વિશ્વ વિજેતાંઓનું હોમટાઉનમાં વાજતેગાજતે સ્વાગત
નવી દિલ્હીઃ ઓપનર પ્રતીકા રાવલ ઈજાને લીધે સેમિ ફાઇનલ પહેલાં જ ટૂર્નામેન્ટની બહાર થઈ ગઈ હતી એટલે ફાઇનલ બાદ ભારતની તમામ 15 ભારતીય ખેલાડીઓને જે આઇસીસી મેડલ (Medal) આપવામાં આવ્યા એ માટે પ્રતીકા આઇસીસીના નિયમ મુજબ પાત્ર નહોતી, પરંતુ છેવટે તેને મેડલ એ મળ્યું છે.
પ્રતીકા (Pratika)ના સ્થાને સેમિ ફાઇનલમાં અને ફાઇનલમાં શેફાલી વર્માને રમાડવામાં આવી હતી અને તે પ્લેયર ઑફ ધ ફાઇનલનો પુરસ્કાર જીતી હતી.
પ્રતીકાએ શુક્રવારે પત્રકારોને કહ્યું, ` મને છેવટે આ બહુમૂલ્ય મેડલ મળી ગયું છે. મને કોઈકે કહ્યું કે (આઇસીસી ચૅરમૅન) જય શાહે મારા માટે આ મેડલ મોકલ્યું છે. હું બેહદ ખુશ છું. આ મેડલ આવવાનું જ હતું, કારણ વિના સોશ્યલ મીડિયામાં કેટલાકે મેડલનો આ મુદ્દો ચગાવી નાખ્યો.’
દરમ્યાન, વર્લ્ડ ચૅમ્પિયનોનું પરિવાર-મિત્રોએ શુક્રવારે શાનદાર સ્વાગત કર્યું હતું. આ ખેલાડીઓ બુધવારે વડા પ્રધાન નરેન્દ્ર મોદીને અને ગુરુવારે રાષ્ટ્રપતિ દ્રૌપદી મુર્મૂને મળી હતી જ્યાં તેમનું બહુમાન કરવામાં આવ્યું હતું.
ભારતની વર્લ્ડ ચૅમ્પિયન વિકેટકીપર-બૅટર રિચા ઘોષનું પશ્ચિમ બંગાળના સીલીગુરીમાં તેમ જ હર્લીન દેઓલ તથા અમનજોત કૌરનું પંજાબના મોહાલીમાં પરિવારજનો અને મિત્રો દ્વારા ભવ્ય સ્વાગત કરવામાં આવ્યું હતું.
આ પણ વાંચો…ક્રિકેટર હર્લીન દેઓલે વડા પ્રધાન મોદીને સ્કિનકેર અને ચહેરા પરના ગ્લો વિશે પૂછી લીધું!
