ઝિમ્બાબ્વેના બૅટ્સમૅનનો છ બૉલમાં છ ચોક્કાનો વર્લ્ડ રેકૉર્ડઃ ગુજરાતી ખેલાડીએ લીધી વિકેટ

હરારેઃ 2026માં રમાનારા મેન્સ ટી-20 વર્લ્ડ કપમાં નામિબિયા સાથે ક્વૉલિફાય થયેલા ઝિમ્બાબ્વે (Zimbabwe)ના 21 વર્ષીય ઓપનિંગ બૅટ્સમૅન બ્રાયન બેનેટે 72 કલાકમાં બીજો વિશ્વવિક્રમ રચ્યો છે જેમાં તે ટી-20 ઇન્ટરનૅશનલમાં છ બૉલમાં છ ચોક્કા (4, 4, 4, 4, 4, 4) ફટકારનાર વિશ્વનો પહેલો ખેલાડી બન્યો છે. તેણે આ સિદ્ધિ બીજી ઑક્ટોબરે હરારેમાં કેન્યા (Kenya) સામેની વર્લ્ડ કપ ક્વૉલિફિકેશન મૅચમાં હાંસલ કરી હતી. 30મી સપ્ટેમ્બરે બેનેટ ત્રણેય ફૉર્મેટ (ટેસ્ટ, વન-ડે, ટી-20)માં સેન્ચુરી ફટકારનાર સૌથી યુવાન પ્લેયર બન્યો હતો.

ટી-20 આંતરરાષ્ટ્રીય મૅચમાં છ બૉલમાં છ છગ્ગા ફટકારવાનો વિશ્વવિક્રમ યુવરાજ સિંહે કર્યો હતો અને હવે છ ચોક્કાનો વર્લ્ડ રેકૉર્ડ બેનેટના નામે લખાયો છે. જોકે તેણે આ વિક્રમ સહિત કુલ 51 રન કર્યા ત્યાર બાદ ભારતીય મૂળના ગુજરાતી લેફ્ટ-આર્મ સ્પિનર વ્રજ પટેલે તેની વિકેટ લીધી હતી. વ્રજ પટેલે તેને કૅચઆઉટ કરાવ્યો હતો.

બેનેટે (Bennett) છ બૉલમાં છ ફોરની કમાલ કેન્યા સામેની મૅચમાં ચોથી ઓવરમાં કરી દેખાડી હતી. એ ઓવર પેસ બોલર લુકૅસ ઓલૉચ નામના બોલરે કરી હતી. બેનેટની ધમાકેદાર ઇનિંગ્સની મદદથી ઝિમ્બાબ્વેએ 123 રનનો લક્ષ્યાંક 15 ઓવરમાં ત્રણ વિકેટના ભોગે મેળવી લીધો હતો.

આ મૅચ ક્વૉલિફાઇંગ રાઉન્ડની સેમિ ફાઇનલ હતી જેમાં કેન્યાએ પ્રથમ બૅટિંગ લીધી હતી, પરંતુ 20 ઓવરમાં છ વિકેટે માત્ર 122 રન બનતાં ઝિમ્બાબ્વેને 123 રનનો સાધારણ લક્ષ્યાંક મળ્યો હતો. આ 122 રનમાં ભારતીય મૂળના બીજા ખેલાડી રાકેપ પટેલના 65 રન હાઇએસ્ટ હતા.

આપણ વાંચો:  રવીન્દ્ર જાડેજાએ આ બાબતે ધોનીને પાછળ છોડ્યો; હવે પંત અને સેહવાગના રેકોર્ડ પર નજર