લોકસભા ચૂંટણીમાં ‘સાહેબ’ને ખુશ કર્યા, વિધાનસભાની ચૂંટણીમાં મને ખુશ કરો: અજિત પવાર
બારામતી: મહારાષ્ટ્રના નાયબ મુખ્ય પ્રધાન અજિત પવારે રવિવારે બારામતીના લોકોને રાજ્યની આગામી ચૂંટણીમાં તેમનું સમર્થન કરવાની અપીલ કરી હતી, જેમ કે તેઓએ તેમના કાકા શરદ પવારનો ઉલ્લેખ કરતાં કહ્યું હતું કે, 2024ની લોકસભા ચૂંટણીમાં તમે ‘સાહેબ’ને ખુશ કર્યા હતા.
એનસીપી નેતાએ એવો પણ દાવો કર્યો હતો કે તે બારામતીના લોકોને પાણી મળી રહે તે માટે તેમણે માર્ગ બહાર જઈને પ્રયાસ કર્યા હતા.
આ વર્ષની શરૂઆતમાં યોજાયેલી લોકસભાની ચૂંટણીમાં, એનસીપી (એસપી)ના નેતા સુપ્રિયા સુળે, પાર્ટીના વડા શરદ પવારની પુત્રી, બારામતી સંસદીય મતવિસ્તારમાંથી એક હાઇ-પ્રોફાઇલ હરીફાઈમાં વિજય મેળવ્યો હતો, તેમણે કઝિન અજિત પવારની પત્ની સુનેત્રા પવારને પરિવારના જંગમાં હરાવ્યા હતા.
ગયા વર્ષે જુલાઈમાં અજિત પવાર અને અન્ય ઘણા એનસીપી નેતાઓ રાજ્યની એકનાથ શિંદે-ભાજપ સરકારમાં જોડાયા હતા, જેના કારણે શરદ પવાર દ્વારા સ્થાપિત પક્ષમાં ભાગલા પડ્યા હતા.
આપણ વાંચો: નવાબ મલિકને અજિત પવારે બનાવ્યા ઉમેદવાર તો ફડણવીસ નારાજ…
એનસીપીના વડા અજિત પવાર પુણે જિલ્લાની બારામતી વિધાનસભા બેઠક પરથી ચૂંટણી લડી રહ્યા છે. તેઓ તેમના ભત્રીજા અને એનસીપી (એસપી)ના ઉમેદવાર યુગેન્દ્ર પવાર સામે લડે છે.
રવિવારે નાયબ મુખ્ય પ્રધાન બારામતી તાલુકામાં અનેક ગામોના પ્રવાસ પર હતા જ્યાં તેઓ સ્થાનિકોને મળ્યા હતા અને તેમની સાથે અનેક મુદ્દાઓ પર ચર્ચા કરી હતી.
સાવલ ગામમાં સ્થાનિકોને સંબોધતા અજિત પવારે કહ્યું હતું કે, જો સુપ્રિયા લોકસભાની ચૂંટણીમાં હારી ગઈ હોત તો સાહેબ (શરદ પવાર)ને આ ઉંમરે કેવું લાગ્યું હોત. આ વિચારને ધ્યાનમાં રાખીને તમે તેમને મત આપ્યો, પરંતુ હવે વિધાનસભામાં મને મત આપો.
તમે લોકસભાની ચૂંટણીમાં સાહેબને ખુશ કર્યા હતા, હવે વિધાનસભાની ચૂંટણીમાં તમારો મત (મારા માટે) આપીને મને ખુશ કરો. સાહેબ તેમની રીતે કામ કરશે, હું અમારા તાલુકાના વિકાસ માટે મારી શૈલીમાં કામ કરીશ,એમ તેમણે કહ્યું હતું.
અન્ય ગામની મુલાકાત દરમિયાન નાયબ મુખ્ય પ્રધાને કહ્યું હતું કે, તેમણે બારામતીના લોકોને પાણી પુરવઠો મળે તે સુનિશ્ર્ચિત કરવા નિયમોની અવગણના કરી હતી.
મેં ઘણા નિયમોને બાયપાસ કરીને બારામતીના લોકોને પાણી લાવી આપ્યું હતું. અમારા તાલુકામાં ઘણા ગામોમાં પાણીની સમસ્યા હજી પણ ગંભીર છે કારણ કે ઘણા લોકોને હજુ પણ તેના માટે લાંબુ અંતર કાપવું પડે છે. આમ છતાં મેં બારામતીવાસીઓને નિયમમાં ન હોવા છતાં પાણી આપ્યું હતું. નિયમો ચાતરીને પણ અધિકારીઓને તે જ કરવાની ફરજ પડી હતી, એવો દાવો તેમણે કર્યો હતો.
