સ્પોર્ટ્સમૅનઃ ટેસ્ટની પરીક્ષામાં નાપાસ થયા, હવે વન-ડેમાં નંબર-વનની રૅન્ક સાચવજો

અજય મોતીવાલા

રોહિત શર્મા અને વિરાટ કોહલી રવિવારે રાંચીમાં સાઉથ આફ્રિકા સામે રમાનારી વન-ડે માટે મેદાન પર ઊતરશે એ સાથે તેઓ અનોખી રેકૉર્ડ-બુકમાં આવી જશે. ભારત વતી જોડીમાં સૌથી વધુ આંતરરાષ્ટ્રીય મૅચ રમવાની સિદ્ધિ સાથે તેઓ પોતાની શાનદાર કારકિર્દીમાં એક નવો તાજ પહેરશે અને ક્રિકેટ જગતમાં છવાઈ જશે. એક મહિના પહેલાં સિડનીમાં તેમણે બીજી વિકેટ માટે 168 રનની અતૂટ ભાગીદારી કરીને ટીમ ઇન્ડિયાને ઑસ્ટ્રેલિયા સામે 0-3ના વાઇટવૉશથી બચાવી લીધું હતું. રોહિતે એ મૅચમાં 125 બૉલમાં અણનમ 121 રન અને કોહલીએ 81 બૉલમાં અણનમ 74 રન કર્યા હતા.

બન્ને દિગ્ગજોએ ભેગા થઈને ભારતને અનેક મૅચો જિતાડી છે. આ બધો ઉલ્લેખ કરવા પાછળનું અત્યારે એકમાત્ર કારણ એ છે કે ભારતીય ટીમ સાઉથ આફ્રિકા સામેની ટેસ્ટ સિરીઝમાં 0-2થી થયેલા પતન બદલ ખૂબ જ હતાશ છે અને અને ભારતના કરોડો ક્રિકેટપ્રેમીઓ નારાજ હોવા ઉપરાંત ટીમ ઇન્ડિયા પર ગુસ્સે પણ છે એટલે તેમને એ સ્થિતિમાંથી બહાર લાવવામાં રો-કો (રોહિત-કોહલી)ની જોડી જ મોટી ભૂમિકા ભજવી શકે. તમે જરૂર સમજી ગયા હશો! ભારતે હવે સાઉથ આફ્રિકા સામે 30 નવેમ્બરથી છ ડિસેમ્બર સુધી રમાનારી ત્રણ મૅચની વન-ડે સિરીઝ કેમેય કરીને જીતવાની છે અને ટેસ્ટમાં ગુમાવેલી આબરૂ વન-ડે જીતીને પાછી મેળવવાની છે.

આ પણ વાંચો: સ્પોર્ટ્સમૅનઃ ગૌતમ માટે સ્થિતિ ગંભીર, હેડ-કોચ માટે ટેસ્ટના પરાજય બન્યા હેડેક…

ટેસ્ટ-શ્રેણીમાં વર્લ્ડ ચૅમ્પિયન સાઉથ આફ્રિકા સામે રમવાનું કઠિન તો હતું જ. હજી પાંચ મહિના પહેલાં જ તેઓ ઑસ્ટ્રેલિયા જેવી ધરખમ ટીમને ફાઇનલમાં હરાવીને આવ્યા હતા એટલે તેમને હરાવવાનું કામ આસાન નહોતું. તેમનો કૅપ્ટન ટેમ્બા બવુમા ટીમનું નેતૃત્વ સંભાળ્યા પછી એક પણ ટેસ્ટ નહોતો હાર્યો એટલે તે પોતાનો રેકૉર્ડ ક્લીન રાખવા કમર કસીને જ ભારત આવ્યો હતો. ઘરઆંગણાની પિચો પર ભારતના સ્પિનર્સ તરખાટ મચાવવામાં માહિર છે, પરંતુ એ જ પિચો પર ભારતના બૅટ્સમેનો વિદેશી સ્પિનર્સ સામે રમવામાં નબળા છે એ પણ સાઉથ આફ્રિકનો સારી રીતે જાણતા હતા.

પોતાની ટીમને નમાવવા ભારતનું ટીમ-મૅનેજમેન્ટ પોતાના સ્પિનર્સને વધુ ફાયદો અપાવે એવી જ પિચ બનાવશે એવી પણ તેમને ખાતરી હતી એટલે બે અવ્વલ દરજ્જાના સ્પિન-સ્ટાર કેશવ મહારાજ તથા સાઇમન હાર્મર તેમ જ ત્રીજા સ્પિનર એઇડન માર્કરમની આંગળી અને કાંડાની કરામત દેખાડવાની પાક્કી તૈયારી સાથે સાઉથ આફ્રિકાની ટીમ ભારત આવી હતી અને ધાર્યું પરિણામ બતાડી જ દીધું.

પચીસ વર્ષે પહેલી વખત ભારતમાં ટેસ્ટ-શ્રેણી જીતવાની સિદ્ધિ મેળવવાનું તેમનું લક્ષ્ય હતું અને એ તેઓ 2-0ના વાઇટવૉશ સાથે મેળવીને રહ્યા. આ પહેલાં 2000ની સાલમાં હન્સી ક્રૉન્યેના સુકાનમાં ભારતમાં સાઉથ આફ્રિકનો ટેસ્ટ-શ્રેણી જીત્યા હતા અને ટેમ્બા બવુમાની સિદ્ધિ સાથે હવે ક્રૉન્યેનો આત્મા જ્યાં પણ હશે ત્યાં જરૂર આનંદ અનુભવી રહ્યો હશે.

આ પણ વાંચો: સ્પોર્ટ્સમૅનઃ બોપન્નાની નિવૃત્તિ: ભારતીય ટેનિસના સુવર્ણ યુગનો અંત

પંતની માફી, પણ હવે પરચો બતાવશે ખરો?

રિષભ પંતે ટેસ્ટ-શ્રેણીના પતન બદલ ફૅન્સની માફી માગતાં કહ્યું છે કે `અમે તમારા બધાની અપેક્ષા પર ખરા ન ઊતરી શક્યા એ બદલ તમારી માફી માગું છું.’ જોકે હવે વન-ડે શ્રેણીમાં રમવાની તક મળે તો રિષભ પંતે પરચો દેખાડીને સુપર પર્ફોર્મન્સથી ટેસ્ટની કચાશ ભુલાવી દેવાની છે.

રોહિત-કોહલી પર સૌની નજર

રોહિત શર્મા અને વિરાટ કોહલી ટેસ્ટ અને ટી-20 ઇન્ટરનૅશનલ છોડી ચૂક્યા છે. હવે ફક્ત વન-ડે જ રમે છે અને સાઉથ આફ્રિકા સામેની આગામી ઓડીઆઇ (વન-ડે ઇન્ટરનૅશનલ) સિરીઝ તેમની કરીઅરની છેલ્લી સિરીઝ હશે કે પછી 2027ના વર્લ્ડ કપ સુધી કારકિર્દીને ખેંચવા મક્કમ હશે એ તો આવનારા કેટલાક દિવસોમાં ખબર પડી જશે, પણ અત્યારે તેમનું એકમાત્ર મિશન ભારતને સાઉથ આફ્રિકા સામેની વન-ડે સિરીઝમાં એવી રીતે જિતાડવાનું છે કે નંબર-વનની રૅન્ક પર ટીમ ઇન્ડિયા વધુ મજબૂતી મેળવે.

કે. એલ. રાહુલ માટે નવો પડકાર

શુભમન ગિલની કોલકાતાની પ્રથમ ટેસ્ટમાં ગરદન ખેંચાઈ ગઈ એને પગલે સાઉથ આફ્રિકા સામેની બાકીની ટેસ્ટ-સિરીઝમાં રિષભ પંતને ભારતનો 38મો ટેસ્ટ-સુકાની બનવાનો અવસર મળી ગયો હતો. તે એ નવી જવાબદારીમાં સદંતર નિષ્ફળ ગયો એ વાત અલગ છે, પણ વર્લ્ડ ચૅમ્પિયન ટીમ સામે અચાનક નેતૃત્વ સંભાળવાનો બોજ આવી પડે તો નિષ્ફળતાની સંભાવના વધુ હોય છે અને એવું જ થયું. પંત ન તો કોલકાતાની પ્રથમ ટેસ્ટ જિતાડી શક્યો અને ન ભારતને 0-2ના વાઇટવૉશથી બચાવી શક્યો. હવે સુકાનની જવાબદારીમાં કે. એલ. રાહુલે ખરા ઊતરવાનું છે.

ગિલને થોડા મહિના પહેલાં જ ટેસ્ટ અને વન-ડે બન્નેના નેતૃત્વની સંયુક્ત જવાબદારી મળી, પરંતુ ગરદનની ઈજાએ તેને ઘરમાં બેસાડી દીધો છે. સાઉથ આફ્રિકા સામેની વન-ડે શ્રેણીમાં રાહુલે એમએસ ધોનીની માફક બૅટિંગ તથા વિકેટકીપિંગ ઉપરાંત કૅપ્ટન્સીની જવાબદારીમાં સફળ થવાનું છે અને ભારતને જિતાડવાનું છે. તેના માટે આ નવો પડકાર છે. આ શ્રેણી પછી સાઉથ આફ્રિકા સામેની ટી-20 સિરીઝમાં સૂર્યકુમાર યાદવના સુકાનની પરીક્ષા થશે.

આ પણ વાંચો: સ્પોર્ટ્સમૅનઃ સિલેક્શન કમિટી ટીમ પસંદ કરી લે પછી વિદેશ પ્રવાસમાં એનું શું કામ?

બન્ને દેશની વન-ડે ટીમમાં કોણ-કોણ છે

ભારત
કે. એલ. રાહુલ (કેપ્ટન, વિકેટકીપર), રોહિત શર્મા, યશસ્વી જયસ્વાલ, વિરાટ કોહલી, તિલક વર્મા, રિષભ પત (વિકેટકીપર), ઋતુરાજ ગાયકવાડ, રવીન્દ્ર જાડેજા, વૉશિગ્ટન સુદર, કુલદીપ યાદવ, નીતીશકુમાર રેડ્ડી, ધ્રુવ જુરેલ, હર્ષિત રાણા, પ્રસિદ્ધ ક્રિષ્ના અને અર્શદીપ સિહ.

સાઉથ આફ્રિકા
ટેમ્બા બવુમા (કૅપ્ટન), એઇડન માર્કરમ, રાયલ રિકલ્ટન, મૅથ્યૂ બ્રીટ્ઝકે, ડેવાલ્ડ બ્રેવિસ, ક્વિન્ટન ડિકૉક (વિકેટકીપર), ટૉની ડિ ઝોર્ઝી, રુબિન હર્મેન, કૉર્બિન બૉશ્ચ, પ્રેનેલન સુબ્રયેન, ઑટોનીલ બાર્ટમૅન, નૅન્ડે્ર બર્ગર, કેશવ મહારાજ અને લુન્ગી ઍન્ગિડી.