દિલ્હીના છ વિકેટે 183, રાહુલની ચાર મહત્ત્વપૂર્ણ ભાગીદારી…
ચેન્નઈઃ દિલ્હી કૅપિટલ્સ (DC)એ અહીં આજે ચેન્નઈ સુપર કિંગ્સ (CSK) સામે આઇપીએલ-2025 (IPL 2025)ની 17મી મૅચમાં બૅટિંગ પસંદ કર્યા બાદ 20 ઓવરમાં છ વિકેટે 183 રન કર્યા હતા.
કેએલ રાહુલ (77 રન, 51 બૉલ, ત્રણ સિક્સર, છ ફોર) દિલ્હીની ઇનિંગ્સનો સુપરસ્ટાર હતો. તેના સાથી ઓપનર અને ઑસ્ટ્રેલિયાના જેક ફ્રેઝર-મૅકગર્કે ખલીલ અહમદની પહેલી જ ઓવરમાં શૂન્યમાં વિકેટ ગુમાવી ત્યાર બાદ રાહુલે ચાર મહત્ત્વપૂર્ણ ભાગીદારી કરીને એલએસજીને પોણાબસો ઉપરનું ટોટલ અપાવવામાં મોટું યોગદાન આપ્યું હતું.
રાહુલે અભિષેક પોરેલ (33 રન, 20 બૉલ, એક સિક્સર, ચાર ફોર) સાથે બીજી વિકેટ માટે 36 બૉલમાં 54 રનની, કૅપ્ટન અક્ષર પટેલ (21 રન, 14 બૉલ, એક સિકસર, બે ફોર) સાથે ત્રીજી વિકેટ માટે 23 બૉલમાં 36 રનની, સમીર રિઝવી (20 રન, 15 બૉલ, એક સિક્સર, એક ફોર) સાથે ચોથી વિકેટ માટે 33 બૉલમાં 56 રનની અને ટ્રિસ્ટેન સ્ટબ્સ (24 અણનમ, 12 બૉલ, એક સિક્સર, બે ફોર) સાથે પાંચમી વિકેટ માટે 19 બૉલમાં 33 રનની પાર્ટનરશિપ કરી હતી.
આ પણ વાંચો: દિલ્હી હૅટ-ટ્રિક વિજયની તલાશમાં, ચેન્નઈ સતત ત્રીજી હારથી બચશે?
ચેન્નઈ વતી છ બોલરે બોલિંગ કરી હતી જેમાં ખલીલ અહમદ (4-0-25-2) સૌથી સફળ બોલર હતો. રવીન્દ્ર જાડેજા, નૂર અહમદ અને મથીશા પથિરાનાને એક-એક વિકેટ મળી હતી, પણ મુકેશ ચૌધરી અને આર. અશ્વિનને વિકેટ નહોતી મળી.
એ પહેલાં, અહીં ચેપૉકના એમ. એ. ચિદમ્બરમ સ્ટેડિયમમાં દિલ્હી કૅપિટલ્સ (ડીસી)ના સુકાની અક્ષર પટેલે ટૉસ જીતીને બૅટિંગ પસંદ કરી હતી. સીએસકેના કૅપ્ટન ઋતુરાજ ગાયકવાડને કોણીમાં હવે દુખાવો ન હોવાથી રાબેતામુજબ તેણે જ ટીમનું નેતૃત્વ સંભાળ્યું હતું. અગાઉ એવી ચર્ચા હતી કે ગાયકવાડ નહીં રમી શકે તો એમએસ ધોની સુકાનની જવાબદારી સંભાળશે.
દિલ્હીએ બૅટિંગ પસંદ કરી હતી, પણ શરૂઆતમાં જ એને ઝટકો લાગ્યો હતો. સીએસકેના પેસ બોલર ખલીલ અહમદે ઓપનર જેક ફ્રેઝર-મૅકગર્કની વિકેટ લીધી હતી. જોકે રાહુલના નવા સાથી બૅટ્સમૅન અભિષેક પોરેલે મુકેશ ચૌધરીની બીજી ઓવરમાં જોરદાર ફટકાબાજી કરી હતી. તેણે મુકેશ ચૌધરીના બીજાથી પાંચમા સુધીના ચાર બૉલમાં (4, 6, 4, 4) 18 રન બનાવ્યા હતા.
આ પણ વાંચો: રિષભ પંત ચોથી વાર પણ ફ્લૉપ, કૅપ્ટને જ કૅપ્ટનની વિકેટ લીધી
ચેન્નઈની ટીમમાં બે ફેરફાર કરવામાં આવ્યા છે. ઑવર્ટનના સ્થાને ડેવૉન કૉન્વેને અને રાહુલ ત્રિપાઠીના સ્થાને મુકેશ ચૌધરીને ઇલેવનમાં સમાવવામાં આવ્યા છે.
મૅચની શરૂઆત પહેલાં સ્ટેડિયમ પૂરું ભરાયેલું નહોતું. જોકે સીએસકેને અને ખાસ કરીને ધોનીને રમતો જોવા લોકોનો ધસારો થતો રહેશે અને સમય જતાં સ્ટેડિયમ પૂરું ભરાઈ જશે એવી પાકી સંભાવના છે.