અફઘાનિસ્તાનની છમાંથી બે વિકેટ હૉંગ કૉંગ વતી રમતા મુંબઈના ગુજરાતી સ્પિનરે લીધી!
અબુ ધાબીઃ અફઘાનિસ્તાને અહીં એશિયા કપ (Asia cup)ની પ્રારંભિક મૅચમાં હૉંગ કૉંગ સામે બૅટિંગ પસંદ કર્યા પછી નબળી શરૂઆત બાદ ફટકાબાજી કરીને છ વિકેટે 188 રન કરીને હૉંગ કૉંગને 189 રનનો પડકારરૂપ લક્ષ્યાંક આપ્યો હતો. અફઘાનિસ્તાને 26 રનમાં બે વિકેટ ગુમાવી દીધી હતી, પરંતુ ઓપનર સેદિકુલ્લા અટલે (અણનમ 73 રન, બાવન બૉલ, ત્રણ સિક્સર, છ ફોર) છેક સુધી ક્રીઝમાં રહીને ટીમની આબરૂ સાચવી લીધી હતી.
મિડલ-ઑર્ડરના બૅટ્સમૅન અઝમતુલ્લા ઓમરઝાઇએ પણ (53 રન, 21 બૉલ, પાંચ સિક્સર, બે ફોર) ટીમને મહત્ત્વનું યોગદાન આપ્યું હતું. અટલ અને ઓમરઝાઈ વચ્ચે પાંચમી વિકેટ માટે 35 બૉલમાં 82 રનની ભાગીદારી થઈ હતી. ટીમના 188 રનમાં મોહમ્મદ નબીનું 33 રનનું યોગદાન હતું.
Kinchit Shah gets rid of a set Mohammad Nabi for 33 runs #AsiaCup #AFGvHK pic.twitter.com/RhISHds9bb
— CricketTimes.com (@CricketTimesHQ) September 9, 2025
અફઘાનિસ્તાનની છમાંથી બે વિકેટ મૂળ મુંબઈના ગુજરાતી ઑફ-સ્પિનર કિંચીત દેવાંગ શાહે (3-0-24-2) લીધી હતી. તેણે મોહમ્મદ નબી તથા ગુલબદીન નઇબને આઉટ કર્યા હતા. એ ઉપરાંત તેણે અફઘાનિસ્તાનના આક્રમક બૅટ્સમેનોને એક તબક્કે કાબૂમાં પણ રાખ્યા હતા. 29 વર્ષનો કિંચીત શાહ (Kinchit Shah) મૂળ તો બૅટિંગ-ઑલરાઉન્ડર છે. અફઘાનની બીજી બે વિકેટ ભારતીય મૂળના પેસ બોલર આયુષ શુક્લાએ મેળવી હતી. બાકીની એક-એક વિકેટ અતીક ઇકબાલ અને એહસાન ખાને લીધી હતી.
એ પહેલાં, રાશીદ ખાને ટૉસ જીતીને બૅટિંગ પસંદ કરી હતી. આ મૅચ અબુ ધાબીના જગવિખ્યાત શેખ ઝાયદ સ્ટેડિયમમાં રમાઈ રહી છે. અફઘાનિસ્તાનની ટીમ પાકિસ્તાન સામેની ટાયેન્ગ્યૂલર સિરીઝની ફાઇનલમાં હારીને અબુ ધાબીમાં આ મૅચ રમવા આવી છે.
રાશીદ ખાને ટૉસ વખતે જ કહ્યું હતું કે ` અહીંની પિચ બૅટિંગ માટે ખૂબ સારી છે એટલે અમે મોટો સ્કોર નોંધાવવા કોઈ કસર નહીં છોડીએ.’
રાશીદ ખાન અફઘાનિસ્તાનનો કૅપ્ટન હોવા ઉપરાંત મુખ્ય સ્પિનર અને ઑલરાન્ડર પણ છે. યાશિમ મુર્તઝા હૉંગ કૉંગનો સુકાની છે.
