ગડકરી-રૂપાણીના ભૂતકાળના કિસ્સા યાદ કરીને લોકોએ નેતાઓને આડે હાથ લીધા
વડોદરા: શાસક ભારતીય જનતા પાર્ટી (BJP)ના રાષ્ટ્રીય અધ્યક્ષ અને કેન્દ્રીય પ્રધાન જે.પી. નડ્ડાના વડોદરામાં યોજાયેલા કાર્યક્રમ દરમિયાન એક ચોંકાવનારી ઘટના સામે આવી હતી. શનિવારે જ્યારે નડ્ડાનું ભાષણ લગભગ પૂરું થવા આવ્યું હતું, ત્યારે સ્ટેજની બરાબર સામે જ સુરક્ષામાં તૈનાત એક કમાન્ડો અચાનક બેહોશ થઈને ઢળી પડ્યો હતો. આ કમાન્ડો કેન્દ્રીય રેલ્વે અને ખાદ્ય પ્રસંસ્કરણ ઉદ્યોગ રાજ્ય પ્રધાન રવનીત સિંહ બિટ્ટુ સાથે જોડાયેલો હોવાનું જાણવા મળ્યું છે, જેઓ પોતે પણ મંચ પર હાજર હતા.
સૌથી આશ્ચર્યજનક બાબત એ રહી કે કમાન્ડો બેહોશ થયા છતાં મંચ પર હાજર જે.પી. નડ્ડા સહિતના અન્ય તમામ નેતાઓએ પોતાના ભાષણ અને પ્રવૃત્તિઓ ચાલુ રાખી હતી. કોઈ પણ નેતાએ ભાષણમાં વિરામ લીધો નહોતો કે સ્થળ પર હાજર સ્ટાફને મદદ કરવા માટે કોઈ સૂચના પણ આપી નહોતી. જોકે, ત્યાં હાજર ફોટોગ્રાફરો અને અન્ય સુરક્ષાકર્મીઓ તાત્કાલિક કમાન્ડોની મદદે દોડી આવ્યા હતા અને તેમને મેડિકલ સહાય માટે નજીકની હોસ્પિટલમાં ખસેડવામાં આવ્યા હતા. પ્રારંભિક માહિતી મુજબ, કમાન્ડો લાંબા સમય સુધી સતત ઊભા રહેવાને કારણે થાક અથવા અન્ય શારીરિક અસ્વસ્થતાને લીધે બેહોશ થયા હતા.
ભાષણ અટકાવવાની પણ તસ્દી ન લીધી
આ ઘટનાનો વીડિયો સોશિયલ મીડિયા પર વાયરલ થતાં જ યુઝર્સે મંચ પરના નેતાઓના વર્તનની આકરી ટીકા કરી હતી. સોશિયલ મીડિયા યુઝર્સે નેતાઓના આ વર્તનને ‘સંવેદનહીન’ ગણાવ્યું હતું, કારણ કે કોઈ પણ નેતાએ કમાન્ડોની મદદે દોડી જવાની કે ભાષણ અટકાવવાની તસ્દી લીધી નહોતી. જોકે, અધિકારીઓએ પાછળથી પુષ્ટિ કરી હતી કે કમાન્ડોની તબિયત સ્થિર છે અને તે હવે સ્વસ્થ છે. ઉલ્લેખનીય છે કે, સરદાર વલ્લભભાઈ પટેલની ૧૫૦મી જન્મજયંતીની ઉજવણીના ભાગરૂપે કરમસદથી શરૂ થયેલી ‘સરદાર @ ૧૫૦ રાષ્ટ્રીય એકતા યાત્રા’ શનિવારે વડોદરા શહેરમાં પ્રવેશી હતી, જેને વિવિધ સંસ્થાઓ અને રહેવાસીઓએ ઉત્સાહથી આવકારી હતી.
એસપીજી કમાન્ડો પ્રત્યે સંવેદના ન જાગી
નેતાઓના આ સંવેદનાહિન વર્તનની આકરી ટીકા થઈ રહી છે. પરંતુ આ દરમિયાન ઉડીને આંખે વળગે તેવી કોઈ વાત હોય તો તે છે કે આ પૂર્વે અનેકવાર કાર્યક્રમોમાં નેતાઓ બેભાન થઈને પડી ગયા હતા ત્યારે તો મંચ પર કાર્યક્રમ રોકીને નેતાઓ તેમજ હાજર લોકો દોડી આવ્યા હતા. પરંતુ અહી તો એસપીજી કમાન્ડો પ્રત્યે તો કોઈને જ સંવેદના ન જાગી!
ગડકરી-રૂપાણીના કિસ્સાની યાદ અપાવી
આ પૂર્વે કેન્દ્રીય પ્રધાન નીતિન ગડકરી મહારાષ્ટ્રમાં એક ચૂંટણી રેલી દરમિયાન બેહોશ થઈ ગયા હતા. ભાજપના વરિષ્ઠ નેતાને તાત્કાલિક સારવાર આપવામાં આવી હતી. થોડીવાર પછી તેઓ સ્ટેજ પર પાછા આવ્યા અને લોકોને સંબોધિત કર્યા. તે પહેલા 15 ફેબ્રુઆરી 2021ના રોજ ગુજરાતના તત્કાલિન મુખ્ય પ્રધાન વિજય રૂપાણી મહાનગર પાલિકાની ચૂંટણીના પ્રચાર માટે વડોદરા પહોંચ્યા હતા. ત્યાં સ્ટેજ પર જ તેની તબિયત અચાનક બગડી અને તે બેભાન થઈને ઢળી પડ્યા હતા.
આપણ વાંચો: ‘દારૂ-ડ્રગ્સના મામલે જો ગંભીર હો તો…’ ગોપાલ ઈટાલીયાએ હર્ષ સંઘવીને પત્ર લખી ફેંક્યો પડકાર
