‘PM મોદી બુદ્ધિશાળી છે, તેમના નેતૃત્વમાં ભારત પ્રગતિ કરી રહ્યું છે’

મોસ્કોઃ રશિયાના રાષ્ટ્રપતિ વ્લાદિમીર પુતિને પીએમ નરેન્દ્ર મોદીની ઘણી વખત પ્રશંસા કરી છે. હવે ફરી એકવાર પુતિને મોદીના વખાણ કર્યા છે. રશિયામાં એક કાર્યક્રમમાં વ્લાદિમીર પુતિને કહ્યું હતું કે મોદી ખૂબ જ બુદ્ધિશાળી વ્યક્તિ છે.પીએમ મોદીના નેતૃત્વમાં ભારત પ્રગતિ કરી રહ્યું છે. તેમણે ભારત અને રશિયા વચ્ચેના સંબંધોની પણ પ્રશંસા કરી હતી. રશિયન રાષ્ટ્રપતિએ કહ્યું હતું કે પીએમ નરેન્દ્ર મોદી અને તેમની વચ્ચે સારા રાજકીય સંબંધો છે. રશિયા અને ભારત દાયકાઓ જૂની મિત્રતા અને પરસ્પર સહયોગની પરંપરાઓ પણ છે.

રશિયાના રાષ્ટ્રપતિ વ્લાદિમીર પુતિને આશા વ્યક્ત કરી હતી કે તેમનો દેશ અને ભારત નાણાકીય સુરક્ષા અને સાયબર અપરાધ સામેની લડાઈમાં સહયોગ કરવાનું ચાલુ રાખશે. નાણાકીય સુરક્ષા અંગે પુતિને કહ્યું હતું કે ભારત અને રશિયાના હિતને ધ્યાનમાં રાખીને આ એજન્ડા પર કામ કરવું જરૂરી છે. તેમણે કહ્યું હતું કે રશિયા અને ભારત નાણાકીય સુરક્ષા સંબંધિત પરિણામો પ્રાપ્ત કરવા માટે કોઈપણ ભૂલ કર્યા વિના આગળ વધશે. આ પહેલા પણ પુતિને મેક ઇન ઇન્ડિયા શરૂ કરવા બદલ પીએમ મોદીની પ્રશંસા કરી હતી. 8મી ઈસ્ટર્ન ઈકોનોમિક ફોરમમાં પુતિને કહ્યું હતું કે પીએમ નરેન્દ્ર મોદીએ મેક ઈન ઈન્ડિયા કાર્યક્રમ ચલાવીને યોગ્ય પગલું ભર્યું છે.

રશિયાના રાષ્ટ્રપતિ વ્લાદિમીર પુતિન અને પીએમ નરેન્દ્ર મોદી વચ્ચે સારી કેમિસ્ટ્રી છે. મોદી પણ પોતાના મનની વાત સીધી પુતિન સાથે કરે છે અને પુતિન પણ તેમની વાત સાંભળે છે. રશિયાની મુલાકાત દરમિયાન મોદીએ વ્લાદિમીર પુતિનને સ્પષ્ટ કહ્યું હતું કે આ યુદ્ધ લડવાનો સમય નથી. મોદી અને પુતિન વચ્ચેના સંબંધો એવા છે કે જ્યારે ભારતીય વિદ્યાર્થીઓ અને નાગરિકોને યુક્રેનમાંથી બહાર કાઢવાના હતા ત્યારે રશિયાએ થોડા કલાકો માટે યુદ્ધવિરામ પણ જાહેર કર્યો હતો.