નવી દિલ્હીઃ વર્લ્ડ કપ 2023ની ફાઈનલમાં ઓસ્ટ્રેલિયા સામે ટીમ ઈન્ડિયાની 6 વિકેટની હારને એક યુગના અંત તરીકે જોવામાં આવી રહી છે. ક્રિકેટના વર્તુળોમાં એવી ચર્ચા છે કે ઘણા સિનિયર ખેલાડીઓ માટે આ છેલ્લો વર્લ્ડ કપ હોઈ શકે છે. હવે એવા અહેવાલો આવી રહ્યા છે કે રાહુલ દ્રવિડે પણ મુખ્ય કોચનું પદ છોડી દીધું છે.
રાહુલ દ્રવિડનો 2 વર્ષનો કોન્ટ્રાક્ટ વર્લ્ડ કપ 2023 સાથે સમાપ્ત થઈ ગયો છે. એવા અહેવાલો હતા કે દ્રવિડનો કોન્ટ્રાક્ટ લંબાવવામાં આવી શકે છે, પરંતુ હવે તેમણે પોતે કોન્ટ્રાક્ટ લંબાવવાની ના પાડી દીધી છે. આવી સ્થિતિમાં ટીમ ઈન્ડિયાને વીવીએસ લક્ષ્મણના રૂપમાં નવો કોચ મળી શકે છે. લક્ષ્મણે દ્રવિડની ગેરહાજરીમાં ઘણી વખત મુખ્ય કોચની ભૂમિકા ભજવી છે. તેઓ આજથી એટલે કે 23 નવેમ્બરથી શરૂ થઈ રહેલી ઑસ્ટ્રેલિયા સામેની ટી-20 શ્રેણીમાં ભારતના કોચ પણ છે.
અહેવાલ મુજબ ઘણા સૂત્રોએ પુષ્ટિ કરી છે કે દ્રવિડે બીસીસીઆઈને તેનો કરાર વધારવાનો ઇનકાર કર્યો છે. તે VVS લક્ષ્મણ સાથે NCAના વડા તરીકેની ભૂમિકા અદલાબદલી કરવા પણ તૈયાર છે.
આધારભૂત સૂત્રોએ જણાવ્યું હતું કે , ‘લક્ષ્મણે આ પદ માટે ઉત્સુકતા વ્યક્ત કરી છે. વર્લ્ડ કપ દરમિયાન લક્ષ્મણ આ સંદર્ભે બીસીસીઆઈના ટોચના અધિકારીઓને મળવા અમદાવાદ ગયા હતા. તેઓ ટીમ ઈન્ડિયાના કોચ તરીકે લાંબા ગાળાના કરાર પર હસ્તાક્ષર કરે તેવી શક્યતા છે અને તેઓ ટીમ સાથે પ્રવાસ કરશે. સાઉથ આફ્રિકાના આગામી પ્રવાસમાં તેઓ પૂર્ણ સમયના કોચ તરીકે પોતાનો પ્રથમ પ્રવાસ કરી શકે છે.
સૂત્રે વધુમાં જણાવ્યું હતું કે, ‘દ્રવિડે બીસીસીઆઈને જાણ કરી છે કે તેને ફુલ ટાઈમ કોચ તરીકે ચાલુ રહેવામાં રસ નથી. લગભગ 20 વર્ષ સુધી, તેમણે એક ખેલાડી તરીકે ભારતીય ટીમ સાથે પ્રવાસ કર્યો હતો, અને છેલ્લા કેટલાક વર્ષોથી તેમણે ફરીથી ટીમ સાથે પ્રવાસનો આનંદ માણ્યો હતો. તેમને NCA ના વડાની ભૂમિકા સાથે કોઈ વાંધો નથી (જે ભૂમિકા તેમણે અગાઉ નિભાવી હતી), કારણ કે આ ભૂમિકા નિભાવવા માટે તેમણે તેમના વતન બેંગલુરુમાં જ રહેવાનું છે. તેઓ કોચ તરીકે ટીમ સાથે અનેક પ્રવાસો પર જવા માટે તૈયાર છે, પરંતુ પૂર્ણ-સમયના કોચિંગ માટે નહીં.
