પુડુચેરી : દેશના શેરબજારોમાં સતત રોકાણકારોની સંખ્યા વધી રહી છે. જેમાં ઓક્ટોબર માસ સુધી દેશના 21 કરોડ ડિમેટ એકાઉન્ટ ખુલી ચુક્યા છે. તેમજ દરરોજ એક લાખ નવા એકાઉન્ટ ખુલી રહ્યા છે. જયારે દેશમાં મ્યુચઅલ ફંડ માર્કેટ પણ રેકોર્ડ તોડી રહ્યું છે. જોકે, આ બધા પાછળ અનેક ભયસ્થાનો રહેલા છે. જે અંગે સેબીના ચેરમેન તુહિન કાંત પાંડેએ લોકોને ચેતવ્યા છે. તેમજ કહ્યું નાણાકીય સાક્ષરતા આજના સમયની જરૂરિયાત બની ચુક્યું છે.
માહિતી વિના રોકાણ કરવું એ જોખમ
પુડુચેરીમાં એનએસઈ દ્વારા આયોજિત પ્રાદેશિક રોકાણકાર જાગૃતિ સેમિનારમાં સેબી ચેરમેન તુહિન કાંત પાંડેએ જણાવ્યું હતું કે નાણાકીય સાક્ષરતા હવે માત્ર એક વિકલ્પ નથી પરંતુ એક જરૂરિયાત છે. તેમણે ભારપૂર્વક જણાવ્યું હતું કે નાણાકીય નિર્ણયો લોકોના રોજિંદા જીવનમાં પહેલા કરતાં વધુ ઊંડાણપૂર્વક જોડાયેલા છે. તેથી માહિતી વિના રોકાણ કરવું એ રોકાણ નથી પરંતુ એક જોખમ છે.
નાના કેન્દ્રમાં પણ બજાર ભાગીદારી ઝડપથી વધી
તુહિન કાંત પાંડેએ જણાવ્યું કે, પુડુચેરી જેવા નાના કેન્દ્રમાં પણ બજાર ભાગીદારી ઝડપથી વધી છે. નાણાકીય વર્ષ 2015 માં ફક્ત 22,000 રોકાણકારો હતા. જે હવે લગભગ 1,24,000 પર પહોંચી ગયા છે. તેમજ વધુ સાક્ષરતા અને ડિજિટલાઈઝેશનના લીધે રોકાણકારો વધ્યા છે.
જેને બજારને નવી ઉર્જા આપી છે.
રાષ્ટ્રીય સ્તરે આ ચિત્ર ખુબ જ વિશાળ
તેમણે જણાવ્યું કે રાષ્ટ્રીય સ્તરે આ ચિત્ર ખુબ જ વિશાળ છે. જેમાં ઓક્ટોબર માસ સુધી દેશના 21 કરોડ ડિમેટ એકાઉન્ટ ખુલી ચુક્યા છે. તેમજ દરરોજ એક લાખ નવા એકાઉન્ટ ખુલી રહ્યા છે. ભારતનું મ્યુચ્યુઅલ ફંડ બજાર રેકોર્ડબ્રેક ગતિએ વધી રહ્યું છે. પરંતુ તેની પાછળ અનેક ભયસ્થાનો પણ છે. મ્યુચ્યુઅલ ફંડ ઉદ્યોગ 10 વર્ષમાં સાત ગણો વધ્યો છે જે હવે રૂપિયા 80 ટ્રિલિયનના આંકને વટાવી ગયો છે.
ફક્ત 36 ટકા રોકાણકારોને શેરબજારનું પૂરતું જ્ઞાન
જોકે, સેબી ચેરમેને જણાવ્યું કે, સેબી ઇન્વેસ્ટર સર્વે 2025 મુજબ ફક્ત 36 ટકા રોકાણકારોને શેરબજારનું પૂરતું જ્ઞાન છે, જ્યારે 62 ટકા હજુ પણ રોકાણ સલાહ માટે મિત્રો, સંબંધીઓ અથવા સોશિયલ મીડિયા પર આધાર રાખે છે. તુહિન કાંત પાંડેએ કહ્યું કે જાગૃતિ અને સમજણ સમાન નથી. માહિતી વિના રોકાણ લોકોને બિનજરૂરી જોખમમાં મૂકે છે.
આ પણ વાંચો…સેબી આઈપીઓના લોક-ઇન નિયમોમાં કરી શકે છે મોટો ફેરફાર, નાના રોકાણકારોને થશે ફાયદો
