નવી દિલ્હીઃ ICC ODI વર્લ્ડ કપ 2023માં ભારતને ઓસ્ટ્રેલિયાના હાથે કારમી હારનો સામનો કરવો પડ્યો હતો. ભારતની હાર સાથે કરોડો ભારતીય ચાહકોનું વર્લ્ડ ચેમ્પિયન બનવાનું સપનું પણ ચકનાચૂર થઈ ગયું. પરંતુ ICC ODI વર્લ્ડ કપ 2023માં ટીમ ઈન્ડિયાનું પ્રદર્શન શાનદાર રહ્યું હતું. હવે વર્લ્ડ કપ 2023માં શાનદાર પ્રદર્શન કરનાર વિરાટ કોહલીએ પોતાના નિર્ણયથી ક્રિકેટ ચાહકોને ચોંકાવી દીધા છે. કિંગ કોહલીએ દક્ષિણ આફ્રિકાના પ્રવાસ પર સફેદ બોલ (ODI-T20)ની ક્રિકેટ શ્રેણી રમવાનો ઇનકાર કરી દીધો છે. રિપોર્ટ અનુસાર કોહલીએ ODI-T20થી બ્રેક લેવાનો નિર્ણય કર્યો છે અને તેણે ભારતીય ક્રિકેટ કંટ્રોલ બોર્ડ (BCCI)ને જાણ કરી છે.
પૂર્વ ભારતીય કેપ્ટન કિંગ કોહલી સફેદ બોલની ક્રિકેટ રમતા જોવા મળશે કે નહીં તેની હજુ સુધી કોઈ માહિતી નથી. રિપોર્ટ અનુસાર, કોહલીએ BCCI અને પસંદગી સમિતિને કહ્યું છે કે તે ODI-T20 ક્રિકેટ માટે ક્યારે ઉપલબ્ધ થશે તેની માહિતી તે પોતે આપશે. આવી સ્થિતિમાં, કિંગ કોહલીના ચાહકોએ પણ અનુમાન લગાવવાનું શરૂ કરી દીધું છે કે કદાચ વિરાટે પોતાને ODI-T20 ક્રિકેટથી દૂર રાખવાનું શરૂ કરી દીધું છે.
વર્લ્ડકપમાં ભારતીય ટીમની કમાન સંભાળનાર રોહિત શર્મા તરફથી હજુ સુધી આવું કોઈ નિવેદન સામે આવ્યું નથી. આ દિવસોમાં વિરાટ કોહલી અને રોહિત શર્મા તેમના પરિવાર સાથે લંડનમાં છે. એવામાં જો રોહિત શર્મા પણ આફ્રિકા સામે ODI-T20 ફોર્મેટમાં રમવાનો ઇનકાર કરે છે, તો કેએલ રાહુલને ટીમની કમાન સોંપવામાં આવી શકે છે. તમને જણાવી દઈએ કે ભારતીય ટીમને દક્ષિણ આફ્રિકા સાથે 3 મેચની T-20 શ્રેણી રમવાની છે. આ પછી બંને ટીમો વચ્ચે 3 મેચની ODI સિરીઝ અને અંતે 2 ટેસ્ટ મેચની સિરીઝ રમાશે.
વિરાટ કોહલીએ આ વર્લ્ડ કપમાં શાનદાર પ્રદર્શન કર્યું છે. તેણે 11 ઇનિંગ્સમાં કુલ 765 રન બનાવ્યા છે જે એક વર્લ્ડ રેકોર્ડ છે. આ પહેલા વર્લ્ડ કપમાં સૌથી વધુ રન બનાવવાનો રેકોર્ડ સચિન તેંડુલકરના નામે હતો, જેણે 2003માં 11 મેચ રમીને 673 રન બનાવ્યા હતા.