ડોનાલ્ડ ટ્રમ્પ અને ઇલોન મસ્ક વચ્ચેનો વિવાદ વધુ વકર્યો, હવે ટ્રમ્પે કહી આ મોટી વાત…

ન્યુયોર્ક : અમેરિકાના રાષ્ટ્રપતિ ડોનાલ્ડ ટ્રમ્પ અને ઇલોન મસ્ક વચ્ચેનો વિવાદ વધુ વકર્યો છે. આ અંગે ડોનાલ્ડ ટ્રમ્પનું નિવેદન પ્રકાશમાં આવ્યું છે. તેમણે એક મીડિયા સાથે ટેલિફોનિક ઇન્ટરવ્યુમાં કહ્યું કે મને લાગે છે કે અમારા સંબંધો હવે પૂર્ણ થયા છે.ટ્રમ્પે ચેતવણી પણ આપી હતી કે જો ઇલોન મસ્ક રિપબ્લિકન પાર્ટીના ટેક્સ બિલનો વિરોધ કરી રહેલા ડેમોક્રેટિક ઉમેદવારોને ફંડ આપશે તો તેના ગંભીર પરિણામો ભોગવવા પડશે.

ટ્રમ્પની ટેરિફ નીતિ અમેરિકાને મંદીમાં ધકેલી શકે છે
ટ્રમ્પ અને મસ્ક વચ્ચેનો વિવાદ ત્યારે જાહેર થયો જ્યારે મસ્કે ટ્રમ્પના ‘વન બિગ બ્યુટીફુલ બિલ’ને X પર ઘૃણાસ્પદ બિલ ગણાવ્યું અને ચેતવણી આપી કે ટ્રમ્પની ટેરિફ નીતિ અમેરિકાને મંદીમાં ધકેલી શકે છે. જોકે, તેની બાદ મસ્કે ટ્રમ્પના X પર મહાભિયોગને સમર્થન આપતી પોસ્ટ કરી, જે ડિલીટ કરવામાં આવી હતી. તેમણે જેફરી એપસ્ટેઇન સાથે ટ્રમ્પના કથિત જૂના સંબંધોનો પણ ઉલ્લેખ કર્યો જેને ટ્રમ્પે જૂનો અને ખોટો મુદ્દો ગણાવ્યો હતો.

ટ્રમ્પે ઇલોન મસ્કને રાષ્ટ્રપતિ પદનો અનાદર કરનાર ગણાવ્યા
ટ્રમ્પે ઇલોન મસ્કને રાષ્ટ્રપતિ પદનો અનાદર કરનાર ગણાવ્યા અને એમ પણ કહ્યું કે તેઓ મસ્કથી નિરાશ છે. જેમણે બિલની ખુલ્લેઆમ ટીકા કરી છે અને તેને સ્વચ્છ ઉર્જા ઉદ્યોગો માટે અન્યાયી ગણાવ્યું છે. મસ્કે ટ્રમ્પના ચૂંટણી પ્રચારમાં ઘણી આર્થિક મદદ કરી હતી. બદલામાં ટ્રમ્પે તેમને ડિપાર્ટમેન્ટ ઓફ ગવર્નમેન્ટ એફિશિયન્સી (DOGE) ના ચીફ પણ બનાવ્યા. પરંતુ મસ્કે આ પદ પરથી રાજીનામું આપ્યું.

સરકારી કરારો અને સબસિડી સમાપ્ત કરવાની ધમકી
ટ્રમ્પે એવો પણ સંકેત આપ્યો કે તેઓ મસ્કની કંપનીઓ ખાસ કરીને સ્પેસએક્સ સાથે સરકારી કરારો અને સબસિડી સમાપ્ત કરવાનું વિચારી શકે છે. જોકે, તેમણે સ્પષ્ટતા કરી કે તેમણે આ સંદર્ભમાં હજુ સુધી કોઈ અંતિમ નિર્ણય લીધો નથી. સ્ટીવ બેનન જેવા ટ્રમ્પ સમર્થક નેતાઓએ મસ્કના વ્યવસાયિક સોદાઓની તપાસની માંગ કરી છે. પરંતુ ટ્રમ્પે કહ્યું કે તેઓ હાલમાં આવું કંઈ વિચારી રહ્યા નથી.

ઇલોન મસ્ક ઉદાસ અને નિરાશ
ટ્રમ્પે કહ્યું કે મને લાગે છે કે ઇલોન ખૂબ જ ઉદાસ અને નિરાશ થઈ રહ્યા છે. પરંતુ એક રીતે તેમણે બતાવ્યું કે અમારું બિલ કેટલું સારું છે. તેમણે વિશ્વાસ વ્યક્ત કર્યો કે બિલ 4 જુલાઈની સમયમર્યાદા પહેલા પસાર થઈ જશે અને કહ્યું કે રિપબ્લિકન પાર્ટી પહેલા કરતાં વધુ એક થઈ ગઈ છે.

આપણ વાંચો : અમેરિકાના રાષ્ટ્રપતિ ડોનાલ્ડ ટ્રમ્પની ધમકીથી ટેસ્લા શેરોમાં મોટો કડાકો, માર્કેટ કેપમાં પણ ઘટાડો