સ્થાનિક સંસ્થાઓની ચૂંટણી પહેલાં મહારાષ્ટ્ર કેબિનેટે એક જ દિવસમાં 21 નિર્ણયો લીધા…
(અમારા પ્રતિનિધિ તરફથી)
મુંબઈ: સ્થાનિક સંસ્થાઓની ચૂંટણી નજીક આવી રહી છે, મહારાષ્ટ્ર કેબિનેટે મંગળવારે નગર પરિષદ અને નગરપંચાયતોની ચૂંટણીના કાર્યક્રમ જાહેર થવા પહેલાં 21 નિર્ણયો લીધા, જે એક જ બેઠક માટે અસામાન્ય માનવામાં આવે છે, જેમાં રાજ્યની સંપત્તિ પુનર્નિર્માણ કંપની, મહા આર્ક લિમિટેડને બંધ કરવાનો પણ સમાવેશ થાય છે.
મુખ્ય પ્રધાનની કચેરી કાર્યાલય દ્વારા જારી કરાયેલા સત્તાવાર નિવેદન અનુસાર, મુખ્ય પ્રધાન દેવેન્દ્ર ફડણવીસની અધ્યક્ષતામાં મળેલી કેબિનેટની બેઠકમાં મહા આર્ક લિમિટેડને બંધ કરવાના નાણાં વિભાગના પ્રસ્તાવને મંજૂરી આપવામાં આવી હતી.
કેન્દ્રની રાષ્ટ્રીય સંપત્તિ પુનર્નિર્માણ કંપનીના મોડેલ પર આધારિત આ કંપનીની સ્થાપના સપ્ટેમ્બર 2022માં કરવામાં આવી હતી, પરંતુ 2023માં રિઝર્વ બેંકે તેને લાઇસન્સ આપવાનો ઇનકાર કર્યો હોવાથી તે કામગીરી શરૂ કરી શકી ન હતી.
કેબિનેટે વિરાર-અલીબાગ મલ્ટી-મોડલ કોરિડોર પ્રોજેક્ટ માટે હુડકો પાસેથી લોન મેળવવા માટે રાજ્ય ગેરંટીને પણ મંજૂરી આપી હતી. મહારાષ્ટ્ર રાજ્ય માર્ગ વિકાસ નિગમ (એમએસઆરડીસી) જાહેર બાંધકામ વિભાગ હેઠળ જમીન સંપાદન માટે ભંડોળનો ઉપયોગ કરશે.
ઉચ્ચ અને ટેકનિકલ શિક્ષણ ક્ષેત્રમાં, કેબિનેટે નાગપુર યુનિવર્સિટી સાથે જોડાયેલી નાગપુરમાં લક્ષ્મીનારાયણ ઇન્સ્ટિટ્યૂટ ઓફ ટેકનોલોજીને 2025-26 થી 2029-30 સુધીના પાંચ વર્ષના સમયગાળા માટે સાત કરોડ રૂપિયાના વાર્ષિક ભંડોળને મંજૂરી આપી છે.
ચંદ્રપુર જિલ્લાના મુલમાં 300 વિદ્યાર્થીઓની ક્ષમતા ધરાવતી એક નવી સરકારી પોલિટેકનિક પણ સ્થાપવામાં આવશે, સાથે જ 39 શૈક્ષણિક અને 42 બિન-શૈક્ષણિક પદોનું નિર્માણ કરવામાં આવશે. મહેસૂલ વિભાગે સોલાપુરના કુંભારી ખાતે એક આવાસ પ્રોજેક્ટ માટે અપાર્જિત આવક, પ્રીમિયમ અને બિન-કૃષિ કરમાંથી મુક્તિ આપી છે, જ્યાં બિનસંગઠિત કામદારો માટે પ્રધાનમંત્રી આવાસ યોજના હેઠળ 30,000 ઘરો બનાવવામાં આવશે.
વાશિમ જિલ્લાના વૈગાંવ ખાતે 1.52 હેક્ટર જમીન સ્થાનિક ગ્રામ પંચાયતને યાત્રાળુઓના આરામ ગૃહ અને સંબંધિત સુવિધાઓના નિર્માણ માટે મફત ફાળવવામાં આવશે. સરકારે મુંબઈના બાંદ્રામાં ભાડે આપેલા સરકારી પ્લોટની બાજુમાં 395 ચોરસ મીટરના પ્લોટ પર નજીવા ભાડા પર સુવિધાઓ પૂરી પાડવાની પણ મંજૂરી આપી છે.
મહારાષ્ટ્ર જમીન મહેસૂલ સંહિતા, 1966માં બિન-કૃષિ મૂલ્યાંકન અને પરવાનગીઓ સંબંધિત જોગવાઈઓ માટે સુધારાઓને મંજૂરી આપવામાં આવી છે. કેબિનેટે પુણે જિલ્લના ઘોડાનદી ખાતે જિલ્લા અને વધારાની સત્ર અદાલત, સિવિલ કોર્ટ (વરિષ્ઠ વિભાગ) અને સરકારી વકીલની કચેરીની સ્થાપનાને મંજૂરી આપી છે. છત્રપતિ સંભાજીનગરના પૈઠણ ખાતે સિવિલ જજ (વરિષ્ઠ વિભાગ) કોર્ટ માટે જગ્યાઓ બનાવવાને પણ મંજૂરી આપી છે.
ગ્રામ પંચાયત કર્મચારીઓ માટે પગારની ચુકવણી સાથે જોડાયેલ કર વસૂલાત માટેની શરતોને સરળ બનાવવાના ગ્રામીણ વિકાસ વિભાગના પ્રસ્તાવને મંજૂરી આપવામાં આવી છે, જેમાં કર્મચારીઓને વહીવટી રાહત આપવામાં આવી છે.
માછીમારો, મત્સ્ય ખેડૂતો અને મત્સ્ય ઉદ્યોગસાહસિકોને ટૂંકા ગાળાની કાર્યકારી મૂડી લોન પર ચાર ટકા વ્યાજ સબવેન્શન આપવાના મત્સ્ય વિભાગના પ્રસ્તાવને પણ મંજૂરી આપવામાં આવી છે. મત્સ્ય ઉદ્યોગને કૃષિ સમકક્ષ દરજ્જો આપવાના નિર્ણયને પગલે આ લાભ મળશે, એમ જણાવવામાં આવ્યું હતું.
લઘુમતી વિકાસ વિભાગમાં, શ્રી ગુરુ તેગ બહાદુર સાહેબજીની 350મી શહીદ જયંતિની ઉજવણી માટે રાજ્યભરમાં કાર્યક્રમોનું આયોજન કરવા માટે રૂ. 94.35 કરોડને મંજૂરી આપી છે, જે ‘હિંદ-કી-ચાદર’ નામના કાર્યક્રમ હેઠળ યોજાશે. આ કાર્યક્રમો નાંદેડ, નાગપુર, રાયગઢ અને અન્ય જિલ્લાઓમાં યોજાશે.
સામાન્ય વહીવટ વિભાગ હેઠળ પ્રસ્તાવિત મહારાષ્ટ્ર જન વિશ્ર્વાસ વટહુકમ, 2025ની જોગવાઈઓમાં સુધારો કરવાને મંજૂરી આપી હતી. જાહેર આરોગ્ય વિભાગ હેઠળ શ્રેણીબદ્ધ નિર્ણયો લેવામાં આવ્યા, જેમાં આયુષ્માન ભારત-પ્રધાનમંત્રી જન આરોગ્ય યોજના અને મહાત્મા જ્યોતિરાવ ફૂલે જન આરોગ્ય યોજના હેઠળ ક્ષેત્ર-સ્તરીય કામદારો માટે માનદ વેતન વધારવાની મંજૂરીનો સમાવેશ થાય છે.
તેમણે આરોગ્ય સેવાઓની પહોંચ સુધારવા માટે આ યોજનાઓ હેઠળ ઉપલબ્ધ સારવારની યાદીમાં સુધારાઓને પણ મંજૂરી આપી. આરોગ્યસંભાળ વ્યવસ્થાપનમાં વિકેન્દ્રીકરણને પ્રોત્સાહન આપવા માટે શહેરી આરોગ્ય નિયામકમંડળની સ્થાપનાને પણ મંજૂરી આપવામાં આવી હતી.
કેબિનેટે 14 માર્ચ, 2024 સુધીમાં દસ વર્ષની સેવા પૂર્ણ કરી ચૂકેલા રાષ્ટ્રીય આરોગ્ય મિશન હેઠળ કરાર આધારિત કર્મચારીઓને નિયમિત કરવા માટે પણ મંજૂરી આપી હતી. આ હેતુ માટે જાહેર આરોગ્ય અને ગ્રામીણ વિકાસ વિભાગો હેઠળ સમાન નિયમિત જગ્યાઓ બનાવવામાં આવશે.
પરશુરામ આર્થિક વિકાસ નિગમ, વીર શિરોમણી મહારાણા પ્રતાપ આર્થિક વિકાસ નિગમ અને શ્રી વાસવી ક્ધયાકા આર્થિક વિકાસ નિગમની યોજનાઓને મંજૂરી આપવામાં આવી હતી. તબીબી શિક્ષણ અને દવા વિભાગને જરૂરી નાણાકીય જોગવાઈ સાથે બારામતીમાં પુણ્યશ્લોક અહિલ્યાદેવી હોલકર સરકારી મેડિકલ કોલેજમાં પાંચ એસોસિયેટ પ્રોફેસર પદો બનાવવાની મંજૂરી આપવામાં આવી હતી.
સરકારે વર્ધા શહેરના રામનગર ખાતે રહેણાંક પ્લોટના ભાડાપટ્ટે માલિકને કાયમી માલિકી હકો આપવા માટે પણ મંજૂરી આપી હતી, જે નગર વિકાસ વિભાગ દ્વારા રજૂ કરાયેલ પ્રસ્તાવ હતો.
