આરસીબીના 196/7, ચેન્નઈનો સ્પિનર નૂર અહમદ ફરી સૌથી સફળ બોલર બન્યો…
ચેન્નઈઃ અહીં ચેપૉકના એમએ ચિદમ્બરમ સ્ટેડિયમમાં આજે ચેન્નઈ સુપર કિંગ્સ (CSK)એ બૅટિંગ આપ્યા બાદ રૉયલ ચૅલેન્જર્સ બેંગલૂરુ (RCB)એ 20 ઓવરમાં સાત વિકેટના ભોગે 196 રન બનાવીને સીએસકેને 197 રનનો પડકારરૂપ લક્ષ્યાંક આપ્યો હતો. આરસીબીના દિગ્ગજો સાધારણ સ્કોર નોંધાવી શક્યા હતા, જ્યારે કૅપ્ટન રજત પાટીદારે (51 રન, 32 બૉલ, ત્રણ સિક્સર, ચાર ફોર) કંઈક અસરદાર રમ્યો હતો અને પોતાની ટીમને 200 રનની નજીક પહોંચાડવામાં તેનું સૌથી મોટું યોગદાન હતું.
ફરી એક વાર અફઘાનિસ્તાનનો લેફ્ટ-આર્મ સ્પિનર નૂર અહમદ (Noor Ahmed) ટીમના તમામ બોલર્સમાં સૌથી વધુ વિકેટ લેવામાં સફળ થયો હતો. તેણે 23મી માર્ચે મુંબઈ ઇન્ડિયન્સ (MI) સામેની મૅચમાં 18 રનમાં ચાર વિકેટ લીધી હતી અને મૅન ઑફ ધ મૅચનો પુરસ્કાર જીત્યો હતો.
આજે નૂર અહમદે આરસીબીની 36 રનમાં ત્રણ વિકેટ લીધી હતી. શ્રીલંકન ફાસ્ટ બોલર મથીશા પથિરાનાએ બે વિકેટ લીધી હતી. રવીન્દ્ર જાડેજાને 37 રનમાં અને સૅમ કરૅનને 34 રનમાં વિકેટ નહોતી મળી, પરંતુ ખલીલ અહમદ, રવિચન્દ્રન અશ્વિન એક-એક વિકેટ લેવામાં સફળ થયા હતા.
આરસીબીને સૌથી વધુ આધાર આ ટૂર્નામેન્ટની પ્રથમ મૅચના વિનર વિરાટ કોહલી પર હતો. તે 30 બૉલમાં 31 રન બનાવીને નૂર અહમદના બૉલમાં રચિન રવીન્દ્રના હાથમાં કૅચઆઉટ થયો હતો. તેણે સાથી ઓપનર ફિલ સૉલ્ટ (32 રન) સાથે મળીને પ્રથમ વિકેટ માટે 45 રનની ભાગીદારી કરી હતી જે આખી ઇનિંગ્સમાં હાઇએસ્ટ હતી. કોહલીએ કૅપ્ટન રજત પાટીદાર સાથે 41 રનની પાર્ટનરશિપ કરી હતી.
એ પહેલાં, સીએસકેના કૅપ્ટન ઋતુરાજ ગાયકવાડે ટૉસ જીતીને ફીલ્ડિંગ પસંદ કરી હતી જેને પગલે રજત પાટીદારના સુકાનમાં આરસીબીને પ્રથમ બૅટિંગ કરવાની તક મળી હતી. બન્ને ટીમે પ્લેઇંગ-ઇલેવનમાં એક-એક ફેરફાર કર્યો હતો. ચેન્નઈએ એલિસના સ્થાને ફરી પથિરાનાને ટીમમાં સમાવ્યો હતો. બેંગલૂરુએ રસિખ સલામના સ્થાને ભુવનેશ્વર કુમારને ઇલેવનમાં સામેલ કર્યો હતો. એવું મનાતું હતું કે બેંગલૂરુ માટે આ પિચ પર 200 રન બનાવવા મુશ્કેલ છે અને એ ધારણા સાચી પડી હતી, કારણકે આરસીબીની ટીમ 200 રનનો આંકડો ચાર રન માટે ચૂકી ગઈ હતી.
આ પણ વાંચો : પહેલા ત્રણ બૉલમાં કમિન્સની ત્રણ સિક્સર, આઈપીએલમાં ચોથો ખેલાડી બન્યો…
બન્ને ટીમની પ્લેઇંગ-ઇલેવન શું છેઃ
બેંગલૂરુઃ વિરાટ કોહલી, ફિલ સૉલ્ટ, દેવદત્ત પડિક્કલ, રજત પાટીદાર (કૅપ્ટન), લિઆમ લિવિંગસ્ટન, જિતેશ શર્મા (વિકેટકીપર), ટિમ ડેવિડ, કૃણાલ પંડ્યા, ભુવનેશ્વર કુમાર, જૉશ હૅઝલવૂડ અને યશ દયાલ. ઇમ્પૅક્ટ પ્લેયર્સઃ સુયશ શર્મા, રસિખ સલામ, મનોજ ભંડાગે, જૅકબ બેથેલ, સ્વપ્નિલ સિંહ.
ચેન્નઈઃ રચિન રવીન્દ્ર, રાહુલ ત્રિપાઠી, ઋતુરાજ ગાયકવાડ (કૅપ્ટન), દીપક હૂડા, સૅમ કરૅન, રવીન્દ્ર જાડેજા, એમએસ ધોની (વિકેટકીપર), આર. અશ્વિન, નૂર અહમદ, મથીશા પથિરાના અને ખલીલ અહમદ. ઇમ્પૅક્ટ પ્લેયર્સઃ શિવમ દુબે, કમલેશ નાગરકોટી, વિજય શંકર, જૅમી ઓવર્ટન, શેખ રાશીદ.