જયપુરઃ વિકેટકીપર-બૅટ્સમૅન સંજુ સૅમસન 2026ની આઇપીએલમાં કઈ ટીમ વતી રમશે એની ચર્ચા વચ્ચે આધારભૂત સમાચાર મળ્યા છે કે રાજસ્થાનનું ફ્રૅન્ચાઇઝી ટ્રેડ ડીલના ભાગરૂપે સૅમસન આપીને ચેન્નઈની ટીમ પાસેથી ઑલરાઉન્ડર રવીન્દ્ર જાડેજા ઉપરાંત બીજો ઑલરાઉન્ડર સૅમ કરૅન (Sam Curran) પણ લેશે.
ક્રિકેટ જગતની સૌથી મોટી લીગ ટૂર્નામેન્ટ આઇપીએલનું આ હાઈ-પ્રોફાઇલ પ્લેયર ટ્રેડ કહેવાશે. એવી પણ ચર્ચા છે કે બન્ને ફ્રૅન્ચાઇઝીએ આ ત્રણેય ખેલાડી સાથે ચર્ચા કરી લીધી છે. સૅમસન (Samson) 11 વર્ષથી રાજસ્થાનની ટીમમાં છે અને જાડેજા (Jadeja) ચેન્નઈ સાથે 2012ની સાલથી જોડાયેલો છે.
એવું જાણવા મળ્યું હતું કે રાજસ્થાનની ટીમનું મૅનેજમેન્ટ સૅમસનના બદલામાં માત્ર એક ખેલાડી મળે એનાથી ખુશ નહોતું. એ તો ઇચ્છે હતું કે એને સૅમસનના બદલામાં જાડેજા ઉપરાંત સાઉથ આફ્રિકાનો આક્રમક બૅટ્સમૅન ડેવાલ્ડ બ્રેવિસ પણ મળી જાય. બ્રેવિસ ક્રિકેટ જગતમાં બૅબી ડિવિલિયર્સ તરીકે ઓળખાય છે.
એક જાણીતી ક્રિકેટલક્ષી વેબસાઇટના અહેવાલ મુજબ સૅમસન તથા જાડેજાને પાછલી સીઝનમાં અનુક્રમે રાજસ્થાન અને ચેન્નઈએ 18 કરોડ રૂપિયાવાળા સ્લૉટમાં રિટેન કર્યા હતા. અત્યાર સુધીમાં તેમની અદલાબદલીને લગતી ડીલ પાક્કી થઈ જવી જોઈતી હતી, પરંતુ રાજસ્થાનનું ફ્રૅન્ચાઇઝી ખેલાડીઓને સીધા સ્વૅપ કરવા માટે તૈયાર નથી. એ ઇચ્છે છે કે આ ટ્રેડમાં ચેન્નઈની ટીમના માલિકો એને સૅમસનના બદલામાં જાડેજા ઉપરાંત વધુ એક ખેલાડી પણ આપે. જોકે ચેન્નઈની ટીમના અધિકારી બ્રેવિસ આપવા રાજી નહોતા.
સાઉથ આફ્રિકાનો આક્રમક બૅટ્સમૅન ડેવાલ્ડ બ્રેવિસ હજી ગયા વર્ષે જ ચેન્નઈની ટીમમાં જોડાયો હતો. કહેવાય છે કે રાજસ્થાનના ફ્રૅન્ચાઇઝીએ ટ્રેડ સંબંધમાં અન્ય કેટલીક ટીમો (હૈદરાબાદ, દિલ્હી, કોલકાતા, લખનઊ)નો પણ સંપર્ક કર્યો હતો. જાડેજા આઇપીએલના સૌથી સફળ ઑલરાઉન્ડર્સમાં ગણાય છે. તેણે આ ટૂર્નામેન્ટમાં 3,260 રન કરવા ઉપરાંત 170 વિકેટ પણ લીધી છે.
આ પણ વાંચો…રાજસ્થાનને સૅમસનના બદલામાં આ બે ખેલાડી જોઈએ છેઃ ચેન્નઈનું ફ્રૅન્ચાઇઝી હેરાન પરેશાન છે…
