(વાણિજ્ય પ્રતિનિધિ તરફથી)
મુંબઈઃ સ્થાનિક ઈક્વિટી માર્કેટમાં વિદેશી સંસ્થાકીય રોકાણકારોની અવિરત વેચવાલી અને ડૉલર ઈન્ડેક્સમાં મજબૂત વલણ રહ્યું હોવાથી આજે સ્થાનિક ફોરેક્સ માર્કેટમાં ડૉલર સામે રૂપિયો સાંકડી વધઘટે અથડાઈને ચાર પૈસાના ઘટાડા સાથે 88.77ના મથાળે બંધ રહ્યો હતો. જોકે, આજે વિશ્વ બજારમાં બે્રન્ટ ક્રૂડતેલના વાયદામાં ભાવઘટાડો અને સ્થાનિક ઈક્વિટી માર્કેટમાં સુધારાતરફી વલણ રહ્યું હોવાથી રૂપિયામાં ધોવાણ મર્યાદિત રહ્યું હોવાનું ફોરેક્સ ટ્રેડરોએ જણાવ્યું હતું.
આજે સ્થાનિકમાં ડૉલર સામે રૂપિયો ગઈકાલના 88.74ના બંધ સામે સાધારણ સુધારા સાથે 88.72ના મથાળે ખૂલ્યા બાદ સત્ર દરમિયાન નીચામાં 88.79 અને ઉપરમાં 88.72ની રેન્જમાં રહ્યા બાદ અંતે ગઈકાલના બંધ સામે ત્રણ પૈસાના ઘટાડા સાથે 88.77ના મથાળે રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયામાં પાંચ પૈસાનો સુધારો જોવા મળ્યો હતો.
પ્રાપ્ત અહેવાલ અનુસાર સરકારી ફંડ માટે અમેરિકી સેનેટે ફરી વખત ડેમાક્રેટિક અને રિપબ્લિકનના પ્રસ્તાવને નકારી કાઢ્યા હોવાથી ગવર્મેન્ટ શટડાઉને છઠ્ઠા સત્રમાં પ્રવેશ કર્યો હોવાથી ટ્રેડરોએ ડૉલરમાં નવી લે-વેચમાં સાવચેતીનો અભિગમ અપનાવ્યો હતો.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.34 ટકા વધીને 98.13 આસપાસ ક્વૉટ થઈ રહ્યો હોવાથી તેમ જ ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 313.77 કરોડની ચોખ્ખી વેચવાલી રહી હોવાથી રૂપિયો દબાણ હેઠળ રહ્યો હતો.
તેમ છતાં આજે વિશ્વ બજારમાં બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.37 ટકા ઘટીને બેરલદીઠ 65.25 ડૉલર આસપાસ ક્વૉટ થઈ રહ્યા હોવાથી તેમ જ આજે બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 136.63 પૉઈન્ટનો અને 30.65 પૉઈન્ટનો સુધારો આવ્યો હોવાથી રૂપિયામાં ઘટાડો મર્યાદિત રહ્યો હોવાનું સૂત્રોએ ઉમેર્યું હતું.
