દુબઈઃ ભારતે પાકિસ્તાનને એશિયા કપની રવિવારની ઐતિહાસિક ફાઇનલમાં માત્ર 146 રનના સ્કોર પર ઑલઆઉટ કરી દીધું એમાં સૌથી મોટી ભૂમિકા કુલદીપ યાદવની હતી. તેણે ચાર વિકેટ લીધી હતી અને આખી ટૂર્નામેન્ટમાં 17 વિકેટ સાથે તે મોખરે રહ્યો હતો. બૅટ્સમેનોમાં અભિષેક શર્મા આ એશિયા કપમાં 314 રન સાથે અવ્વલ હતો.
રવિવારે પાકિસ્તાનની એક તબકકે 113 રનમાં એક જ વિકેટ હતી, પરંતુ ભારતની સ્પિન-ત્રિપુટી સામે પાકિસ્તાનની નબળી બૅટિંગ લાઇન-અપ પત્તાના મહેલની જેમ તૂટી પડી હતી. આ સ્પિન-ત્રિપુટીમાં કુલદીપ યાદવ (30 રનમાં ચાર વિકેટ) સુપરસ્ટાર હતો.
અક્ષર પટેલ (26 રનમાં બે વિકેટ) અને વરુણ ચક્રવર્તી (30 રનમાં બે વિકેટ) એ પણ પાકિસ્તાનને સીમિત રખાવવામાં મોટા યોગદાન આપ્યા હતા. બુમરાહ પણ એમાં બાકાત નહોતો, કારણકે તેણે માત્ર પચીસ રનમાં બે વિકેટ લીધી હતી. પાકિસ્તાનના પ્રથમ ત્રણ બૅટ્સમેને ડબલ ડિજિટમાં રન કર્યા હતા, જ્યારે ત્રણના ઝીરો હતા. બાકીના પાંચ બૅટ્સમેનના સિંગલ-ડિજિટમાં રન હતા. સૌથી સારી ઇકોનોમિકલ બોલિંગ અક્ષર (6.50)ની હતી. પાકિસ્તાને 33 રનમાં છેલ્લી નવ વિકેટ ગુમાવી દીધી હતી.
સૂર્યાના કૅચની ચર્ચા, ગાવસકરે કરી ભારતીય કૅપ્ટનની ટીકા
ભારતે ફાઇનલમાં 147 રનના સાધારણ લક્ષ્યાંક મેળવવા જતાં સુપરસ્ટાર બૅટ્સમૅન અભિષેક શર્મા બાદ 10મા રન પર કૅપ્ટન સૂર્યકુમારની બીજી વિકેટ ગુમાવી ત્યારે આ મૅચમાં પહેલી વાર સ્થિતિ ચંચળ થઈ ગઈ હતી. આફ્રિદીના બૉલમાં હરીફ સુકાની સલમાન આગાએ સૂર્યાના લૉફ્ટેડ શૉટમાં ખૂબ જ નીચો કૅચ ઝીલ્યો ત્યારે શરૂઆતમાં એ કૅચ ચર્ચાસ્પદ થઈ ગયો હતો અને પછીથી મામલો થર્ડ અમ્પાયર સુધી ગયો હતો જેમણે સૂર્યાને આઉટ જાહેર કર્યો હતો. સુનીલ ગાવસકરે બિનજરૂરી શૉટ મારવા બદલ સૂર્યાની ટીકા કરી હતી. જોકે પછીથી ગિલની વિકેટ પડ્યા બાદ તિલક અને સૅમસને 50-પ્લસની ભાગીદારીથી બાજી સંભાળી લીધી હતી.
રઉફની ઓવર ભારત માટે ટર્નિંગ
હારિસ રઉફની 15મી ઓવરમાં 17 રન બનતાં બાજી પલટાઇ ગઈ હતી. એમાં તિલક વર્માએ એક સિક્સર, એક ફોર તથા શિવમ દુબેએ એક ફોર ફટકારી હતી. ત્યાર પછી પણ બન્નેએ વિકેટની વચ્ચે દોડતી વખતે થોડી મૂંઝવણ વચ્ચે ફટકાબાજી ચાલુ રાખી હતી.
આ પણ વાંચો…પાકિસ્તાન નહીં સુધરે! હવે નવા નાટકમાં આ ભારતીય ખેલાડી વિરુદ્ધ કરી ફરિયાદ
ઈજાગ્રસ્ત હાર્દિક ટીમની બહાર, રિન્કુ સિંહ પ્લેઇંગ-ઇલેવનમાં
છેલ્લી ઘણી મૅચોમાં હરીફ ટીમની ઇનિંગ્સમાં પ્રથમ ઓવર કરનાર ઑલરાઉન્ડર હાર્દિક પંડ્યા ઈજાને કારણે નહોતો રમ્યો. જોકે મુખ્ય ફાસ્ટ બોલર જસપ્રીત બુમરાહે ટીમમાં કમબૅક કર્યું હતું અને પાકિસ્તાનની બે વિકેટ લીધી હતી. રિન્કુ સિંહને આ ટૂર્નામેન્ટમાં પહેલી જ વખત રમવાની તક મળી હતી. છેલ્લે તે મે મહિનામાં આઇપીએલમાં રમ્યો હતો. શિવમ દુબેએ પણ ટીમમાં કમબૅક કર્યું હતું. અર્શદીપ સિંહ અને હર્ષિત રાણાને ઇલેવનની બહાર રાખવામાં આવ્યા હતા. પાકિસ્તાને ટીમમાં કોઈ ફેરફાર નહોતો કર્યો.
શાસ્ત્રીની સાથે વકાર પણ મેદાન પર!
સૂર્યકુમાર યાદવે ટૉસ વખતે સિક્કો ઉછાળ્યો હતો અને પાકિસ્તાની સુકાની સલમાન આગાએ હેડ્સનો કૉલ આપ્યો હતો. જોકે ટેઇલ પડતાં સૂર્યકુમારે પહેલાં બોલિંગ કરવાનો નિર્ણય લીધો હતો. રવિ શાસ્ત્રી અને વકાર યુનુસે ટૉસ સમયે કૅપ્ટનના ઇન્ટરવ્યૂ લીધા હતા. ફાઇનલમાં તટસ્થ પ્રેઝન્ટર રાખવાની પાકિસ્તાન ક્રિકેટ બોર્ડે એસીસીને વિનંતી કરી હતી જેને પગલે શાસ્ત્રીની સાથે વકારને પણ પ્રેઝન્ટર તરીકે રાખવામાં આવ્યો હતો.
આ પણ વાંચો…ભારત એશિયન ચૅમ્પિયન…
બન્ને દેશની ટીમઃ
ભારતઃ સૂર્યકુમાર યાદવ (કૅપ્ટન), અભિષેક શર્મા, શુભમન ગિલ, તિલક વર્મા, સંજુ સૅમસન (વિકેટકીપર), શિવમ દુબે, રિન્કુ સિંહ, અક્ષર પટેલ, કુલદીપ યાદવ, જસપ્રીત બુમરાહ અને વરુણ ચક્રવર્તી.
પાકિસ્તાનઃ સલમાન અલી આગા (કૅપ્ટન), સાહિબઝાદા ફરહાન, ફખર ઝમાન, સઇમ અયુબ, હુસેન તલત, મોહમ્મદ હારિસ (વિકેટકીપર), મોહમ્મદ નવાઝ, ફહીમ અશરફ, શાહીન શાહ આફ્રિદી, હારિસ રઉફ અને અબ્રાર અહમદ.
