નવી દિલ્હી :કેરળમાં ચોમાસાની વિધિવત શરૂઆત સાથે જ દેશના ઘણા રાજ્યોમાં આજે પણ વરસાદને લઈને એલર્ટ જાહેર કરવામાં આવ્યું છે. આ વર્ષે કેરળમાં ચોમાસુ સમય પહેલા આવી ગયું છે. આ ઉપરાંત મહારાષ્ટ્રના ઘણા જિલ્લાઓમાં પણ તેની અસર જોવા મળી રહી છે. મહારાષ્ટ્ર અને કેરળમાં વરસાદને કારણે લોકોને ઘણી મુશ્કેલીઓનો સામનો કરવો પડી રહ્યો છે. અહીંના ઘણા જિલ્લાઓમાં એલર્ટ જાહેર કરવામાં આવ્યું છે. દિલ્હી-એનસીઆરમાં પણ વરસાદ બાદ હવામાન પલટાયું છે.
કેરળમાં પણ ભારે પવન સાથે વરસાદ
કેરળમાં ચોમાસુ સંપૂર્ણપણે સક્રિય થઈ ગયું છે. ત્યારે હવામાન વિભાગે આજે ભારેથી અતિ ભારે વરસાદની આગાહી કરવામાં આવી છે. આ ઉપરાંત દરિયાકાંઠાના વિસ્તારોમાં 40-50 કિમી પ્રતિ કલાકની ઝડપે ભારે પવન ફૂંકાય અને ગાજવીજ સાથે વરસાદ પડવાની શક્યતા છે.
મહારાષ્ટ્રમાં વરસાદે ભારે તબાહી મચાવી
ચોમાસું 7 જૂનની આસપાસ મહારાષ્ટ્ર અને 11 જૂને મુંબઈ પહોંચે છે. પરંતુ આ વખતે મહારાષ્ટ્રના દરિયાકાંઠાના કોંકણ પ્રદેશ અને મુંબઈમાં છેલ્લા બે દિવસથી ભારે ચોમાસા પહેલાનો વરસાદ પડી રહ્યો છે. આજે મુંબઈ અને આસપાસના વિસ્તારોમાં હળવા થી મધ્યમ વરસાદ ચાલુ રહેવાની શક્યતા છે. હવામાન વિભાગે ઓરેન્જ એલર્ટ જાહેર કર્યું છે. આ સમય દરમિયાન 50-60 કિલોમીટરની ઝડપે પવન પણ ફૂંકાશે.
35 વર્ષમાં પ્રથમ વાર વહેલું ચોમાસુ
જ્યારે કેટલીક જગ્યાએ મધ્યમ ગાજવીજ સાથે ભારે વરસાદની આગાહી કરવામાં આવી છે. પુણેના બારામતી અને ઇન્દાપુર તાલુકામાં રવિવારે ભારે વરસાદ પડ્યો હતો. જેના કારણે ઘણા વિસ્તારોમાં પૂર જેવી સ્થિતિ સર્જાઈ હતી. આ પછી એનડીઆરએફની એક ખાસ ટીમ તૈનાત કરવી પડી. અધિકારીઓએ જણાવ્યું હતું કે રવિવારે મહારાષ્ટ્રમાં દક્ષિણ પશ્ચિમ ચોમાસુ પહોંચી ગયું છે. આ સાથે 35 વર્ષમાં પહેલી વાર રાજ્યમાં આટલું વહેલું ચોમાસુ પહોંચ્યું છે.
ઉત્તર પ્રદેશમાં વાવાઝોડા સાથે વરસાદની શક્યતા
આ ઉપરાંત ઉત્તર પ્રદેશમાં લોકો હજુ પણ ગરમીનો સામનો કરી રહ્યા છે. જોકે, આજે પશ્ચિમ યુપીના ઘણા જિલ્લાઓમાં વાવાઝોડા સાથે હળવા વરસાદ થવાની શક્યતા છે. આ સમયગાળા દરમિયાન, 40-50 કિલોમીટર પ્રતિ કલાકની ઝડપે પવન ફૂંકાય તેવી શક્યતા છે. પૂર્વી યુપીના બાંદા, ચિત્રકૂટ, પ્રયાગરાજ, વારાણસી, ગોરખપુર અને લખનૌમાં ગાજવીજ સાથે હળવો થી મધ્યમ વરસાદ પડી શકે છે. હવામાન વિભાગે 26 મે સુધી યલો એલર્ટ જાહેર કર્યું છે, જેમાં વાવાઝોડા અને ભારે પવનની ચેતવણીનો સમાવેશ થાય છે.
અન્ય રાજ્યોમાં પણ વરસાદ અને વાવાઝોડાનું એલર્ટ
આ ઉપરાંત દક્ષિણ ભારતના રાજ્યો કેરળ, કર્ણાટક અને તમિલનાડુમાં ભારે વરસાદને લઈને રેડ એલર્ટ જાહેર કરવામાં આવ્યું છે. તેલંગાણા, છત્તીસગઢ અને આંધ્રપ્રદેશમાં ભારે વરસાદ અને તોફાની પવન ફૂંકાય તેવી શક્યતા છે. ઉત્તર-પૂર્વ ભારતની વાત કરીએ તો, આસામ, મિઝોરમ અને મણિપુરમાં ગાજવીજ અને વીજળી સાથે વરસાદની શક્યતા છે.બિહાર અને પૂર્વી મધ્યપ્રદેશમાં વાવાઝોડા અને ભારે પવન ચાલુ રહેશે. હવામાન વિભાગે પશ્ચિમ હિમાલય અને ઉત્તર ભારતના મેદાની વિસ્તારોમાં ભારે પવન અને વીજળી પડવાની આગાહી પણ કરી છે.
