મહિલા વર્લ્ડ કપ જીતનાર ટીમ પર પૈસાનો વરસાદઃ જાણો, કેટલા કરોડ રૂપિયાની થશે લહાણી

દુબઈઃ અહીં હેડ ક્વૉર્ટર ધરાવતી ઇન્ટરનૅશનલ ક્રિકેટ કાઉન્સિલ (ICC)એ મોટી જાહેરાત કરી છે જેમાં જણાવવામાં આવ્યું છે કે ભારતમાં આગામી 30મી સપ્ટેમ્બરે શરૂ થનારો આઠ ટીમ વચ્ચેનો મહિલાઓનો વન-ડે વર્લ્ડ કપ જીતનારી ચૅમ્પિયન (CHAMPION) ટીમને 40 કરોડ રૂપિયા જેટલું તોતિંગ રોકડ ઇનામ આપવામાં આવશે. વાસ્તવમાં વન-ડે વર્લ્ડ કપની બાબતમાં આઇસીસીએ પુરુષો કરતાં મહિલાઓની કુલ ઇનામી રકમ (Prize money) ઘણી વધારી દીધી છે.

ભારતના ભૂતપૂર્વ બીસીસીઆઇ-સેક્રેટરી અને કેન્દ્રીય ગૃહ પ્રધાન અમિત શાહના પુત્ર જય શાહ આઇસીસીના ચૅરમૅન છે. મહિલાઓના વન-ડે વર્લ્ડ કપનો આગામી 30મી સપ્ટેમ્બરે બે યજમાન દેશ ભારત અને શ્રીલંકા વચ્ચેની ગુવાહાટી ખાતેની મૅચથી આરંભ થશે અને બીજી નવેમ્બરે ફાઇનલ રમાશે. આઇસીસીના જણાવ્યા મુજબ વિશ્વભરમાં મહિલા વર્લ્ડ કપની લોકપ્રિયતા વધારવાના હેતુથી તેમ જ પુરુષો સાથે સમાનતા લાવવાના આશયથી ઇનામી રકમમાં તોતિંગ વધારો કરવામાં આવ્યો છે. ભારતમાં આ વર્લ્ડ કપની મૅચો ગુવાહાટી, ઇન્દોર, નવી મુંબઈ, વિશાખાપટનમમાં તેમ જ શ્રીલંકામાં કોલંબોમાં રમાશે.

ગયા વર્લ્ડ કપની તુલનામાં આ ઇનામી રકમમાં લગભગ સાડાત્રણસો ટકાનો વધારો કરવામાં આવ્યો છે. ગયા વર્લ્ડ કપમાં ચૅમ્પિયન મહિલા ટીમ (ઑસ્ટ્રેલિયા)ને 1.32 મિલિયન ડૉલર (અંદાજે 11.65 કરોડ રૂપિયા)નું પ્રથમ ઇનામ અપાયું હતું. જોકે હવે એ ઇનામમાં લગભગ સાડાત્રણસો ટકાનો વધારો કરવામાં આવ્યો છે અને આ વખતે વિશ્વ કપ જીતનારી ટીમને આઇસીસી તરફથી 4.48 મિલિયન ડૉલર (આશરે 39.55 કરોડ રૂપિયા)નું પ્રાઇઝ મની આપવામાં આવશે.

આઇસીસીએ ખરેખર તો આ વખતના વિમેન્સ વર્લ્ડ કપથી પ્રાઇઝ મનીમાં તોતિંગ વધારો કર્યો છે. આ ટૂર્નામેન્ટમાં કુલ મળીને 13.88 મિલિયન ડૉલર (અંદાજે 122.5 કરોડ રૂપિયા)ની ઇનામી રકમ ફાળવવામાં આવશે. ગયા વર્લ્ડ કપમાં કુલ પ્રાઇઝ મનીની રકમ 3.5 મિલિયન ડૉલર (31 કરોડ રૂપિયા) હતી જે 297 ટકા જેટલો વધારો દર્શાવે છે. મહિલા વર્લ્ડ કપની બાબતમાં આઇસીસીએ કુલ ઇનામી રકમ જે રીતે વધારી છે એને કારણે આ રકમ પુરુષોના વર્લ્ડ કપની પ્રાઇઝ મનીથી પણ ઘણી વધી ગઈ છે. 2023માં ભારતમાં આયોજિત મેન્સ વન-ડે વર્લ્ડ કપમાં કુલ 10 મિલિયન ડૉલર (88.26 કરોડ રૂપિયા)ની ઇનામી રકમ આપવામાં આવી હતી.

મહિલા વર્લ્ડ કપ માટેની ઇનામી રકમ

(1) કુલ ઇનામી રકમઃ 13.88 મિલિયન ડૉલર (122.5 કરોડ રૂપિયા)
(2) ચૅમ્પિયન ટીમઃ 4.48 મિલિયન ડૉલર (39.55 કરોડ રૂપિયા)
(3) રનર-અપ ટીમઃ 2.24 મિલિયન ડૉલર (19.77 કરોડ રૂપિયા)
(4) સેમિ ફાઇનલમાં પરાજિત ટીમ (દરેકને)ઃ 1.12 મિલિયન ડૉલર (9.89 કરોડ રૂપિયા)
(5) ગ્રૂપ સ્ટેજમાં પ્રત્યેક જીત બદલ ટીમનેઃ 34,314 ડૉલર (30.29 લાખ રૂપિયા)
(6) પાંચમા-છઠ્ઠા સ્થાનની ટીમ (દરેકને)ઃ 7 લાખ ડૉલર (62 લાખ રૂપિયા)
(7) સાતમા-આઠમા સ્થાનની ટીમ (દરેકને)ઃ 2,80,000 ડૉલર (24.71 લાખ રૂપિયા)
(8) ટૂર્નામેન્ટમાં ભાગ લેવા બદલ પ્રત્યેક ટીમનેઃ 2,50,000 ડૉલર (22 લાખ રૂપિયા)

આપણ વાંચો:  દુલીપ ટ્રોફીમાં સેન્ટ્રલ-વેસ્ટ અને સાઉથ-નોર્થ વચ્ચે સેમિ ફાઇનલ