ફ્રાન્સમાં મિશેલ બાર્નિયરની સરકાર 3 મહિનામાં જ પડી ગઈ, સંસદમાં થયો અવિશ્વાસ પ્રસ્તાવ પસાર
પેરિસ: બુધવારે ફ્રાન્સમાં એક મોટી ઘટના જોવા મળી હતી. અહીં વિરોધ પક્ષોના સાંસદોએ ફ્રાન્સની મિશેલ બાર્નિયરની સરકારને ઉથલાવી દીધી હતી. આ પગલા બાદ યુરોપિયન યુનિયનની બીજી સૌથી મોટી આર્થિક શક્તિ ફ્રાન્સમાં હવે રાજકીય સંકટ વધુ ઘેરુ બન્યું છે.એમ જાણવા મળ્યું છે કે અવિશ્વાસનો મત હારી જતાં ફ્રાન્સની સરકાર પડી ગઈ છે. ફ્રાન્સના છેલ્લા 60 વર્ષના ઈતિહાસમાં આ પહેલીવાર છે જ્યારે કોઈ સરકારને આ રીતે હટાવવામાં આવી હોય. ફ્રાન્સમાં ડાબેરી NFP ગઠબંધન દ્વારા રજૂ કરવામાં આવેલા અવિશ્વાસ પ્રસ્તાવના પક્ષમાં કુલ 331 સાંસદોએ મતદાન કર્યું હતું. જ્યારે સરકારને તોડવા માટે માત્ર 288 વોટની જરૂર હતી.
નોંધનીય છે કે બાર્નિયરની સરકાર માત્ર ત્રણ મહિના જ ચાલી શકી હતી. અવિશ્વાસની દરખાસ્ત હારી ગયા પછી, બાર્નિયરે હવે રાષ્ટ્રપતિ ઇમેન્યુઅલ મેક્રોનને પોતાનું રાજીનામું સુપરત કરવું પડશે.ફ્રાન્સમાં જુલાઈમાં યોજાયેલી સામાન્ય ચૂંટણીમાં કોઈપણ પક્ષને બહુમતી મળી નહોતી. આ પછી, રાષ્ટ્રપતિ ઇમેન્યુઅલ મેક્રોને સપ્ટેમ્બરમાં મિશેલ બાર્નિયરના નેતૃત્વમાં લઘુમતી સરકારની જાહેરાત કરી હતી. ત્યાર બાદ 73 વર્ષીય બાર્નિયર સરકાર ચલાવી રહ્યા હતા.તાજેતરમાં, તેમના દ્વારા લાવવામાં આવેલા સામાજિક સુરક્ષા બજેટને લઈને ફ્રાન્સમાં તણાવ વધ્યો હતો. તેમણે આ બજેટમાં ટેક્સ વધારવાનો નિર્ણય લીધો હતો. તેમના આ નિર્ણયનો દેશના ડાબેરી અને જમણેરી પક્ષોએ વિરોધ કર્યો હતો અને આ ટેક્સ ઘટાડવાની માંગ કરી હતી. પરંતુ બાર્નિયરની સરકારે મતદાન કર્યા વિના આ બજેટ પગલાં પસાર કરવાનું નક્કી કર્યું હતું. વિરોધ પક્ષોએ પણ આનો વિરોધ કર્યો હતો. આ પછી, વિરોધ પક્ષોએ બુધવારે બાર્નિયરની સરકાર વિરુદ્ધ અવિશ્વાસ પ્રસ્તાવ લાવવાની જાહેરાત કરી હતી.
