ફોકસ પ્લસ : ડિજિટલ ક્રેઝીનેસનું નવું નામ ઈ-ક્રિકેટ…!

-સાશા શર્મા

આ દિવસોમાં ક્રિકેટની દુનિયામાં વધુ એક તેંડુલકર ચર્ચામાં છે, પરંતુ તે ક્રિકેટ માટે ભગવાન સમાન સચિન તેંડુલકર નહીં પરંતુ તેની પુત્રી સારા તેંડુલકર છે. હા, સારા તેંડુલકર આ દિવસોમાં ચર્ચામાં છે કારણ કે તેણે તાજેતરમાં ગ્લોબલ ઈ-ક્રિકેટ પ્રીમિયર લીગમાં મુંબઈની ફ્રેન્ચાઈઝી ખરીદી છે. સચિન તેંડુલકરની દીકરીએ આ ફ્રેન્ચાઇઝી ડિજિટલ સ્પોર્ટ્સમાં પ્રવેશવા માટે ખરીદી છે. સારાએ કહ્યું કે આ તેના માટે એક સ્વપ્ન સાકાર થવા જેવું છે. સારા તેંડુલકરે ઈન્સ્ટાગ્રામ પર જાહેરાત કરી કે તેણે મુંબઈની ફ્રેન્ચાઈઝી ખરીદી લીધી છે. સવાલ એ છે કે આ ઈ-ક્રિકેટ શું છે અને ઈ-ક્રિકેટ પ્રીમિયમ શું છે અને રમતગમતના માહોલમાં તેનું શું મહત્ત્વ છે કે ક્રિકેટના ભગવાન કહેવાતા સચિન તેંડુલકરની પુત્રી આટલી હદે આ તરફ આકર્ષાય છે.

ઈ-ક્રિકેટ અને ઈ-ક્રિકેટ પ્રીમિયમ

રમતગમતના બદલાતા માહોલમાં નવી ક્રાંતિ આવી રહી છે. હકીકતમાં, જ્યારે આપણે ક્રિકેટ વિશે વાત કરીએ છીએ, ત્યારે આપણને લીલા મેદાનો, ચમકતા સફેદ કપડા અને પ્રેક્ષકોનો અવાજ સંભળાય છે. પરંતુ ડિજિટલ યુગમાં હવે એક નવું મેદાન ઊભરી રહ્યું છે – ઈ-ક્રિકેટનું મેદાન. તે માત્ર ગેમિંગ નથી, પરંતુ એક વૈશ્વિક પ્રતિસ્પર્ધાત્મક રમત બની ગઈ છે. હવે, સારા તેંડુલકર જેવી જાણીતી હસ્તી તેમાં જોડાઇ રહી છે, ત્યારે આ ક્ષેત્રમાં રસ ઝડપથી વધશે એ નક્કી છે.

આ પણ વાંચો: ફોકસ પ્લસ : બોલિવૂડના ફેશન સ્ટાઈલિશ અભિનેતા

ઈ-ક્રિકેટ

ઈ-ક્રિકેટ એ ઈ-સ્પોર્ટ છે જેમાં ખેલાડીઓ સામાન્ય રીતે કોમ્પ્યુટર અથવા ક્ધસોલ ગેમ્સ દ્વારા ડિજિટલ રીતે ક્રિકેટ રમે છે. આ રમત વાસ્તવિક ક્રિકેટના નિયમો અને વ્યૂહરચના પર આધારિત છે, પરંતુ ખેલાડીઓ ફિઝિકલ મેદાનને બદલે સ્ક્રીન પર સ્પર્ધા કરે છે. ભારતમાં અને વિશ્વભરમાં પ્રખ્યાત ‘રિયલ ક્રિકેટ’, ‘વર્લ્ડ ક્રિકેટ ચેમ્પિયનશિપ’ અને ઈએ ક્રિકેટ જેવી રમતો આ ઈ-ક્રિકેટ શ્રેણીમાં આવે છે.

ઈ-ક્રિકેટ પ્રીમિયમ

ઈ-ક્રિકેટ પ્રીમિયમ એ એક નવું અને અત્યાધુનિક પ્લેટફોર્મ કે સેવા છે, જે ઈ-ક્રિકેટને વ્યાવસાયિક સ્તરે લઈ જાય છે. તે સબ્સ્ક્રિપ્શન-આધારિત પ્લેટફોર્મ છે જે ખેલાડીઓને-ખાસ ટૂર્નામેન્ટમાં ભાગ લેવા માટે, લાઇવ સ્ટ્રીમિંગ તકો, બ્રાન્ડ એન્ડોર્સમેન્ટ,પ્રોફેશનલ ટ્રેનિંગ અને ચાહકો સાથે વાતચીત જેવી સુવિધાઓ પૂરી પાડે છે.

આ પ્લેટફોર્મ ખેલાડીઓને નાણાકીય રીતે સશક્ત બનાવે છે, જેથી તેઓ તેને ફૂલ-ટાઇમ કારકિર્દી તરીકે માની શકે.

આ પણ વાંચો: ફોકસ પ્લસ : વિન્ડચામનો મધુર સ્વર લાવે છે ઘરમાં સમૃદ્ધિ

રમતગમતના માહોલમાં ઈ-ક્રિકેટનું મહત્ત્વ

• નવી પેઢીની પસંદગી: યુવાનોને વીડિયો ગેમ્સમાં વધુને વધુ રસ છે અને ઈ-ક્રિકેટ આ લહેરનો એક ભાગ છે. ક્રિકેટને પ્રેમ કરતા યુવાનો હવે તેને નવા રૂપમાં જોઈ રહ્યા છે.
• સુલભતા અને ભાગીદારી: ગામડાઓથી લઈને મોટા શહેરો સુધી, કોઈપણ યુવા હવે ઓનલાઈન પ્લેટફોર્મ પર તેમની પ્રતિભા દર્શાવી શકે છે.
• આવકનો નવો સ્ત્રોત: સ્પોન્સર, બ્રાન્ડ્સ અને સ્ટ્રીમિંગ કંપનીઓ આ ક્ષેત્રમાં રોકાણ કરી રહી છે. તેનાથી રમત જગતમાં નવી આર્થિક તકો ઊભી થઈ રહી છે.
• સર્વસમાવેશકતા: મહિલા ખેલાડીઓ, વિકલાંગ લોકો અને ટેક-સેવી યુવાનો હવે આ રમતમાં પોતાનું સ્થાન બનાવવા માટે સક્ષમ છે, જે પરંપરાગત ક્રિકેટમાં શક્ય ન હતું.

સારા તેંડુલકર, જેનું નામ સચિન તેંડુલકર સાથે જોડાયેલું છે, તે ભલે પોતે પ્રોફેશનલ ખેલાડી ન હોય, પરંતુ તે યુવાનોમાં ખૂબ જ પ્રભાવશાળી વ્યક્તિ બની ગઈ છે. સોશિયલ મીડિયા પર તેના લાખો ફોલોઅર્સ છે અને તે ફેશન અને બ્રાન્ડ એન્ડોર્સમેન્ટની દુનિયામાં જાણીતું નામ છે.

ઈ-ક્રિકેટ પ્રીમિયમની બ્રાન્ડ એમ્બેસેડર

માર્ચ 2025માં, સારા તેંડુલકરને ‘ઈ-ક્રિકેટ પ્રીમિયમ’ની બ્રાન્ડ એમ્બેસેડર તરીકે જાહેર કરવામાં આવી. યુવાનો અને ખાસ કરીને મહિલા પ્રેક્ષકોને આ ક્ષેત્ર સાથે જોડવા માટે આ એક વ્યૂહાત્મક પગલું હતું. લોન્ચ ઈવેન્ટ (મુંબઈ, એપ્રિલ 2025) સારા એ એક ભવ્ય ઈવેન્ટમાં ઈ-ક્રિકેટ પ્રીમિયમના ઈન્ટરફેસ અને ખેલાડીઓના ડિજિટલ અવતારનું અનાવરણ કર્યું. તેનું ડિજિટલ અભિયાન ‘ક્રિકેટ બટ સ્માર્ટર’ વાસ્તવમાં એક સોશિયલ મીડિયા કેમ્પેઈન છે જેમાં સારા બતાવી રહી છે કે કેવી રીતે ટેક્નોલોજી અને ક્રિકેટનું કોમ્બિનેશન યુવાનોને નવી તકો આપી રહ્યું છે. સારાએ *ગર્લ્સ ગોટ ગેમ’ નામની પહેલ શરૂ કરી. સારાએ મહિલા ઈ-ક્રિકેટ ખેલાડીઓ માટે ખાસ ટૂર્નામેન્ટની જાહેરાત કરી છે. તેનો ઉદ્દેશ્ય મહિલાઓની ભાગીદારી વધારવાનો અને લિંગ સમાવિષ્ટતાને પ્રોત્સાહન આપવાનો છે. સારા આ સિરીઝમાં વિવિધ ઈ-ક્રિકેટ ખેલાડીઓ સાથે વાત કરે છે, તેમની જીવનશૈલી, પ્રેક્ટિસ શેડ્યૂલ અને પડકારોને હાઈલાઈટ કરે છે.

આ પણ વાંચો: ફોકસ પ્લસ : ત્રણ વર્ષમાં ચોવીસ હજાર કુપોષિત બાળકોને ઉગાર્યાં વારાણસીના આ આઈએએસ ઍાફિસરે…

ગ્રામીણ વિસ્તારોના યુવાનોને મફત તાલીમ, ગેજેટ્સ અને ઈન્ટરનેટની સુવિધા આપીને ઈ-ક્રિકેટની દુનિયા સાથે જોડવાનું અભિયાન. સારાએ તેના ઉદ્ઘાટનમાં અંગત રીતે ભાગ લીધો હતો. જો આ રીતે જોવામાં આવે તો ઈ-ક્રિકેટ હવે માત્ર મનોરંજન જ નહીં પણ કારકિર્દી, સ્પર્ધા અને નવીનતાનું કેન્દ્ર બની ગયું છે. ડિજિટલ ઈન્ડિયાની આ નવી લહેર છે જે યુવાને જોડી રહી છે, તેમને એક પ્લેટફોર્મ આપી રહી છે અને ટેકનિક સાથે રમતના રોમાંચ સાથે જોડી રહી છે.સારા તેંડુલકર જેવી પ્રતિષ્ઠિત વ્યક્તિત્વના જોડાવાથી આ ક્ષેત્રને જરૂરી કાયદેસરતા અને ગ્લેમર મળી રહ્યું છે, જેની તેને જરૂરત હતી. ‘ઈ-ક્રિકેટ પ્રીમિયમ’ જેવા પ્લેટફોર્મ તેને વ્યાવસાયિક દિશા આપવા માટે કામ કરી રહ્યા છે.

ભવિષ્ય તરફ દૃષ્ટિ

• શું ઈ-ક્રિકેટ ઓલિમ્પિક સ્તરે માન્યતા પ્રાપ્ત કરી શકશે?
  *શું પરંપરાગત ક્રિકેટ સંસ્થાઓ તેને ટેકો આપશે કે તેને હરીફ ગણશે?
• શું ભારત આમાં વૈશ્વિક લીડર બની શકશે?
  આ બધા પ્રશ્નોના જવાબ ભવિષ્યમાં મળશે, પરંતુ એ ચોક્કસ છે કે ઈ-ક્રિકેટ હવે એક સ્થિર અને ઝડપથી વિકસતી રમત બની ગઈ છે – અને તેની પીચ પર સારા તેંડુલકરની હાજરી તેને એક નવી દિશા આપી રહી છે.