રિષભ પછી કોહલીએ પણ કૅપ્ટન્સી ન સ્વીકારી અને ટીમ-મૅનેજમેન્ટને કહી દીધું કે…

નવી દિલ્હીઃ વિરાટ કોહલીએ કૅપ્ટન્સી નહીં સંભાળવાની ટીમ-મૅનેજમેન્ટને વિનમ્રતાથી ના પાડી દીધી એ કિસ્સો બે દિવસથી ખૂબ ચર્ચામાં છે એટલે અહીં આપણે એની વિગતે ચર્ચા કરીશું એ પહેલાં ચોખવટ કરી દઈએ કે આ કૅપ્ટન્સી ભારતીય ટીમ વિશેની નહીં, બલકે રણજી ટ્રોફીમાં દિલ્હીની ટીમનું નેતૃત્વ સંભાળવા વિશેની છે. વાત એવી છે કે BCCIએ સ્ટાર ક્રિકેટરોને ડોમેસ્ટિક ક્રિકેટમાં (ખાસ કરીને દેશની સર્વોત્તમ સ્પર્ધા રણજી ટ્રોફીમાં) રમવાની સૂચના આપી એને પગલે વિશેષ કરીને દિલ્હીની વાત કરીએ તો વિકેટકીપર રિષભ પંતે ગયા અઠવાડિયે સૌરાષ્ટ્ર સામેની રણજી મૅચમાં સુકાન સંભાળવાની દિલ્હી ઍન્ડ ડિસ્ટ્રિક્ટ ક્રિકેટ ઍસોસિયેશન (ડીડીસીએ)ના મોવડીઓની વિનંતી વિનમ્રતા સાથે નકારી હતી એવું હવે વિરાટ કોહલીએ પણ કર્યું છે.

Also read: વિરાટ કોહલી વિશે ઇરફાન પઠાણની ચોંકાવનારી કમેન્ટ

કોહલીએ ડીડીસીએના સત્તાધીશોને કહ્યું છે કે ગુરુવાર, 30મી જાન્યુઆરીએ રેલવે સામે શરૂ થનારી ચાર-દિવસીય રણજી મૅચમાં દિલ્હીનું સુકાન તેને નથી સંભાળવું અને આયુષ બદોનીને જ સંભાળવા દો. પીટીઆઇને ડીડીસીએના એક અધિકારીએ નામ જાહેર ન કરવાની શરતે જણાવ્યું હતું કે `અમે વિરાટને પૂછ્યું કે તારે રેલવે સામેની મૅચમાં સુકાન સંભાળવું છે? જોકે તેણે વિવેકપૂર્વક કહ્યું કે હું ઇચ્છું છું કે આયુષ બદોની જ નેતૃત્વ સંભાળે.’ દરમ્યાન કોહલીની હાજરીથી આ રણજી મૅચ જોવામાં અનેક લોકોમાં રસ જાગ્યો છે જે જોતાં એક જાણીતા બ્રૉડકાસ્ટરે આ મૅચ લાઇવ બતાવવાનું નક્કી કર્યું છે.