(વાણિજ્ય પ્રતિનિધિ તરફથી)
નવી મુંબઈઃ મહારાષ્ટ્રની ખાંડ મિલો પર ગઈકાલે સ્મોલ ગે્રડની ખાંડમાં સ્થાનિક તેમ જ દેશાવરોની માગને ટેકે ટેન્ડરોમાં વેપાર ક્વિન્ટલે રૂ. 10ના સુધારા સાથે રૂ. 3880થી 3930માં થયાના પ્રોત્સાહક અહેવાલ છતાં આજે સ્થાનિક જથ્થાબંધ ખાંડ બજારમાં સ્ટોકિસ્ટોની નવી લેવાલીનો અભાવ અને રિટેલ સ્તરની માગ ખપપૂરતી મર્યાદિત રહેતાં હાજરમાં તેમ જ નાકા ડિલિવરી ધોરણે ઔદ્યોગિક વપરાશકારોની માગને ટેકે ભાવમાં ટકેલું વલણ રહ્યું હતું. નોંધનીય બાબત એ છે કે ગઈકાલે અન્ના પાટિલ જયંતી નિમિત્તે સ્થાનિક બજાર સત્તાવાર ધોરણે બંધ રહી હતી.
બજારનાં સાધનોના જણાવ્યાનુસાર ગઈકાલની રજા બાદ આજે સ્થાનિકમાં આવકો વધીને અંદાજે 33થી 34 ટ્રકની થઈ હતી. જોકે, આજે સ્ટોકિસ્ટોની નવી લેવાલીનો અભાવ અને રિટેલ સ્તરની માગ ખપપૂરતી રહેતાં ઉપાડ અંદાજે 30થી 32 ટ્રકનો રહ્યો હતો, જેમાં સ્મોલ ગે્રડની ખાંડના વેપાર ક્વિન્ટલે રૂ. 4002થી 4062માં અને મિડિયમ ગે્રડની ખાંડના વેપાર ક્વિન્ટલે રૂ. 4062થી 4142માં ગુણવત્તાનુસાર ટકેલા ધોરણે થયા હતા.
વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની છૂટીછવાઈ માગને ટેકે સ્મોલ ગે્રડની ખાંડના વેપાર ક્વિન્ટલે રૂ. 3930થી 3970માં અને મિડિયમ ગે્રડની ખાંડના ખાંડના વેપાર રૂ. 3980થી 4020માં ટકેલા ધોરણે થયાના અહેવાલ હતા.
આ પણ વાંચો…ખાંડમાં ખપપૂરતાં કામકાજો ટકેલું વલણ ઑક્ટોબરનાં મુક્ત વેચાણ માટે 24 લાખ ટન ખાંડ છૂટી કરાઈ
