મીરપુર (બાંગ્લાદેશ): અહીં બાંગ્લાદેશ સામેની બીજી વન-ડેમાં વેસ્ટ ઇન્ડિઝ (West Indies)ની ટીમે અજબ વિશ્વવિક્રમ રચ્યો હતો. વન-ડે ક્રિકેટ 1971ની સાલથી રમાય છે અને એમાં ક્યારેય કોઈ એક મૅચમાં પૂરી 50 ઓવર સ્પિનર્સે નહોતી કરી, પરંતુ વન-ડેના 54 વર્ષના ઇતિહાસમાં આવું પહેલી વાર બન્યું છે. બાંગ્લાદેશની ઇનિંગ્સમાં તમામ 50 ઓવર વેસ્ટ ઇન્ડિઝના સ્પિનર્સે (Spinners) પૂરી કરી હતી.
શેર-એ-બંગ્લાની પિચ સ્પિનર્સને વધુ ફાયદો કરાવનારી હતી અને એના પર 50 ઓવર પૂરી કરનાર આ પાંચ કૅરિબિયન સ્પિનર્સમાં લેફ્ટ-આર્મ સ્પિનર અકીલ હોસૈન, ઑફ-સ્પિનર રૉસ્ટન ચેઝ, લેફ્ટ-આર્મ સ્પિનર ખેરી પીએર, લેફ્ટ-આર્મ સ્પિનર ગુડાકેશ મૉટી અને ઑફ-સ્પિનર અલિક ઍથાનેઝનો સમાવેશ હતો. મિડિયમ પેસ બોલર જસ્ટિન ગ્રીવ્ઝ ટીમમાં હતો, પરંતુ કૅપ્ટન શાઇ હોપે માત્ર સ્પિનર્સ પર જ ભરોસો રાખ્યો હતો. તમામ સ્પિનર્સ સામે બાંગ્લાદેશના બૅટ્સમેનો સહેલાઈથી નહોતા રમી શક્યા.
આપણ વાંચો: સ્મૃતિ મંધાનાએ વન-ડેમાં છ વર્ષે ફરી મેળવી અનેરી સિદ્ધિ
બંગ્લાદેશની ટીમે પ્રથમ બૅટિંગ લીધી હતી અને 50 ઓવરમાં સાત વિકેટે 213 રન કર્યા હતા. ચેઝ અને પીએરને વિકેટ નહોતી મળી, પરંતુ મૉટીએ ત્રણ તેમ જ હોસૈન અને ઍથાનેઝે બે-બે વિકેટ લીધી હતી.
બાંગ્લાદેશ વતી સૌથી વધુ રન ઓપનર સૌમ્ય સરકારે (89 બૉલમાં 45 રન) કર્યા હતા. કૅરિબિયન સ્પિનર્સ સામે બાંગ્લાદેશનો એક પણ બૅટ્સમૅન હાફ સેન્ચુરી નહોતો કરી શક્યો.
