કરવામાં આવે તો, ઘટના સ્થળ પર પણ લોકોએ પોતાનાથી બનતી બધી જ મદદ કરી. મુંબઈ સમાચાર દ્વારા કરવામાં આવેલા ગ્રાઉન્ડ ઝીરો રિપોર્ટિંગ દરમિયાન અનેક લોકો મદદ કરતા જોવા મળ્યાં હતા. કેટલાક લોકો પાણીની મદદ કરી રહ્યાં હતા, કોઈ મસ્ક આપી રહ્યું હતું, તો કોઈ કાટમાળમાંથી લાશો બહાર કાઢવા માટે મદદ કરી રહ્યું હતું. જો કે, બચાવ કામગીરી માટે જુદી જુદી એજન્સીઓના કુલ 2000 લોકો ઘટના સ્થળ પર તૈનાત જોવા મળ્યાં હતાં. આ દરમિયાન તેમને મદદ કરવા માટે સ્થાનિકો પણ જોડાયા હતા.
