દેશના સર્વિસ સેક્ટરમાં થયો સુધારો, પીએમઆઈ ઇન્ડેક્સમાં પણ વધારો

મુંબઈ: દેશના આર્થિક વિકાસમાં ધીરે ધીરે સુધારો થઈ રહ્યો છે. જેમાં એપ્રિલ મહિનામાં સર્વિસ સેક્ટરમાં સુધારો જોવા મળી રહ્યો છે. જેમાં નવા ઓર્ડરના લીધે સુધારો જોવા મળ્યો છે. મંગળવારે જાહેર કરાયેલા માસિક સર્વેક્ષણમાં દર્શાવવામાં આવ્યું છે કે સીઝનલ HSBC ઇન્ડિયા સર્વિસીસ બિઝનેસ એક્ટિવિટી ઇન્ડેક્સ એપ્રિલમાં 58.7 રહ્યો હતો જે માર્ચમાં 58.5 હતો. આ આંકડો તેના લાંબા ગાળાના સરેરાશ 54.2 કરતા વધારે છે. પરચેઝિંગ મેનેજર્સ ઇન્ડેક્સ (PMI)ને સમજીએ તો તે 50 થી ઉપરનો સ્કોર ક્ષેત્રમાં વિસ્તરણ દર્શાવે છે અને 50 થી નીચેનો સ્કોર સંકોચન દર્શાવે છે.

નવા નિકાસ ઓર્ડરમાં વધારો થયો

આ અંગે HSBC ના ભારત માટેના મુખ્ય અર્થશાસ્ત્રીએ જણાવ્યું હતું કે ભારતના સર્વિસ સેક્ટરની પ્રવૃત્તિઓમાં ગયા મહિના કરતાં વધુ ઝડપથી વધારો થયો છે. માર્ચમાં રાહત મળ્યા પછી નવા નિકાસ ઓર્ડરમાં વધારો થયો છે. જે જુલાઈ 2024 પછી સૌથી ઝડપી ગતિએ વધી રહ્યો છે.

આંતરરાષ્ટ્રીય માંગનો લાભ મેળવો

તેમણે વધુમાં જણાવ્યું હતું કે, ઉત્પાદનમાં એકંદર વિસ્તરણ નવા વ્યવસાયમાં નોંધપાત્ર વૃદ્ધિને કારણે થયું હતું. જે 8 મહિનામાં સંયુક્ત રીતે શ્રેષ્ઠ હતું. ઘણી કંપનીઓએ માંગની અનુકૂળ પરિસ્થિતિઓ અને સફળ માર્કેટિંગ પ્રયાસોની નોંધ લીધી. તેમજ ભારતીય કંપનીઓને તેમની સેવાઓ માટે આંતરરાષ્ટ્રીય માંગમાં સુધારો થવાનો લાભ મળતો રહ્યો. જેમાં એશિયા, યુરોપ, પશ્ચિમ એશિયા અને અમેરિકા જેવા દેશો મુખ્ય રહ્યા હતા. એકંદરે નવા નિકાસ ઓર્ડર જુલાઈ 2024 પછી સૌથી ઝડપી ગતિએ વધ્યા છે.

ગ્રાહકો પર ઊંચા ખર્ચનો બોજ નાખવાનો પ્રયાસ

નવા ઓર્ડરમાં વધારાને કારણે સેવા ક્ષેત્રની કંપનીઓએ એપ્રિલમાં સતત 35મા મહિને તેમના કાર્યબળમાં વધારો કર્યો. સર્વેમાં જાણવા મળ્યું છે કે ગ્રાહકોની વધતી માંગનો લાભ લેવા માટે કંપનીઓએ ફૂલ ટાઈમ અને પાર્ટ ટાઈમ કર્મચારીઓ સાથે કાર્યકારી ક્ષમતામાં વધારો કર્યો છે. મૂલ્ય નિર્ધારણના મોરચે ભારતીય સેવા કંપનીઓએ એપ્રિલ દરમિયાન તેમના સરેરાશ વેચાણ ભાવમાં વધારો કર્યો હતો કારણ કે તેઓ ગ્રાહકો પર ઊંચા ખર્ચનો બોજ નાખવાનો પ્રયાસ કરી રહ્યા હતા.

ખર્ચનું દબાણ ઓછું થતાં અને મૂલ્ય ઝડપથી વધ્યું

HSBCના ભારતના મુખ્ય અર્થશાસ્ત્રીએ જણાવ્યું હતું કે ખર્ચનું દબાણ ઓછું થતાં અને મૂલ્ય ઝડપથી વધવાથી નફાકારકતામાં સુધારો થયો છે. આ દરમિયાન, HSBC ઇન્ડિયા કમ્પોઝિટ આઉટપુટ ઇન્ડેક્સ એપ્રિલમાં વધીને 59.7 થયો જે માર્ચમાં 59.5 હતો.

સામાન્ય રીતે PMI ઇન્ડેક્સ એ તુલનાત્મક ઉત્પાદન અને સેવાઓ PMI સૂચકાંકોની ભારિત સરેરાશ છે. HSBC ઇન્ડિયા સર્વિસીસ PMI S&P ગ્લોબલ દ્વારા લગભગ 400 સર્વિસ સેક્ટર કંપનીઓના જૂથને મોકલવામાં આવેલા પ્રશ્નાવલીના જવાબોના આધારે સંકલિત કરવામાં આવે છે.

આ પણ વાંચો…લોનધારકોને આગામી દિવસો મળી શકે છે રાહત, વ્યાજ દરમાં ઘટાડાના સંકેત