નવી દિલ્હીઃ બુધવારે મણિપુર (MANIPUR) રાજ્યના નવા મુખ્ય પ્રધાન તરીકે શપથ લેનાર ભાજપના નેતા યુમનામ ખેમચંદ સિંહનો ટાયેકવૉન્ડોની રમત સાથે બહુ જૂનો નાતો છે અને તેમણે સીએમ તરીકે કાર્યભાર સંભાળ્યો એ સાથે આ રમત સાથેના તેમના સંબંધોની રસપ્રદ જાણકારી બહાર આવી છે.
ટાયેકવૉન્ડો (TAEKWONDO)ની રમત કોરિયન માર્શલ આર્ટ પર આધારિત છે. આ રમત કૉમ્બેટ સ્પોર્ટ તરીકે પણ જાણીતી છે અને એમાં કિકિંગ તથા પન્ચિંગના દાવપેચ શીખવવામાં આવે છે. ઘણા ભારતીયો આ માર્શલ આર્ટમાં વિવિધ કૅટેગરીના બ્લૅક બેલ્ટ મેળવી ચૂક્યા છે.
યુમનામ ખેમચંદ સિંહ 62 વર્ષના છે. તેઓ 16 વર્ષના હતા ત્યારથી માર્શલ આર્ટ જાણે છે. 1980ના દાયકામાં તેમણે જ આસામ અને મણિપુરમાં ટાયેકવૉન્ડોની કળાને પ્રચલિત કરી હતી. તેઓ ઑલ આસામ ટાયેકવૉન્ડો અસોસિયેશનના સ્થાપક છે.
યુમનામ ખેમચંદ સિંહ બ્લૅક બેલ્ટ ધરાવે છે અને અગાઉ તેઓ ટાયેકવૉન્ડો ફેડરેશન ઑફ ઇન્ડિયાના ઉપ-પ્રમુખ હતા. તેઓ મણિપુરના મુખ્ય પ્રધાન બન્યા હોવાથી હવે આ રાજ્યમાં ટાયેકવૉન્ડોની રમતને વધુ ફેલાવો મળશે.
