રાયપુરમાં પ્રથમવાર ટીમ ઇન્ડિયા રમશે ટી-૨૦ મેચ: શ્રેયસ ઐય્યરની થશે વાપસી
રાયપુર: ભારત અને ઑસ્ટ્રેલિયા વચ્ચે ટી-૨૦ સીરિઝની ચોથી મેચ આજે રાયપુરના શહીદ વીર નારાયણ સિંહ સ્ટેડિયમમાં રમાશે. ભારતે પ્રથમ બે મેચ જીતી હતી. આ પછી ઑસ્ટ્રેલિયાએ ત્રીજી મેચ જીતી હતી. ટીમ ઈન્ડિયા હવે શ્રેણી પર કબજો કરવાના ઈરાદા સાથે મેદાનમાં ઉતરશે. ભારતીય ટીમ પ્રથમ વખત રાયપુરમાં ટી-૨૦ મેચ રમશે. મેચ ભારતીય સમય અનુસાર સાંજે સાત વાગ્યે શરૂ થશે.
ટીમ ઈન્ડિયા આ સિરીઝમાં હાલ ૨-૧થી આગળ છે. શ્રેયસ ઐય્યરને પણ શ્રેણીની છેલ્લી બે મેચ માટે ભારતીય ટીમની ટીમમાં સામેલ કરવામાં આવશે. તે વાઈસ કેપ્ટન તરીકે છેલ્લી બે મેચનો ભાગ રહેશે.
શહીદ વીર નારાયણ સિંહ ઈન્ટરનેશનલ સ્ટેડિયમમાં અત્યાર સુધી માત્ર એક વન-ડે ઈન્ટરનેશનલ મેચ રમાઈ છે. આ મેચ ભારત અને ન્યૂઝીલેન્ડની ટીમો વચ્ચે રમાઈ હતી. આ મેચ આ વર્ષની શરૂઆતમાં રમાઈ હતી જેમાં પ્રથમ બેટિંગ કરતા ન્યૂઝીલેન્ડની ટીમ ૧૦૮ રનમાં ઓલઆઉટ થઈ ગઈ હતી. આ સાથે જ ટીમ ઈન્ડિયાએ બે વિકેટના નુકસાને આ લક્ષ્યાંક હાંસલ કરી લીધો હતો.
શ્રેયસની વાપસીનો અર્થ એ છે કે તિલક વર્માને બહાર રહેવું પડી શકે છે કારણ કે યશસ્વી જયસ્વાલ, ઋતુરાજ ગાયકવાડ, ઈશાન કિશન, કેપ્ટન સૂર્યકુમાર યાદવ અને ફિનિશર રિંકુ સિંહની પસંદગી નક્કી છે.
ઑસ્ટ્રેલિયા માટે ત્રીજી મેચ એકલા હાથે જીતનાર મેક્સવેલની ગેરહાજરીનો ભારતીય ટીમ ફાયદો ઉઠાવવાનો પ્રયાસ કરશે. સ્મિથ અને એડમ ઝમ્પા પણ સ્વદેશ પરત ફર્યા છે કારણ કે તેઓ પણ વર્લ્ડ કપની ટીમમાં હતા.
હવે ભારતીય બોલરોને ટિમ ડેવિડ, જોશ ફિલિપ અને બેન મેકડર્મોટના પડકારનો સામનો કરવો પડશે, જેઓ છેલ્લા પાંચ-છ સપ્તાહમાં મર્યાદિત ઓવરની ક્રિકેટમાં શાનદાર પ્રદર્શન કરી રહ્યા છે. આ સિવાય વર્લ્ડ કપ ફાઇનલમાં યાદગાર ઇનિંગ રમનાર ટ્રેવિસ હેડ અને અનુભવી કેપ્ટન મેથ્યુ વેડ પણ ટીમમાં છે. ગુવાહાટીની જેમ અહીં પણ ઝાકળની ભૂમિકા મહત્ત્વની રહેશે અને ટોસ જીતનાર કેપ્ટન લક્ષ્યનો પીછો કરવા માગશે.
