T20 World Cup :ભારતે આયરલૅન્ડને આઠ વિકેટે હરાવીને કર્યો વિજયીઆરંભ

ન્યૂ યૉર્ક: ભારતે અહીં પિચના વિવાદ વચ્ચે ટી-20 વર્લ્ડ કપમાં પોતાની પહેલી મૅચમાં આયરલૅન્ડને આઠ વિકેટે હરાવીને બે પૉઇન્ટ મેળવ્યા હતા. એ સાથે, 2007ના ચૅમ્પિયન ભારતે આગવી સ્ટાઇલમાં વિશ્ર્વ કપમાં શરૂઆત કરી હતી. વર્લ્ડ નંબર-વન ભારતે 97 રનનો લક્ષ્યાંક 12.2 ઓવરમાં બે વિકેટના ભોગે મેળવી લીધો હતો.

કૅપ્ટન રોહિત શર્મા (બાવન રન, 37 બૉલ, ત્રણ સિક્સર, ચાર ફોર) ટીમના 76 રનના સ્કોર પર જમણા હાથ પર બૉલ વાગતાં પૅવિલિયનમાં પાછો જતો રહ્યો હતો. તેની અને રિષભ પંત (36 અણનમ, 26 બૉલ, બે સિક્સર, ત્રણ ફોર) વચ્ચે 76 રનની પાર્ટનરશિપ થઈ હતી. વિરાટ કોહલી ઓપનિંગમાં રમ્યો હતો, પરંતુ પોતાના પાંચમા બૉલ પર એક રનના સ્કોરે ઍડેરના બૉલમાં કૅચઆઉટ થયો હતો. સૂર્યકુમાર યાદવ પણ માત્ર બે રન બનાવીને વિકેટ ગુમાવી બેઠો હતો. છેલ્લે શિવમ દુબે ઝીરો પર અણનમ રહ્યો હતો.

ઍડેર અને બેન વાઇટે એક-એક વિકેટ લીધી હતી.
એ પહેલાં, ભારતે અહીં ટી-20 વર્લ્ડ કપમાં ગ્રૂપ ‘એ’માં પોતાની આ પહેલી જ મૅચમાં દમદાર પર્ફોર્મન્સમાં આયરલૅન્ડને 16 ઓવરમાં 96 રનમાં ઑલઆઉટ કરી નાખ્યું હતું. ભારતને 97 રનનો લક્ષ્યાંક મળ્યો એ પહેલાં જસપ્રીત બુમરાહ, હાર્દિક પંડ્યા અને અર્શદીપ સિંહે આયરિશોને સૌથી વધુ આંચકા આપ્યા હતા.

મિડલ ઑર્ડરના બૅટર ગરેથ ડેલની (26 રન, 14 બૉલ, બે સિક્સર, બે ફોર)એ ભારતીયોને સારીએવી લડત આપી હતી અને છેક 16મી ઓવરના અંતિમ બૉલ પર રનઆઉટ થયો હતો. તેના ઉપરાંત કેટલાક પૂછડિયા બૅટર્સે પણ ભારતીયો બોલર્સને હંફાવ્યા હતા. નવમી વિકેટ માટે 27 રનની અને 10મી વિકેટ માટે 19 રનની ભાગીદારી થઈ હતી. જોકે ગરેથને બાદ કરતા બીજો કોઈ બૅટર 15 રન પણ નહોતો બનાવી શક્યો.

ન્યૂ યૉર્કની પિચ પર ફાસ્ટ બોલર્સને બાઉન્સ અને સીમ મૂવમેન્ટ સારા મળ્યા હતા.
બુમરાહે છ રનમાં બે વિકેટ, હાર્દિકે 27 રનમાં ત્રણ અને અર્શદીપે 35 રનમાં બે વિકેટ લીધી હતી. આયરલૅન્ડને પહેલી ત્રણ ઓવરમાં ફક્ત નવ રનમાં બે આંચકા અર્શદીપે આપ્યા હતા. મોહમ્મદ સિરાજે એક અને અક્ષર પટેલે એક વિકેટ લીધી હતી. ખાસ કરીને અક્ષરે પોતાના જ બૉલમાં બૅરી મૅકાર્થીનો અફલાતૂન ડાઇવિંગ કૅચ પકડ્યો હતો. રવીન્દ્ર જાડેજાને એક ઓવર મળી હતી જેમાં તેને સાત રનમાં વિકેટ નહોતી મળી.

વિકેટકીપર રિષભ પંતે બે કૅચ પકડ્યા હતા અને ગરેથને સિરાજ સાથે મળીને રનઆઉટ કર્યો હતો.
આયરલૅન્ડની ઇનિંગ્સમાં છઠ્ઠી ઓવર જસપ્રીત બુમરાહને આપવામાં આવી હતી અને તેણે એ ઓવર પૂરી કરતાની સાથે નવો વિક્રમ રચી દીધો હતો. તેની એ મેઇડન ઓવર હતી. ટી-20 ઇન્ટરનૅશનલમાં એ તેની 11મી મેઇડન હતી. ટેસ્ટ-ક્રિકેટ રમતા દેશોના બોલર્સમાંથી ટી-20 ઇન્ટરનૅશનલમાં સૌથી વધુ મેઇડન ઓવર કરનારાઓમાં હવે બુમરાહ નંબર વન છે. તેણે ભુવનેશ્ર્વર કુમારનો 10 મેઇડનનો રેકૉર્ડ તોડ્યો છે.

બીજું, ટી-20 ઇન્ટરનૅશનલમાં પાવરપ્લેમાં સૌથી વધુ વિકેટ લેનારાઓમાં બુમરાહ ત્રીજા સ્થાને આવી ગયો છે. તેના નામે પાવરપ્લેની પચીસ વિકેટ છે. અર્શદીપ સિંહ 26 વિકેટ સાથે બીજા નંબરે અને ભુવનેશ્ર્વર 47 વિકેટ સાથે પ્રથમ નંબરે છે.
એ પહેલાં, રોહિત શર્માએ વાદળિયા હવામાન વચ્ચે ટૉસ જીતીને ફીલ્ડિંગ પસંદ કરી હતી. રોહિતે ટૉસ વખતે કહ્યું, ‘અમે આ જ પિચ પર (બાંગ્લાદેશ સામેની વૉર્મ-અપ મૅચ) રમ્યા હતા એટલે પિચ વિશે થોડુંઘણું જાણીએ જ છીએ.’
ભારતે ટીમમાં ચાર ઑલરાઉન્ડર (હાર્દિક, જાડેજા, અક્ષર, શિવમ) સમાવ્યા હતા.
હવે ભારત રવિવારે આ જ સ્થળે પાકિસ્તાન સામે (રાત્રે 8.00 વાગ્યાથી લાઇવ) રમશે.