ડુ પ્લેસીએ પાકિસ્તાનમાં રમવા આઇપીએલને કરી ગુડ બાય

નવી દિલ્હીઃ આગામી 16મી ડિસેમ્બરે અબુ ધાબીમાં યોજાનારા ઇન્ડિયન પ્રીમિયર લીગ (IPL)ના મિની પ્લેયર્સ-ઑક્શનમાં લગભગ કોઈ જ ફ્રૅન્ચાઇઝી નહીં ખરીદે કદાચ એવું ધારીને સાઉથ આફ્રિકાના ભૂતપૂર્વ ક્રિકેટર ફાફ ડુ પ્લેસી (DU PLESSIS)એ આ ભારતીય ટૂર્નામેન્ટને હમણાં ગુડબાય કરી દીધી છે અને પાકિસ્તાન તરફ તેણે મીટ માંડી છે.
ડુ પ્લેસી 14 વર્ષથી આઇપીએલમાં રમતો હતો, પરંતુ નિવૃત્તિ બાદ અને થોડા સમયથી ફૉર્મમાં ન હોવાથી આઇપીએલમાં તેનું વજન ઓછું થઈ ગયું હતું. એક જાણીતી ક્રિકેટ વેબસાઇટના ચોંકાવનારા અહેવાલ મુજબ ડુ પ્લેસીએ 16મી ડિસેમ્બરના આઇપીએલના ઑક્શનમાંથી નામ પાછું ખેંચી લીધું છે.

ડુ પ્લેસી 2010થી 2024 દરમ્યાન રૉયલ ચૅલેન્જર્સ બેંગલૂરુ, ચેન્નઈ સુપર કિંગ્સ, રાઇઝિંગ પુણે સુપરજાયન્ટ્સ, દિલ્હી કૅપિટલ્સ સહિત કુલ ચાર ટીમ વતી રમ્યો હતો. ચેન્નઈએ પાંચમાંથી જીતેલા બે ટાઇટલ વખતે ડુ પ્લેસી એ ટીમમાં હતો. તે હવે પાકિસ્તાન સુપર લીગ (પીએસએલ)માં રમવા પર ધ્યાન કેન્દ્રીત કરવા માગે છે.
ડુ પ્લેસીએ આઇપીએલમાં 154 મૅચમાં કુલ 4,773 રન કર્યા હતા જેમાં 39 હાફ સેન્ચુરી સામેલ હતી. આ 4,773 રનમાં 174 છગ્ગા અને 439 ચોક્કાનો સમાવેશ હતો.
2025ની આઇપીએલમાં તે દિલ્હી કૅપિટલ્સ વતી રમ્યો હતો જેમાં તેણે કુલ 202 રન કર્યા હતા. બે મૅચમાં તે અક્ષર પટેલની ગેરહાજરીમાં કૅપ્ટન હતો. દિલ્હીના ફ્રૅન્ચાઇઝીએ તેને ઑક્શન માટે રિલીઝ કરી દેતાં તેણે આઇપીએલને હમણાં ગુડ બાય કરી દેવાનું નક્કી કર્યું છે.



