નવી દિલ્હીઃ સામાન્ય રીતે કોચ (પ્રશિક્ષક) પાસેથી તાલીમ લઈને ખેલાડી ઉચ્ચ સ્તરે રમવા પૂરતો તૈયાર થઈ જાય છે, પરંતુ યુવરાજ સિંહ (Yuvraj singh)નો અભિપ્રાય કંઈક અનોખો અને રસપ્રદ છે. તેણે કહ્યું છે કે ` હું અભિષેક (Abhishek)ને તાલીમ આપતી વખતે શીખ્યો કે ખરા અર્થમાં કોચ કેવી રીતે બનાય.’
પીટીઆઇના અહેવાલ અનુસાર લૉરિયસ ફાઉન્ડેશન મારફત આયોજિત ચર્ચામાં યુવીએ કહ્યું, ` હું નિવૃત્તિની સંધ્યાકાળે હતો ત્યારે મેં બે યુવાન ખેલાડી અભિષેક શર્મા અને શુભમન ગિલ સાથે મારા અનુભવો શૅર કર્યા હતા. મારા કોચિંગની એ શરૂઆત હતી.’
44 વર્ષના યુવરાજે એવું પણ કહ્યું છે કે ` છેલ્લા થોડા વર્ષોથી અભિષેક શર્મા સાથે કામ કરતી વખતે (તેને તાલીમ આપતી વખતે) હું કોચિંગ (coaching) અને મેન્ટરશિપના પાઠ શીખ્યો હતો. હું એવું બધુ શીખ્યો જેનાથી હું મારા યુવાનીના દિવસોમાં વંચિત રહ્યો હતો.’
યુવરાજે કહ્યું, ` કોઈ ટૅલન્ટને બહાર લાવવામાં કેવી રીતે મદદરૂપ થવું એ હું બરાબર શીખ્યો છું. તાલીમને લગતા મારા કાર્યક્રમો અને લક્ષ્યાંકો માટે તેણે (અભિષેકે) જે મહેનત કરી હતી એના પરિણામ હવે તેના પર્ફોર્મન્સમાં જોવા મળી રહ્યા છે.’
યુવીએ ખાસ કરીને લૉકડાઉન દરમ્યાન ચંડીગઢમાં પોતાના નિવાસસ્થાને અભિષેકને અને તેના ખાસ મિત્ર શુભમનને તાલીમ આપી હતી.
આ પણ વાંચો…`શામ કો પાર્ટી ઔર ગર્લફ્રેન્ડ…’: યુવરાજ સિંહે કેવી રીતે અભિષેક શર્માને લાઇન પર લાવી દીધો!
