રવિવારથી નંબર-વન ભારત સામે જોશીલા સાઉથ આફ્રિકનોની ટક્કર

રાંચીમાં પ્રથમ વન-ડેઃ ટીમ ઇન્ડિયામાં ફરી જોશ લાવવા રોહિત-વિરાટ પર મદારઃ બપોરે 1.30 વાગ્યે જંગ શરૂ

રાંચીઃ વન-ડે રૅન્કિંગના નંબર-વન ભારત (India)નું છેલ્લા થોડા વર્ષો દરમ્યાન પ્રભુત્વ રહ્યું છે, પરંતુ અત્યારે ભારતના વન-ડે (ODI) ખેલાડીઓની હાલત સૂડી વચ્ચે સોપારી જેવી છે. કારણ એ છે કે તેમણે ટીમ ઇન્ડિયાના ટેસ્ટ-ફૉર્મેટના પતન અને ફેબ્રુઆરીમાં ઘરઆંગણે રમાનારા ટી-20ના વર્લ્ડ કપને લગતી અપેક્ષાઓના બોજ વચ્ચે વન-ડે ફૉર્મેટમાં સારું રમીને ટીમ ઇન્ડિયાને ફરી ચમકાવવાની છે. રવિવાર, 30મી નવેમ્બરે (બપોરે 1.30 વાગ્યાથી) રાંચીમાં અવ્વલ ક્રમના ભારત અને છઠ્ઠા નંબરના સાઉથ આફ્રિકા (South Africa) વચ્ચે ત્રણ મૅચવાળી સિરીઝની પ્રથમ વન-ડે રમાશે અને એ વિજયી શરૂઆત કરીને કે. એલ. રાહુલની ટીમે તાજેતરમાં જ ટેસ્ટમાં જોવી પડેલી વાઇટવૉશની નામોશીને થોડી ભુલાવવાની છે.

ઇતિહાસ ભારતની પડખે

સાઉથ આફ્રિકા સામે ટીમ ઇન્ડિયાની 1991થી માંડીને અત્યાર સુધીમાં ભારતની ધરતી પર કુલ છ વન-ડે શ્રેણી રમાઈ છે જેમાં ભારત 4-1થી આગળ છે, જ્યારે એક શ્રેણી ડ્રૉમાં પરિણમી છે. જોકે 2006થી માંડીને અત્યાર સુધીમાં બન્ને દેશ વચ્ચે કુલ મળીને 10 વન-ડે સિરીઝ રમાઈ છે જેમાંથી પાંચ ભારતે અને પાંચ સાઉથ આફ્રિકાએ જીતી છે.

આ પણ વાંચો: ગિલ કદાચ વન-ડે સિરીઝમાં પણ નહીં રમે, કૅપ્ટન્સી માટે બોલાય છે આ બે નામ

રો-કોના આગમનથી આત્મવિશ્વાસ વધ્યો

રોહિત શર્મા અને વિરાટ કોહલીના આગમનથી ટીમ ઇન્ડિયાના ડ્રેસિંગ-રૂમમાં યુવાન ટીમમાં ફરી આત્મવિશ્વાસ જાગ્યો હશે. આ બન્ને મહારથીઓએ જ (અનુક્રમે અણનમ 121 રન અને અણનમ 74 રનના વ્યક્તિગત સ્કોર સાથે) ઑક્ટોબરમાં સિડનીમાં ભારતને ઑસ્ટ્રેલિયા સામેની અંતિમ વન-ડેમાં 168 રનની અતૂટ ભાગીદારી કરીને વાઇટવૉશની નામોશીથી બચાવ્યું હતું.

આ પણ વાંચો: વર્કલૉડની સમસ્યાઃ આ બે દિગ્ગજ ખેલાડી સાઉથ આફ્રિકા સામેની વન-ડે સિરીઝ કદાચ નહીં રમે…

` ઓપનર’ રોહિતની રાંચીથી જ શરૂઆત થયેલી

2013માં રાંચીમાં જેએસસીએ સ્ટેડિયમના આ જ મેદાન પર રોહિત શર્માને પહેલી વાર ઓપનર તરીકે રમવા ટીમ-મૅનેજમેન્ટનો પૂરો સપોર્ટ મળ્યો હતો અને ત્યાર પછીનો તેની ઝળહળતી કારકિર્દીનો ઇતિહાસ આપણી સામે જ છે.

ચાર સ્ટાર પ્લેયરની ગેરહાજરી

શુભમન ગિલ ગરદનની ઈજાને કારણે આ સિરીઝમાં નથી રમી રહ્યો, બુમરાહ-સિરાજને આરામ આપવામાં આવ્યા છે અને શ્રેયસ ઐયર પણ પાંસળી અને પેટની ઈજામાંથી હજી પૂર્ણપણે મુક્ત નથી થયો. તેમની ગેરહાજરીમાં રાહુલ આણિ મંડળીએ ટેમ્બા બવુમા ઍન્ડ કંપનીને પડકારવાની છે. જોકે ટેસ્ટ સિરીઝની નબળી બૅટિંગ લાઇન-અપની તુલનામાં વન-ડેની બૅટિંગ લાઇન-અપ મજબૂત છે જેમાં રો-કો (રોહિત-કોહલી) ઉપરાંત તિલક રાજ તથા ઋતુરાજ ગાયકવાડનો સમાવેશ થયો છે. બીજી તરફ, ટેસ્ટમાં 2-0થી જીત્યા બાદ સાઉથ આફ્રિકા હવે વન-ડેમાં પણ ભારતને પરચો બતાવવા મક્કમ છે.

આ પણ વાંચો: શુભમન ગિલને ગળામાં થયેલી ઈજા ગંભીર! પહેલી ટેસ્ટમાંથી બહાર, બીજીમાં રમવું પણ મુશ્કેલ!

બન્ને દેશની સંભવિત વન-ડે ટીમઃ

ભારતઃ કે. એલ. રાહુલ (કેપ્ટન, વિકેટકીપર), રોહિત શર્મા, યશસ્વી જયસ્વાલ, વિરાટ કોહલી, ઋતુરાજ ગાયકવાડ/તિલક વર્મા/રિષભ પંત (વિકેટકીપર), રવીન્દ્ર જાડેજા, વૉશિંગ્ટન સુંદર/કુલદીપ યાદવ, નીતીશકુમાર રેડ્ડી, હર્ષિત રાણા, પ્રસિદ્ધ ક્રિષ્ના અને અર્શદીપ સિંહ.

સાઉથ આફ્રિકાઃ ટેમ્બા બવુમા (કૅપ્ટન), એઇડન માર્કરમ, ક્વિન્ટન ડિકૉક (વિકેટકીપર), મૅથ્યૂ બ્રીટ્ઝકે, ડેવાલ્ડ બે્રવિસ, રુબિન હર્મેન, માર્કો યેનસેન, કૉર્બિન બૉશ્ચ, નૅન્ડ્રે બર્ગર, કેશવ મહારાજ અને લુન્ગી ઍન્ગિડી.

વન-ડે સિરીઝનું ટાઇમટેબલ

(1) પ્રથમ વન-ડે, રાંચી, બપોરે 1.30
(2) બીજી વન-ડે, રાયપુર, બપોરે 1.30
(3) ત્રીજી વન-ડે, વિશાખાપટનમ, બપોરે 1.30
(નોંધઃ આ શ્રેણી પછી બન્ને દેશ વચ્ચે ત્રણ ટી-20 રમાશે)