નવી દિલ્હીઃ ભારતીય પેસ બોલર હર્ષિત રાણા (Harshit Rana)એ ઘૂંટણમાં ઑપરેશન કરાવ્યું છે જેને કારણે તે આગામી ઇન્ડિયન પ્રીમિયર લીગ (ipl)ની શરૂઆતની અમુક મૅચો ગુમાવશે.
હર્ષિતને શનિવારે અમેરિકા સામેની વર્લ્ડ કપની પ્રથમ મૅચ અગાઉ નવી મુંબઈમાં સાઉથ આફ્રિકા સામેની પ્રૅક્ટિસ મૅચમાં અચાનક ઘૂંટણ (Knee)માં દુખાવો શરૂ થયો હતો જેને લીધે તે આ ટુર્નામેન્ટની બહાર થઈ ગયો હતો. તેના સ્થાને મોહમ્મદ સિરાજને રમવા મળ્યું અને તેણે અમેરિકા સામેની મૅચમાં ત્રણ વિકેટ લીધી હતી.
હર્ષિત રાણાએ કોકિલાબેન ધીરુભાઈ અંબાણી હૉસ્પિટલમાં ડૉ. દિનશા પારડીવાલા પાસે ઘૂંટણમાં સર્જરી કરાવી છે. હર્ષિત જરૂરી આરામ કર્યા બાદ બેંગ્લૂરુમાં બીસીસીઆઇના સેન્ટર ઑફ એક્સેલન્સમાં રિહૅબિલિટેશન માટે જશે.
કેટલાક સૂત્રોના જણાવ્યા મુજબ હર્ષિત રાણા આખી આઇપીએલ નહીં ગુમાવે, પણ ઘણી મૅચો ગુમાવશે. તેને કોલકાતા નાઇટ રાઇડર્સે 4.00 કરોડ રૂપિયામાં રીટેન કર્યો છે. જોકે હવે કેકેઆરના ફ્રૅન્ચાઇઝીએ આગામી સીઝન માટેની યોજનામાં થોડો ફેરફાર કરવો પડશે.
