બુમરાહે બૉક્સિંગ-ડે ટેસ્ટ પહેલાં જ નવો ઇતિહાસ રચ્યો, ભારતનો એવો પહેલો ફાસ્ટ બોલર છે જેણે…
મેલબર્નઃ બોર્ડર-ગાવસકર ટ્રોફી ટેસ્ટ-સિરીઝમાં મેલબર્નમાં ગુરુવારે શરૂ થતી બૉક્સિંગ-ડે ટેસ્ટની પૂર્વસંધ્યાએ (બુધવારે) જસપ્રીત બુમરાહે આઇસીસીના ટેસ્ટ રૅન્કિંગ્સમાં ભારત માટે નવો ઇતિહાસ રચી દીધો હતો. તે ટેસ્ટ બોલર્સના રૅન્કિંગ્સમાં 904 રેટિંગ પૉઇન્ટ મેળવનારો ભારતનો બીજો બોલર અને પ્રથમ ફાસ્ટ બોલર છે. ઑફ-સ્પિનર રવિચન્દ્રન અશ્વિને 2016માં મુંબઈમાં ઇંગ્લૅન્ડ સામેની સિરીઝની ચોથી ટેસ્ટ વખતે 904 પૉઇન્ટની અપ્રતિમ સિદ્ધિ મેળવી હતી. તેની પહેલાં કે તેના પછી ક્યારેય કોઈ ભારતીય બોલર ટેસ્ટ બોલર્સના રૅન્કિંગમાં 904 પૉઇન્ટ સુધી નહોતો પહોંચી શક્યો, પરંતુ હવે ફાસ્ટ બોલર બુમરાહે તેની બરાબરી કરી છે.
બ્રિસ્બેનની ત્રીજી ટેસ્ટમાં બુમરાહે કુલ 94 રનમાં નવ વિકેટ લીધી હતી જેને કારણે તેના રેટિંગમાં 14 પૉઇન્ટ વધી ગયા હતા. વર્તમાન સિરીઝની ત્રણ ટેસ્ટમાં તેણે જે 21 વિકેટ લીધી છે એ હાઇએસ્ટ છે. આ 21 વિકેટે તેને કુલ 48 રેટિંગ પૉઇન્ટ અપાવ્યા છે. સાઉથ આફ્રિકાનો કૅગિસો રબાડા 856 પૉઇન્ટ સાથે બીજા નંબરે અને ઑસ્ટ્રેલિયાનો જૉશ હૅઝલવૂડ 852 પૉઇન્ટ સાથે ત્રીજા ક્રમે છે. ઑસ્ટ્રેલિયાનો કૅપ્ટન પૅટ કમિન્સ 822 પૉઇન્ટ સાથે ચોથા ક્રમે અને તાજેતરમાં જ નિવૃત્ત થયેલો અશ્વિન 789 પૉઇન્ટ સાથે પાંચમા નંબરે છે.
Also read: ICC Rankings: દુનિયાના બેસ્ટ બોલરમાં બુમ બુમ બુમરાહે મારી બાજી, દિગ્ગજોને પાછળ રાખી બન્યો નંબર
વર્તમાન સિરીઝમાં બીજા નંબરે મિચલ સ્ટાર્ક (14 વિકેટ) છે અને તે બુમરાહથી ઘણો પાછળ છે. ફરી ટેસ્ટ બોલર્સના રેટિંગ પૉઇન્ટની વાત કરીએ તો ઇંગ્લૅન્ડના મહાન ફાસ્ટ બોલર સિડની બાન્સના નામે વર્લ્ડ રેકૉર્ડ છે. 1914માં તેમણે 932 રેટિંગ પૉઇન્ટ હાંસલ કર્યા હતા. બીજા નંબરે ઇંગ્લૅન્ડના જ ભૂતપૂર્વ ફાસ્ટ બોલર જ્યોર્જ લૉહમૅન (931), ત્રીજા નંબરે પાકિસ્તાનના ફાસ્ટ બોલર ઇમરાન ખાન (922), ચોથા નંબરે શ્રીલંકાનો ભૂતપૂર્વ ઑફ-સ્પિનર મુથૈયા મુરલીધરન (920) અને પાંચમા નંબરે ઑસ્ટ્રેલિયાનો ભૂતપૂર્વ ફાસ્ટ બોલર ગ્લેન મૅકગ્રા (914) છે.
