Sunita Williams ના પરત ફરવા મુદ્દે પીએમ મોદીએ લખ્યો પત્ર, કહ્યું તમામ ભારતીયોને ગર્વ

નવી દિલ્હી : ભારતીય મૂળના અવકાશયાત્રી સુનિતા વિલિયમ્સ(Sunita Williams)અને બુચ વિલ્મોર પૃથ્વી પર પાછા ફરી રહ્યા છે.તેમની વાપસી પર સમગ્ર વિશ્વની નજર ટકેલી છે.

તેઓ આજે સવારે ડ્રેગન અવકાશયાન પર આંતરરાષ્ટ્રીય અવકાશ મથકથી રવાના થયા. નાસાએ જણાવ્યું હતું કે ક્રૂ-9 સવારે 10:35 વાગ્યે (IST)અનડોક થયું હતું. અવકાશ મથકથી અવકાશયાન અલગ થઈ રહ્યું હોવાનો એક વીડિયો શેર કર્યો હતો. આ અવકાશયાત્રીઓ નવ મહિનાથી વધુ સમયથી આંતરરાષ્ટ્રીય અવકાશ મથક (ISS)પર ફસાયેલા હતા.

ત્યારે ભારતના વડા પ્રધાન નરેન્દ્ર મોદીએ સુનિતા વિલિયમ્સને પરત ફરતી વખતે એક પત્ર લખ્યો છે. તેમણે પત્રમાં સુનિતા વિલિયમ્સને શુભકામનાઓ પાઠવીને કહ્યું કે ભારતની દીકરીનું સ્વાગત કરવાનો આનંદ થશે.

આપણ વાંચો: ટૂંક સમયમાં સુનિતા વિલિયમ્સના પૃથ્વી પર પરત ફરશે, જાણો શેડ્યુલ

ભારતીયો હંમેશા તમારી સિદ્ધિઓ પર ખૂબ ગર્વ અનુભવે છે

પીએમ મોદીએ પોતાના પત્રમાં લખ્યું છે કે, “હું ભારતના લોકો વતી તમને શુભકામનાઓ પાઠવું છું. આજે, હું એક કાર્યક્રમમાં પ્રખ્યાત અવકાશયાત્રી માઇક મેસિમિનોને મળ્યો. અમારી વાતચીત દરમિયાન તમારું નામ આવ્યું અને અમે ચર્ચા કરી કે અમને તમારા અને તમારા કાર્ય પર કેટલું ગર્વ છે.

આ વાતચીત પછી હું તમને પત્ર લખતા રોકી શક્યો નહીં. જ્યારે પણ હું મારી અમેરિકાની મુલાકાતો દરમિયાન રાષ્ટ્રપતિ ટ્રમ્પ કે રાષ્ટ્રપતિ બાઈડનને મળ્યો ત્યારે મેં તમારા સુખાકારી અંગે જાણકારી મેળવી. તેમજ 1.4 અબજ ભારતીયો હંમેશા તમારી સિદ્ધિઓ પર ખૂબ ગર્વ અનુભવે છે. તાજેતરના ઘટનાક્રમે ફરી એકવાર તમારી પ્રેરણાદાયી દૃઢતા દર્શાવી છે.

આપણ વાંચો: સુનિતા વિલિયમ્સ વહેલા પૃથ્વી પર પરત ફરશે, નાસાએ તારીખ અને સમય જાહેર કર્યા…

સારા સ્વાસ્થ્ય અને તમારા મિશનમાં સફળતા માટે પ્રાર્થના

પીએમ મોદીએ સુનિતા વિલિયમ્સને આગળ લખ્યું, “ભલે તમે હજારો માઇલ દૂર છો, તમે અમારા હૃદયની નજીક છો. ભારતના લોકો તમારા સારા સ્વાસ્થ્ય અને તમારા મિશનમાં સફળતા માટે પ્રાર્થના કરી રહ્યા છે. બોની પંડ્યા તમારા પાછા ફરવાની આતુરતાથી રાહ જોશે અને મને ખાતરી છે કે સ્વર્ગસ્થ દીપકભાઈના આશીર્વાદ પણ તમારી સાથે રહેશે.

પુત્રીની મેજબાની કરવાનો આનંદ થશે

વર્ષ 2016 માં મારી અમેરિકાની મુલાકાત દરમિયાન તમારી સાથે મુલાકાત યાદ આવે છે. તમારા પરત ફર્યા બાદ અમે તમને ભારતમાં મળવા માટે આતુર છીએ. ભારત માટે સૌથી પ્રતિષ્ઠિત પુત્રીઓમાંથી એક પુત્રીની મેજબાની કરવાનો આનંદ થશે. હું માઈકલ વિલિયમ્સને મારી હૃદયપૂર્વક શુભેચ્છાઓ પાઠવું છું. તમને અને બેરી વિલ્મોરને સુરક્ષિત વાપસી માટે શુભકામનાઓ.