નવી દિલ્હીઃ દિલ્હીએ અહીં બુધવારે મૅચ ટાઇ થયા બાદ રાજસ્થાનને સુપરઓવરમાં હરાવીને રોમાંચક વિજય મેળવ્યો હતો. આઇપીએલમાં (2021 બાદ) ચાર વર્ષે સુપરઓવર થઈ હતી. રાજસ્થાને પાંચ બૉલમાં બે વિકેટે 11 રન કર્યા હતા. સ્ટાર્કની ઓવરમાં હેટમાયરની ગરબડને લીધે રિયાન અને યશસ્વી રનઆઉટ થતાં એક બૉલ બાકી રાખીને રાજસ્થાનની ટીમે સુપરઓવરમાંથી વિદાય લેવી પડી હતી. દિલ્હીએ રાજસ્થાનના સંદીપ શર્માની ઓવરમાં ચાર બૉલમાં (રાહુલની ફોર તથા સ્ટબ્સની સિક્સરની મદદથી) 13 રન કરીને રોમાંચક વિજય મેળવ્યો હતો.
એ પહેલાં, મુખ્ય મૅચમાં દિલ્હીએ પાંચ વિકેટે 188 રન બનાવ્યા બાદ રાજસ્થાને ચાર વિકેટે 188 રન બનાવતાં (20મી ઓવરમાં નવ રનને બદલે આઠ રન થતાં) મૅચ ટાઇ થઈ હતી અને સુપરઓવરમાં ગઈ હતી.
રાજસ્થાને 10 વર્ષે દિલ્હીને એના જ ગઢ (અરુણ જેટલી સ્ટેડિયમ)માં હરાવાનો મોકો ગુમાવ્યો. સંજુ સૅમસનની ટીમ પરાજયની પરંપરા તોડી ન શકી.યશસ્વીના ચાર સિક્સર, ત્રણ ફોરથી બનેલા 51 રન અને સૅમસનના (રિટાયર હર્ટ થતાં પહેલાં) ત્રણ સિક્સર, બે ફોર સાથે બનેલા 31 રન બાદ નીતીશ રાણા (51 રન, 28 બૉલ, બે સિક્સર, છ ફોર) તથા ધ્રુવ જુરેલ (26 રને રનઆઉટ)ની જોડીએ 49 રનની જે ભાગીદારી કરી હતી. 116/2ના સ્કોર પર અક્ષરના બૉલમાં બાઉન્ડરી લાઇનની લગોલગ સ્ટબ્સે રાણાનો જે કૅચ છોડ્યો એ દિલ્હીને ભારે પડ્યો હતો.
અગાઉ, દિલ્હીએ બૅટિંગ મળ્યા બાદ 20 ઓવરમાં પાંચ વિકેટે 188 રન કર્યા હતા. દિલ્હી (DC) વતી એક પણ બૅટ્સમૅન હાફ સેન્ચુરી નહોતો ફટકારી શક્યો એમ છતાં આરઆરની યજમાન ટીમને 189 રનનો પડકારજનક લક્ષ્યાંક આપવામાં સફળ થઈ હતી.
ઓપનર અભિષેક પોરેલ (49 રન, 37 બૉલ, એક સિક્સર, પાંચ ફોર)નું ટીમમાં સૌથી મોટું યોગદાન હતું. જોકે કૅપ્ટન અક્ષર પટેલ (34 રન, 14 બૉલ, બે સિક્સર, ચાર ફોર) સૌથી સારા સ્ટ્રાઇક-રેટથી રમ્યો હતો. તેનો 242.85નો સ્ટ્રાઇક-રેટ તમામ બૅટ્સમેનમાં હાઇએસ્ટ હતો.
કેએલ રાહુલ (38 રન, 32 બૉલ, બે સિક્સર, બે ફોર) તેમ જ ટ્રિસ્ટેન સ્ટબ્સ (34 અણનમ, 18 બૉલ, બે સિક્સર, બે ફોર)ના અને આશુતોષ શર્મા (15 અણનમ, 11 બૉલ, બે ફોર)ના પણ સાધારણ યોગદાન હતા. અગાઉની મૅચમાં 89 રન કરનાર કરુણ નાયર (0) આ મૅચમાં અભિષેક પોરેલ સાથેની ગેરસમજમાં શૂન્ય પર જ રનઆઉટ થઈ ગયો હતો. એ પહેલાં, ઓપનર ફ્રેઝર જેક-મૅકગર્ક ફક્ત નવ રન કરીને સતત ચોથી વાર ફ્લૉપ ગયો હતો.
રાજસ્થાન (RR) વતી જોફ્રા આર્ચરે સૌથી વધુ બે વિકેટ તેમ જ શ્રીલંકન બોલર માહીશ થીકશાના અને વનિન્દુ હસરંગાએ એક-એક વિકેટ લીધી હતી.