લંડનઃ પુરુષોની ટેસ્ટ-ક્રિકેટનો આરંભ 1877ની સાલમાં (148 વર્ષ અગાઉ) થયો હતો, પરંતુ ક્રિકેટના મક્કા ગણાતા ઇંગ્લૅન્ડના લૉર્ડ્સમાં સૌપ્રથમ ટેસ્ટ જુલાઈ, 1884માં રમાઈ હતી અને હવે એ જ ઐતિહાસિક સ્થળે મહિલાઓની (women’s) સૌપ્રથમ ટેસ્ટ-મૅચ રાખવાનું નક્કી થયું છે જેમાં યજમાન ઇંગ્લૅન્ડનો મુકાબલો ભારત સાથે થશે. આ જાહેરાત ગુરુવારે કરવામાં આવી હતી જેમાં જણાવાયું હતું કે જુલાઈ, 2026માં લૉર્ડ્સમાં મહિલાઓની પહેલી ટેસ્ટ ઇંગ્લૅન્ડ-ભારત વચ્ચે રમાશે.
1884ની ટેસ્ટમાં ઇંગ્લૅન્ડે ઑસ્ટ્રેલિયાને એક દાવ અને પાંચ રનથી હરાવ્યું હતું. હવે જુલાઈ, 2026માં મહિલાઓની સૌપ્રથમ ટેસ્ટમાં ભારત (India) અને ઇંગ્લૅન્ડમાંથી કોણ જીતશે એ જોવું રહ્યું. ભારત અને ઇંગ્લૅન્ડ (England)ની મહિલા ટીમ વચ્ચેની ટેસ્ટ મૅચ ચાર દિવસની હશે. ઇંગ્લૅન્ડમાં 12 જૂનથી પાંચમી જુલાઈ સુધી મહિલાઓનો ટી-20 વર્લ્ડ કપ રમાશે અને ત્યાર બાદ મહિલાઓની ઐતિહાસિક ટેસ્ટ લૉર્ડ્સમાં રમાશે.
ઉલ્લેખનીય છે કે 2026ની મે-જૂન દરમ્યાન ભારતીય મહિલા ક્રિકેટરો ઇંગ્લૅન્ડમાં ટી-20 સિરીઝ પણ રમશે.દરમ્યાન 2026માં ભારતીય ક્રિકેટરોનો આખો જુલાઈ મહિનો ઇંગ્લૅન્ડમાં વીતશે, કારણકે એ મહિનામાં ભારતના ખેલાડીઓ બ્રિટિશરો સામે સૌથી પહેલાં તો પાંચ ટી-20 રમશે અને ત્યાર બાદ ત્રણ વન-ડે મૅચની સિરીઝ રમાશે.
