અજિંક્ય રહાણે બન્યો કોલકત્તા નાઇટ રાઇડર્સનો નવો કેપ્ટન, વેંકટેશ ઐય્યર વાઇસ કેપ્ટન

કોલકત્તાઃ કોલકાતા નાઈટ રાઈડર્સે (કેકેઆર) ઇન્ડિયન પ્રિમિયર લીગ 2025 સીઝન પહેલા બેટ્સમેન અજિંક્ય રહાણેને ટીમનો કેપ્ટન બનાવ્યો છે. જ્યારે ઓલરાઉન્ડર વેંકટેશ ઐય્યરને ટીમના વાઇસ કેપ્ટન બનાવવામાં આવ્યો છે.

રહાણેની કેપ્ટનશીપમાં કેકેઆર ટીમ ટાઇટલ બચાવવાના ઇરાદા સાથે મેદાનમાં ઉતરશે. છેલ્લી સીઝનમાં શ્રેયસ ઐય્યરે ટીમની કેપ્ટનશીપ સંભાળી અને 10 વર્ષની રાહ જોયા બાદ ટીમને ટાઇટલ સુધી પહોંચાડી હતી. શ્રેયસ આ વખતે પંજાબ કિંગ્સનું નેતૃત્વ કરશે તેથી કેકેઆર નવા કેપ્ટનના નેતૃત્વમાં રમશે.

આ પણ વાંચો: IPL 2025: MIની વિરોધી ટીમો સાવધાન! જસપ્રીત બુમરાહ ઘાતક બોલિંગ કરવા તૈયાર

વેંકટેશને કેકેઆરએ સૌથી વધુ કિંમતે ખરીદ્યો હતો અને આગામી સીઝનમાં તે રહાણે સાથે મળીને કામ કરશે. વેંકટેશ લાંબા સમયથી કોલકાતા ફ્રેન્ચાઇઝનો ભાગ છે. ડિફેન્ડિંગ ચેમ્પિયન કેકેઆર આઇપીએલ 2025માં તેમના અભિયાનની શરૂઆત 22 માર્ચે કોલકાતાના ઇડન ગાર્ડન્સ ખાતે રોયલ ચેલેન્જર્સ બેંગલુરુ સામે કરશે.

કેપ્ટન બન્યા બાદ રહાણેએ કહ્યું કે, આઇપીએલમાં સૌથી સફળ ફ્રેન્ચાઇઝીમાંની એક કેકેઆરની કેપ્ટનશીપ કરવી એ સન્માનની વાત છે. મને લાગે છે કે અમારી ટીમ સંતુલિત અને ઉત્તમ છે. હું ટાઇટલ બચાવવાના પડકારનો સામનો કરવા માટે બધા સાથે કામ કરવા આતુર છું.”

આ પણ વાંચો: IPL 2025 દરમિયાન થતી રહેશે ટેસ્ટ મેચની પ્રેક્ટિસ ! ઇંગ્લેન્ડ પ્રવાસ માટે BCCI બનાવી રહી છે નવી યોજના

ચેન્નઈ સુપર કિંગ્સમાં બે વર્ષ વિતાવ્યા બાદ રહાણે કેકેઆરમાં પરત ફરી રહ્યો છે. રહાણેએ 2022 સીઝનમાં કેકેઆર માટે સાત મેચ રમી અને 133 રન ફટકાર્યા હતા. મુંબઈના આ અનુભવી બેટ્સમેનને આઈપીએલમાં કેપ્ટનશીપનો પણ અનુભવ છે. રહાણેએ 2018 અને 2019 સીઝનમાં રાજસ્થાન રોયલ્સનું નેતૃત્વ કર્યું હતું.

રહાણે મુંબઈ રણજી ટીમનો કેપ્ટન છે અને વિરાટ કોહલીની કેપ્ટનશીપ દરમિયાન તે ભારતીય ટીમનો નિયમિત વાઇસ કેપ્ટન પણ હતો. ફ્રેન્ચાઇઝીએ રહાણેને મેગા ઓક્શનમાં તેની બેઝ પ્રાઈસ 1.5 કરોડ રૂપિયામાં ખરીદ્યો હતો.