નવી દિલ્હીઃ આઇપીએલના ચૅરમૅન અરુણ ધુમાલે (Arun Dhumal) કહ્યું છે કે પાકિસ્તાન સાથેના ક્રિકેટ સંબંધો બાબતમાં બીસીસીઆઇ (BCCI) ચુસ્તપણે કેન્દ્ર સરકારના વલણને જ વળગી રહ્યું છે.
કાશ્મીરના પહલગામમાં 26 હિન્દુ સહેલાણીઓની હત્યા થયા બાદ ભારતભરમાં પાકિસ્તાન-વિરોધી અભિગમ રહ્યો હોવાને કારણે હવે એ જ દુશ્મન દેશ સામે ક્રિકેટ રમવાનો સમય આવી ગયો છે એટલે ભારતના અસંખ્ય લોકોમાં આ મૅચ બાબતમાં વિરોધનો સૂર છે અને પાકિસ્તાન (Pakistan) સામે ન જ રમવું જોઈએ એવું ઘણા કહી રહ્યા છે અને એને અનુલક્ષીને આઇપીએલના અધ્યક્ષે આ નિવેદન બહાર પાડ્યું છે.
મે મહિનામાં બન્ને દેશ વચ્ચે યુદ્ધ થયું ત્યાર પછી પહેલી જ વાર ભારત (India) અને પાકિસ્તાન વચ્ચે ક્રિકેટ મૅચ રમાવાની છે. આ મૅચ રવિવાર, 14મી સપ્ટેમ્બરે (ભારતીય સમય મુજબ રાત્રે 8.00 વાગ્યાથી) દુબઈમાં એશિયા કપમાં રમાશે.
અરુણ ધુમાલે અહીં પત્રકારોને સંબોધતા કહ્યું હતું કે ` કેન્દ્ર સરકારે સ્પષ્ટ શબ્દોમાં કહ્યું છે કે પાકિસ્તાન સામે ભારત દ્વિપક્ષી સિરીઝ નહીં રમે અને પાકિસ્તાન સામે ભારત માત્ર બહુરાષ્ટ્રીય ટૂર્નામેન્ટોમાં જ રમશે. અમે સરકારની સૂચનાનું જ પાલન કરી રહ્યા છીએ.’
ભારત સરકારે રિયલ-મની ગૅમિંગ પર પ્રતિબંધ મૂકી દીધો હોવાથી બીસીસીઆઇના ટીમ ઇન્ડિયાના જર્સી-સ્પૉન્સર ડ્રીમ-11 સાથેના કરારનો અંત આવી ગયો છે. આ વિશે ધુમાલે કહ્યું, ` અમે નવા સ્પૉન્સર નક્કી કરવા માટેની પ્રક્રિયા શરૂ કરી દીધી છે અને બે-ત્રણ અઠવાડિયામાં એ વિશે બધાને જાણકારી મળી જશે.’
આપણ વાંચો: T20 Asia Cup 2025: બાંગ્લાદેશે હરાવ્યું હોંગ કોંગને
