ફોર્ટ લૉડરડેલઃ આર્જેન્ટિનાનો લિયોનેલ મેસી અમેરિકાની ઇન્ટર માયામી ટીમમાં જોડાયો ત્યાર પછી તેણે આ ટીમને 2023માં સૌપ્રથમ લીગ્સ કપની ટ્રોફી અપાવી ત્યાર બાદ હવે મેજર લીગ સૉકર (એમએલએસ) કપનું ટાઇટલ પણ અપાવવાની તૈયારીમાં છે. શનિવારે મેસીની આગેવાનીમાં માયામીએ પહેલી વખત એમએલએસની ફાઇનલમાં પ્રવેશ કર્યો હતો.
માયામીએ ન્યૂ યૉર્ક સિટી ફૂટબૉલ ક્લબ (એફસી) સામેની મૅચમાં 5-1થી વિજય મેળવીને એમએલએસની ફાઇનલ (Final)માં સ્થાન પાક્કું કર્યું હતું. આ પહેલાં માયામીની ટીમ આ ટૂર્નામેન્ટમાં અગાઉની પાંચ સીઝનમાં ક્યારેય ઓપનિંગ પોસ્ટસીઝન રાઉન્ડ પણ પાર નહોતું કરી શક્યું, જ્યારે હવે આ ટીમ મેસી અને બીજા ખેલાડીઓના પર્ફોર્મન્સની મદદથી ફાઇનલમાં પહોંચી ગઈ છે.
માયામી (Miami) વતી ટૅડીઓ ઑલેન્ડેએ ગોલની હૅટ-ટ્રિક નોંધાવી એ ઉપરાંત મૅટીયો સિલ્વેટી અને ટેલાસ્કો સેગૉવિયાએ એક-એક ગોલ કર્યો હતો. મૅટીયોને ગોલ કરવામાં મેસીએ મદદ કરી હતી. આંતરરાષ્ટ્રીય તેમ જ પ્રોફેશનલ ફૂટબૉલમાં મેસીએ 405 વખત સાથી ખેલાડીઓને ગોલ કરવામાં મદદ કરી છે જે રેકૉર્ડ છે.
હવે છઠ્ઠી ડિસેમ્બરે માયામીનો ફાઇનલમાં વૅનકુંવર સામે મુકાબલો થશે. વૅનકુંવરે શનિવારે સૅન ડિયેગોને 3-1થી હરાવ્યું હતું.
માયામીની ટીમ અગાઉ એમએલએસમાં સપોર્ટર્સ શીલ્ડ પણ જીતી ચૂકી છે. મેસીની કૅપ્ટન્સીમાં 2022માં આર્જેન્ટિના ફિફા વર્લ્ડ કપ જીત્યું હતું.
