લંડનઃ પેસ બોલર હર્ષિત રાણાને ઇંગ્લૅન્ડ સામે શુક્રવાર, 20મી જૂને (બપોરે 3.30 વાગ્યે) શરૂ થનારી પાંચ મૅચની ટેસ્ટ-સિરીઝ માટેની સ્ક્વૉડમાં કવર તરીકે (19મા પ્લેયર તરીકે) સમાવવામાં આવ્યો છે અને તે લંડન (LONDON)થી કેટલાક સાથી ખેલાડીઓ જોડે ટ્રેનમાં બેસીને લીડ્સ (LEEDS) પહોંચ્યો હતો.
ભારત-ઇંગ્લૅન્ડની પ્રથમ ટેસ્ટ લીડ્સમાં રમાવાની છે.
હર્ષિત રાણા (HARSHIT RANA) ઇન્ડિયા એ’ ટીમનો ખેલાડી હતો અને એ જ ટીમના અમુક પ્લેયર્સ જેમને ટેસ્ટ ટીમમાં પણ સામેલ કરવામાં આવ્યા છે તેમની સાથે હર્ષિતે લંડનથી લીડ્સ સુધીની ટ્રેન (TRAIN)ની આ મુસાફરી કરી હતી. 23 વર્ષની ઉંમરના ઊંચા કદના હર્ષિતે ગયા વર્ષે ઑસ્ટ્રેલિયા સામેની શ્રેણીમાં ટેસ્ટમાં ડેબ્યૂ કર્યું હતું. તેને ઇંગ્લૅન્ડ સામેની 18 ખેલાડીની ટીમમાં નહોતો સમાવવામાં આવ્યો, પરંતુ જસપ્રીત બુમરાહ આ સિરીઝની પાંચમાંથી ત્રણ જ ટેસ્ટ રમવાનો હોવાથી હર્ષિતને કવર તરીકે સ્ક્વૉડમાં સમાવવામાં આવ્યો છે. ભારતીયોની ટેસ્ટ ટીમના ખેલાડીઓ 13થી 16 જૂન દરમ્યાન બેકનહૅમમાં ઇન્ડિયાએ’ સામે પ્રૅક્ટિસ-મૅચ રમ્યા હતા. કેએલ રાહુલ તેમ જ કરુણ નાયર, યશસ્વી જયસ્વાલ, શાર્દુલ ઠાકુર, ધ્રુવ જુરેલ અને નીતીશ કુમાર રેડ્ડી ઇન્ડિયા `એ’ ટીમ સાથે યુકેમાં આવ્યા હતા અને તેમને સારી એવી પ્રૅક્ટિસ થઈ છે.
