અમદાવાદ: ગુજરાતમાં રવિ ઋતુના વાવેતર સમયે જ ખાતરની અછત હોય તેવા અહેવાલો સામે આવ્યા હતા. આ મુદ્દે વિરોધ પક્ષે સરકાર સામે અનેક પ્રશ્નો ઉઠાવ્યા હતા ત્યારે હવે સરકારે આ મામલે પ્રતિક્રિયા આપી છે અને કહ્યું કે ખેડૂતોને સમયસર અને પૂરતા પ્રમાણમાં ખાતર મળી રહે તે માટે રાજ્ય સરકાર દ્વારા ખાતર વિતરણનું સુદ્રઢ આયોજન કરવામાં આવ્યું છે.
ખેતી નિયામકની કચેરીએ સ્પષ્ટતા કરી છે કે હાલ રાજ્યમાં ખાતરનો પૂરતો જથ્થો ઉપલબ્ધ છે, જેથી ખેડૂતોએ સહેજ પણ ચિંતા કરવાની જરૂર નથી. ભારત સરકારે રવિ ઋતુ માટે રાજ્યને જરૂરિયાત મુજબનો ખાતરનો જથ્થો ફાળવ્યો છે. હાલમાં રાજ્યભરમાં ૨.૦૮ લાખ મેટ્રિક ટન યુરીયા અને ૪૯ હજાર મેટ્રિક ટન ડી.એ.પી.નો જથ્થો ખેડૂતો માટે ઉપલબ્ધ છે. ખેતી નિયામકની કચેરીએ ખેડૂતોને ખોટી અફવાઓથી ન પ્રેરાવા અને માત્ર જરૂરિયાત મુજબ જ ખાતર ખરીદવા અનુરોધ કર્યો છે, જેથી બિનજરૂરી ખરીદી ટાળી શકાય.
ખેતી નિયામક કચેરીએ જણાવ્યું હતું કે, રાજ્યના દરેક જિલ્લાની જરૂરિયાતને ધ્યાનમાં રાખીને સપ્લાય પ્લાન મુજબ ખાતરનો જથ્થો વિવિધ જિલ્લાઓમાં વિતરણ કરવામાં આવી રહ્યો છે. છેલ્લા ત્રણ દિવસમાં જ આશરે ૧૨,૫૦૦ મેટ્રિક ટન યુરીયા ખાતર રેલવે રેકના માધ્યમથી વિવિધ જિલ્લાઓમાં સપ્લાય કરવામાં આવ્યું છે, અને હાલ જુદા-જુદા ૭ રેક પોઈન્ટથી યુરીયા ખાતરનો સપ્લાય ચાલુ છે. એટલું જ નહીં, આગામી એક અઠવાડિયામાં પણ અંદાજે ૨૨,૦૦૦ મેટ્રિક ટન યુરિયા ખાતરનો સપ્લાય કરવા માટે સૂચનાઓ આપી દેવામાં આવી છે.
ભારત સરકારે ચાલુ રવિ ઋતુ (ઓક્ટોબર-૨૦૨૫ થી માર્ચ-૨૦૨૬) માટે ગુજરાતને યુરીયા ખાતર કુલ ૧૩.૯૦ લાખ મેટ્રિક ટન અને ડી.એ.પી. ખાતરના ૨.૯૦ લાખ મેટ્રિક ટન જથ્થાની ફાળવણી મંજૂર કરી છે. તેમાંથી અત્યાર સુધીમાં ૫.૪૮ લાખ મેટ્રિક ટનથી વધુ યુરીયા અને ૨.૧૮ લાખ મેટ્રિક ટનથી વધુ ડી.એ.પી. ખાતર રાજ્યમાં ઉપલબ્ધ થઈ ચૂક્યું છે. ચાલુ રવિ સીઝન દરમિયાન અત્યાર સુધીમાં ખેડૂતો દ્વારા કુલ ૩.૪૪ લાખ મેટ્રિક ટનથી વધુ યુરીયા અને ૧.૬૮ લાખ મેટ્રિક ટનથી વધુ ડી.એ.પી. ખાતરનો વપરાશ કરવામાં આવ્યો છે.
આપણ વાંચો: વડોદરામાં JP નડ્ડાના મંચની સામે SPG કમાન્ડો ઢળી પડ્યો, છતાં નેતાઓના પેટનું પાણી ન હલ્યું!
