વિરાટની 83મી આંતરરાષ્ટ્રીય સદી, ફિફ્ટી-પ્લસની રેકૉર્ડ-બુકમાં સચિનને પાછળ રાખી દીધો
રાંચીઃ વિરાટ કોહલી (Virat Kohli)એ વન-ડે ફૉર્મેટમાં બાવનમી સેન્ચુરી ફટકારીને પોતાના વિશ્વવિક્રમને વધુ મજબૂત કર્યો છે અને તેણે એક રેકૉર્ડ-બુકમાં સચિન તેન્ડુલકરને પાછળ રાખી દીધો છે. આંતરરાષ્ટ્રીય ક્રિકેટમાં વિરાટની 83 સેન્ચુરી થઈ છે. જોકે સચિન (Sachin)ની 100 ઇન્ટરનૅશનલ સેન્ચુરીના વર્લ્ડ રેકૉર્ડથી તે હજી ઘણો દૂર છે.
સાઉથ આફ્રિકા સામેની પ્રથમ વન-ડેમાં બૅટિંગ મળ્યા પછી વિરાટ અને રોહિત શર્મા (57 રન, 51 બૉલ, ત્રણ સિક્સર, પાંચ ફોર) વચ્ચેની બીજી વિકેટ માટેની 136 રનની ધમાકેદાર ભાગીદારી થયા બાદ રોહિતની વિકેટ પડ્યા પછી પણ વિરાટ ધીમો નહોતો પડ્યો અને ફટકાબાજી ચાલુ જ રાખી હતી અને પોતાના 120મા બૉલમાં તેણે 135મા રને વિકેટ ગુમાવી હતી જેમાં સાત સિક્સર અને અગિયાર ફોર સામેલ હતી.
આપણ વાચો: BCCIના નિર્ણય બાદ રોહિત શર્માએ ડોમેસ્ટિકમાં રમવાના આપ્યા સંકેત, પણ વિરાટ કોહલીનું મૌન
વિરાટની વિકેટ બાદ ભારતનો સ્કોર 44મી ઓવરને અંતે 5/284 હતો. તે બર્ગરના બૉલમાં રિકલ્ટનના હાથમાં કૅચઆઉટ થયો હતો.
કૅપ્ટન કે. એલ. રાહુલ 29 રને અને રવીન્દ્ર જાડેજા ચાર રને રમી રહ્યા હતા.
વિરાટે વન-ડે ફૉર્મેટમાં સૌથી વધુ વખત ફિફ્ટી-પ્લસ સ્કોર કરવાના રેકૉર્ડમાં સચિન તેન્ડુલકરને પાછળ રાખી દીધો છે. વિરાટે રવિવારે 59મી વખત ફિફ્ટી-પ્લસ સ્કોર નોંધાવ્યો. સચિને 58 વાર ફિફ્ટી-પ્લસ સ્કોરની સિદ્ધિ નોંધાવી હતી.
ટેસ્ટ ક્રિકેટમાં સચિન 51 સેન્ચુરી સાથે વર્લ્ડ નંબર-વન છે, જ્યારે વિરાટ એમાં 30 સેન્ચુરી ફટકારી શક્યો છે અને ટેસ્ટમાંથી નિવૃત્ત થઈ ચૂક્યો છે.
વિરાટ હવે માત્ર વન-ડે ફૉર્મેટમાં જ રમે છે અને 2027ના વન-ડે વર્લ્ડ કપના પ્લાનમાં તે તેમ જ રોહિત શર્મા કેવી રીતે ફિટ બેસશે એના પર ક્રિકેટ બોર્ડ દ્વારા થોડા દિવસમાં ચર્ચા કરવામાં આવશે એવી સંભાવના છે.
