રાંચીઃ ભારતે અહીં સાઉથ આફ્રિકાને વન-ડે (ODI) સિરીઝની ટી-20 જેવી પ્રથમ રોમાંચક મૅચમાં ઑલરાઉન્ડ પર્ફોર્મન્સ સાથે 17 રનના માર્જિનથી હરાવીને 1-0થી સરસાઈ લીધી હતી. સાઉથ આફ્રિકાના સાત પ્લેયરે બૅટિંગમાં જોરદાર લડત આપીને ભારતીયોના શ્વાસ અધ્ધર કરી નાખ્યા હતા, પણ ભારતીય બોલર્સે સમયાંતરે વિકેટો અપાવીને આબરૂ સાચવી હતી.
ભારતને જે સાત બૅટ્સમેને લડત આપી એમાં બ્રીટ્ઝકે (72 રન), યેનસેન (70 રન), કૉર્બિન (67 રન), ઝોર્ઝી (39 રન), બે્રવિસ (37 રન), સુબ્રયેન (17 રન) અને બર્ગર (17 રન)નો સમાવેશ હતો. સાઉથ આફ્રિકાની ટીમ 350 રનના તોતિંગ લક્ષ્યાંક સામે 49.2 ઓવરમાં 332મા રને ઑલઆઉટ થઈ હતી. અંતિમ વિકેટ ક્રિષ્નાએ લીધી હતી જે આ દાવમાં તેની પ્રથમ વિકેટ હતી.
એ અગાઉ, કુલદીપે (KULDEEP) ચાર તેમ જ હર્ષિતે ત્રણ અને અર્શદીપે બે વિકેટ લીધી હતી. કુલદીપે બે વખત સાઉથ આફ્રિકનોની મોટી ભાગીદારી તોડી હતી. પહેલાં તો તેણે ટૉની ડિ ઝોર્ઝી (39 રન)ની ચોથી વિકેટ માટેની બ્રીટ્ઝકે સાથેની 66 રનની ભાગીદારી તોડી હતી. ત્યાર પછી બ્રીટ્ઝકેની બે્રવિસ (37 રન) સાથે 53 રનની ભાગીદારી થઈ હતી જે હર્ષિત રાણાએ તોડી ત્યાર પછી બ્રીટ્ઝકે અને માર્કો યેનસેન વચ્ચે 69 બૉલમાં 97 રનની પાર્ટનરશિપ થઈ હતી જે પણ કુલદીપે જ તોડી હતી.
કુલ 227 રનના સ્કોર પર પાંચ વિકેટ હતી, પણ કુલદીપે ત્રણ બૉલમાં બે વાર ત્રાટકીને સ્કોર 7/228 ઉપર લાવી દીધો હતો. કુલદીપે બ્રીટ્ઝકે અને યેનસેનને કૅચઆઉટ કરાવ્યા હતા.
એ પહેલાં, ભારતે સાઉથ આફ્રિકાને 350 રનનો તોતિંગ લક્ષ્યાંક આપ્યો હતો. ભારતે બૅટિંગ મળ્યા બાદ 50 ઓવરમાં આઠ વિકેટે 349 રન કર્યા હતા જેમાં વિરાટ કોહલી (120 બૉલમાં સાત સિક્સર, અગિયાર ફોરની મદદથી 135 રન), કે. એલ. રાહુલ (56 બૉલમાં ત્રણ સિક્સર, બે ફોરની મદદથી 60 રન), રોહિત શર્મા (51 બૉલમાં ત્રણ સિક્સર, પાંચ ફોર સાથે 57 રન) અને રવીન્દ્ર જાડેજા (32 રન)ના સૌથી મોટા યોગદાન હતા.
સાઉથ આફ્રિકાના બોલર્સમાંથી માર્કો યેનસેન, નૅન્ડ્રે બર્ગર, કૉર્બિન બૉશ્ચ અને ઑટનિલ બાર્ટમૅને બે-બે વિકેટ લીધી હતી. ભારતે છેલ્લા સાત બૉલમાં ત્રણ વિકેટ (રાહુલ, જાડેજા, અર્શદીપ) ગુમાવી હતી. યશસ્વી (18 રન), ગાયકવાડ (આઠ રન) અને વૉશિંગ્ટન (13) મોટી ઇનિંગ્સ નહોતા રમી શક્યા.
